Na Cakacaka ni Valetabu kei na Tuva Kawa—E Dua Vata Ga na Cakacaka

Na veika au lako curuma oya e vakatara meu vakavinavinakataka, ni oti e tolu na yabaki ni cakacaka vakaukauwa kei na solibula, o ira na Yalododonu e Kirtland, Ohio era qai vakaotia na nodra valetabu totoka ena vulaitubutubu ena 1836—na imatai ena tabagauna oqo. Ena vula o Maji ena yabaki vata tiko oya, sivia e dua na udolu na tamata era sokomuni ena valetabu kei na kena matamata me ra rogoca na masu ni kena vakatabui. A tucake mai o Josefa Simici me cabora na masu ni vakatabui, koya e ciqoma mai na ivakatakila (raica na Vunau kei na Veiyalayalati 109). E vakamacalataka ikea o koya e vuqa na veivakalougatataki veivakurabuitaki e soli vei ira era bula kilikili ni ra curu ena valetabu ni Turaga. A qai lagata na matasere “The Spirit of God” ka era tucake na lewe ni vavakoso me ra kailavaka na Hosanna “na kena rogo levu … sa rawa me talave kina na dela ni vale” (Teachings of Presidents of the Church: Joseph Smith [2007], 307).

Ni oti e dua na macawa vakamacala na Parofita na irairai ni Turaga ena loma ni valetabu, tukuna o koya:

Ia raica, au sa ciqoma na vale oqo, ka na dau tiko eke na yacaqu; kau na vakatakilai au vei ira na noqu tamata ena loloma cecere ena vale oqo.

“Ia na irogorogo ni vale oqo ena robota yani na veivanua tani; raica oqo sa itekivu ni veivakalougatataki ena sovaraki ki uludra na noqu tamata. Io ena vakakina” (Vunau kei na Veiyalayalati 110:7, 10).

Ni oti oya kei na so tale na raivotu, na parofita o Ilaitia, o koya a kau bulabula e lomalagi, a rairai mai vua na Parofita o Josefa Simici kei Oliver Cowdery ka tukuna:

“Raica, sa yaco mai na taucoko ni gauna, ka tukuna ko Malakai—ka a vakadinadinataka ni na talai mai ko koya [Ilaija], ni bera ni qai yaco na siga levu ka rerevaki ni Turaga—

“Raica ena vagolea ko koya na lomadra na qase vei ira na gone, kei na lomadra na gone vei ira na nodra qase, io deu na lako mai ka cudruva na vanua e na veivakarusai—

“Ia, sa soli ki ligamudrau na idola ni cakacaka me vakayacori e na gauna oqo; io mo drau kila kina ni sa voleka sara ni yaco na siga ni Turaga sa levu ka rerevaki, io sa tu mai katuba” (Vunau kei na Veiyalayalati 110:14–16).

Ni oti na Nona vakalesuiya na Turaga na idola ni veivauci vei Josefa Simici, a qai tekivu na cakacaka ni veivakabulai ena yasana ruarua ni lati ena tabagauna oqo (raica na 1 Korinica 15:22, 29; Vunau kei na Veiyalayalati 128:8–18).

Vakavulica o peresitedi Boyd K. Packer ni na “veika duadua a yaco oqo e sega ni yadrava o vuravurta, ia na kena veivakayarayarataki ena vanua e yaco kina, ki na vei yalo yadua era sa bula mai kei ira na sebera mai. Sa tekivu me yaco vakamalua na veika oqo. Na Lotu e sa laki yaco me lotu e dau tara valetabu.

“Era babasika e vuravura ike, ikea, ka nanumi kina ni yaco tiko ka sega ni namaki, o ira na tamata, mataisoqosoqo kei na vanua era malele mai ena kena vakasaqarai na nodra kawa. Na veika kece oqo e tekivu ga mai na gauna e rairai mai kina o Ilaitia ki na Valetabu e Kirtland” (The Holy Temple [1980], 141).

“Mai na siga oya, ena ika 3 ni Epereli, 1836, e tekivu vuki na yalodra na gone ki vei ira na nodra qase. Mai ikea na cakacaka vakalotu sa sega ni vagauna ga, ia sa veigauna kece sara. Na kaukauwa ni veivauci e tiko vei keda. E sega tale ni dua na dodonu e sivita na kena talei. Na kaukauwa oqo e solia na titobu kei na dei tawamudu vei ira kece na cakacaka vakalotu e vakayacora ena lewa dodonu vei ira na bula tiko kei ira era sa mate” (Preparing to Enter the Holy Temple [2002], 28).

Kemuni na taciqu kei na ganequ,na kena tara kei na vakayagataki vakamatau ni valetabu e dua na ivakatakilakila ni dua na vei tabagauna kece ni dina na Lotu i Jisu Karisito. Ni oti na vakatabui ni Valetabu e Salt Lake ena 1893, a vakauqeti ira na lewenilotu o Peresitedi Wilford Woodruff me ra vakasaqara na ivolatukutuku ni nodra kawa ka volaitukutukutaka na nodra kawa na kena levu e rawa me ra cakava, me rawa ni ra kau mai na yaca qo ena valetabu me vakayacori kina na nodra cakacaka vakalotu ni veivakabulai kei na bula vakacerecerei (raica na Teachings of Presidents of the Church: Wilford Woodruff [2004], 174).

Oti e dua na yabaki (1894), na parofita o Peresitedi Woodruff a liutaka na tauyavutaki ni Geneological Society e Utah. Oti e dua na drau na yabaki, ena 1994, o Elder Russell M. Nelson a lewe tiko ni kuoramu Le Tinikarua ena gauna oya, a tukuna, “Na veika a yaco ena yabaki kilai levu oya a tauyavutaka na vakadidike ni tuva kawa kei na veiqaravi ena valetabu me dua ga na cakacaka ena Lotu” (“The Spirit of Elijah,” Ensign, Nov. 1994, 85).

Kemuni na taciqu kei na ganequ, e vakauqeti keda na Turaga ni da lewe ni Nona Lotu me da maroroya na itukutuku ni noda vuvale, me da vuli mai vei ira na noda qase, ka tuva vinaka na gagadre yadua mera ciqoma kina na cakacaka vakalotu ni kosipeli ena valetabu mera vukei ena nodra sasaga ki na sala ni veiyalayalatati, ena yaco me ra vakalougatataki kina kei na vuvale me tawamudu. Oqo sa i usutu duadua ni yavu nei Tamada Vakalomalagi; nodra sema na vuvale ena bula oqo kei na bula tawamudu.

Vei kemuni yadua o ni sega ni nanuma ni o rawa ni cakava na cakacaka oqo, mo kila ni o sega ni vakila duadua tiko. E rawa me da raica na gacagaca e vakarautaka na Lotu koya e kune ena valenivolavola ni VakasaqaraVuvale, edau kilai taumada me valenivolavola ni tuva kawa. Na Valenivolavola ni VakasaqaraVuvale e vakarautaki me rawa ni lako kina e dua ga e gadreva, ena soli na veivuke lalai me rawa ni kune kina na itukutuku ni nona qase e liu ka tuva vinaka me rawa ni kau ki na valetabu. Kerekere ni veitaratara kei na dauniveivakasalataki ni tuva kawa ena nomu tabanalevu se tabana, o koya na veidusimaki vei iko ena veikalawa yadua.

Ni da muria tiko na veidusimaki ni parofita ka vulica na sala ni tuva kawa kei na kena cakacakataki vakalotu ena valetabu, eda na vakila e dua na marau vakaitamera ni da na sega ni via muduka rawa kina. Ena luvuci na yaloda ena Yalotabu, vakayadrata na noda vakanananu me da vakayacora, ka dusimaki keda ena noda vakasaqarai ira na yaca ni noda qase eliu. Ia me da nanuma ni tuva kawa e sega walega ni kena vakasaqarai na yaca, tikinisiga, kei na vanua. Na tuva kawa e semavata na vuvale kei na vakilai ni marau e dau yaco ni da vakayacora ena vukudra na cakacaka vakalotu ni kosipeli.

Au taleitaka na veivakavulici vakauqeti ni noda parofita lomani, o Peresitedi Russell M. Nelson, e kaya o koya, “Na valetabu sai usutu tiko ni vakaukauwataki ni noda vakabauta kei na qaqaco vakayalo baleta na iVakabula kei na Nona ivunau sa uto tiko ni valetabu. Na veivakavulici kece e valetabu, mai na ivakasala kei na Yalo, e vakalevutaka na noda kilai Jisu Karisito vinaka. Na Nona cakacaka vakalotu bibi sa vauci keda Vua ena veiyalayalati tabu ni matabete. Ia, ni da maroroya na noda veiyalayalati, sa solia vei keda na Nona kaukauwa veivakabulai, veivaqaqacotaki. (“Na Valetabu kei na Nomu Yavu Vakayalo,” Liaona, Nove. 2021, 93).

E rawa kina ni da tukuna, na cakacaka ni valetabu kei na tuva kawa e dua vata ga na cakacaka.

Au vakadinadinataka na dina oqo. Au kila ni Lotu ni Turaga o Jisu Karisito, noda i Vakabula ka Dauveivueti, o Koya eda vakananuma ka rokova ena Siga Tabu ni Mate. Au kila ni lomani keda, ni da maroroya na noda veiyalayalati ka nuitaki Koya, ena solia o Koya na Nona veivakabulai kaukauwa veivaqaqacotaki. Ena yacai Jisu Karisito, emeni.