Nuitaka Tiko na iVakavuvuli i Karisito

Ena rai ni noqu vakasama, au raica na parofita o Nifai ena nona desi ia sa qase sara, na peleti koula e dabe toka e matana, kei na peni e ligana.

Me iotioti tiko ni nona ceuta o Nifai ena ivolatukutuku. A vola o koya, “Ia oqo, oi kemudou na wekaqu lomani, au sa tinia mada eke na noqu vosa.”¹ Ni oti ga oya, a vakauqeti Nifai na Yalotabu me lesuva na ivolatukutuku ka vola e dua na itinitini ni vosa. Ena veidusimaki mana ni Yalo Tabu, a taura o Nifai na nona peni ena ligana ka vola, “Ia, sa rauta na ka au sa vola, ka vakavo e vica walega na vosa … meu tukuna me baleta na ivakavuvuli i Karisito.”²

Na noqu vakavinavinaka tawamudu vei ira na “vica na vosa”³kei na veivakauqeti ni Yalotabu vei Nifai me vola. Na ivakarau ni nona tuva o Nifai na ivolatukutukutaki ni vakavuvuli i Karisito e isolisoli bibi vei ira era kana magiti kina. Okati kina na raivotu ni nona papitaiso⁴ na iVakabula kei na domona na Luvena, ni veisureti vei keda kece meda muri Koya⁵ ka “[meda] kitaka na ka dou sa raica sa kitaka [ko Koya].”⁶ Okati kina na vakadinadina i Nifai vei ira na vakabauti Karisito, veivutunitaka na nodra cakacala ena yalodina ka muria na iVakabula ena wai ni papitaiso ena “qai soli vei kemudou na Yalo Tabu; io, dou na qai papitaisotaki ena bukawaqa kei na Yalo Tabu.”⁷ Eda volaitukutukutaka na domoi Tamada ni sa kaya: “Sa mana ka dina na vosa i Koya na noqu Daulomani. Ko koya sa vosota me yacova na ivakataotioti, ena vakabulai.”⁸

A vakamatatataka o Peresitedi Russell M. Nelson na kena bibi duadua na ivunau i Karisito ena dua na nona vosa vei ira na liuliu ni daukaulotu vou: “Bibi duadua, eda vinakata na noda daukaulotu … me ceuti e lomadra na ivunau i Karisito—ka va wakana ena loma ni nodra sui.”⁹

E sokumuna na Vunautaka Noqu Kosipeli e lima na tikina bibi ni ivuna i Karisito. E tukuni kina “[Meda] sureti ira na tamata kecega me ra lako mai vei Karisito ena nodra vukei ira me ra ciqoma na kosipeli vakalesui mai ena nodra vakabauti Jisu Karisito kei na Nona Veisorovaki, ka veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti.”¹⁰

Ia na kena bibi ni vakavuvuli Karisito e sega ni vakatabakidua ga vei ira na daukaulotu! Ka e bibi sara mai na ivakamacala bibi e dau cavu qaqataki na lima na tikina. E umani kina na lawa ni kosipeli. Sai koya na ituvatuva cecere ni bula tawamudu.

Kevaka me da ciqoma na nona veisureti o Peresitedi Nelson me vawakana na ivunau i Karisito ena loma ni noda sui, e dodonu meda vakayacora vakakina ena noda vulica, vakasamataka, ka vakabauta. E dodonu meda sureta na Yalo Tabu me ceuta na ivakavuvuli i Karisito ena “dela ni [yaloda] sa malumu”¹¹ me titobu ka tawamudu me vaka na kena ceuti mai vei Nifai ena peleti koula.

Ena Okotova sa oti, a taroga o Peresitedi Nelson, “Na cava na ibalebale me vakamalumalumutaki o vuravura?” Tukuna o koya, “E kena ibalebale na vakararavi vakalevu cake ki na ivunau i Karisito mai na vakararavi ki na vuku ni tamata.”¹²

Na vosa na vakararavi e sa vakadewataki ni “vakararavi dei ki na ivakarau, veika e rawati, kaukauwa, se dina vua e dua se dua na ka.”¹³ Na ka o ya o Jisu Karisito, kei na ka tale o ya na Nona ivunau.

E rawa ni veisautaka vakacava na vakararavi vakagumatua ena ivunau i Karisito?

Kevaka me da vakararavi ki na ivunau i Karisito, eda na niutaki Karisito ena noda bulataka taucoko na Nona vosa.¹⁴ Eda na vakayacora na vulika baleti Jisu Karisito me ivakarau ni noda bula taucoko,¹⁵ Nona veiqaravi kei na Nona Veisorovaki tawamudu. Eda na vulica na Nona iyalayala kei na ituvaki cava e dau yaco kina na Nona iyalayala.¹⁶ Ni da vuli, eda na vakasinaiti me da lomana vakalevu cake na Turaga.

Kevaka eda vakararavi ena ivunau i Karisito, eda na lako vua na Tamada vakalomalagi e veisiga ena yalo malumalumu, kei na masu lo, meda vakavinavinakataka Vua na isolisoli ni Luvena lei na noda veivakalougatataki.¹⁷ E rawa meda masu ka kerea na veitokoni veivakayarayarataki ni Yalo Tabu,¹⁸ me da vakadodonutaki keda Vua,¹⁹ ka railesuva na noda veiyalayalati kei na yalataka me da maroroya.²⁰ Eda rawa ni masu meda tokona ka vakaraitaka na noda loloma ka tokona na noda parofita, daurairai, ka dauvakatakila;²¹ ka masuta na kaukauwa mana ni veivosoti;²² kei na kaukauwa mo vorata na veitemaki.²³ Au sureti kemuni mo ni vakaliuca me tiki bibi ni nomuni bula na masu, ena nomu saga tiko e veisiga me vakavinakataki cake na nomuni veitaratara kei na Kalou.

Kevaka eda vakararavi ena vunau i Karisito, eda na biuta vakanatutu na kataremoremo kei vuravura me da vakanamata kina vua na iVakabula ni vuravura.²⁴ Ena vakarauta se biu laivi na gauna e vakasabusabutaki ena volamata; qito ena initaneti; na idre ni yau vakavuravura; kei na vuqa tale na itaviqaravi koya e solia na gauna ki na ivakarau lasu kei na vakasama sega ni kilikili vakatamata. E vu duadua ga mai vei Karisito na dina kei na veivakataucokotaki.

Na veivutuni ena yalo dina²⁵ ena tikini noda bula²⁶ ena yalomarau —meda na vosoti ena noda cakaca cala ka meda veisau me veiucui kei Karisito.²⁷ Na veivutuni ni yavutaki ena vakabauti Karisito ena vakatara me noda na Veisorovaki i Karisito. Vakavulica o Peresitedi Dallin H. Oaks ni gauna e veivosoti kina na iVakabula, e “levu tale na ka e vakayacora o Koya mai na vakasavasavataki ni valavala ca. E solia talega e dua na kaukauwa vou.”²⁸ Eda gadreva taucoko na kaukauwa oqo meda muria na ivunau ni Kalou ka yacova kina na inaki tawamudu ni noda bula.

Mai vei Jisu kei na Nona ivunau, eda kunea kina na kaukauwa. Tukuna o Koya, “E dina, e dina, au sa kaya vei kemudou, ni oqo na noqu ivakavuvuli ko ira yadua sa tara na nodra vale ena yavu oqo sa tara cake ena dela ni noqu vatu, ia ena sega ni rawati ira na matamata kei eli.”²⁹

Eda raica na vakayacori ni iyalayala oqo ena nodra bula na tamata vakabauta. Sa oti oqo rauta ni dua na yabaki sa oti mai na gauna au a sotavi Travis kei Kacie. Erau a vakamau vakamatanitu ena 2007. Ena gauna oya, se sega ni se lewe ni lotu o Travis. E dina, ni a susugi cake mai o Kacie, ena dua na vuvale lotu, Yalododonu Edaidai, e sa ciri tani mai na nona vakabauta ni sagoneyalewa ka yawaki koya tani mai na nona yavu.

Ena yabaki 2018, sotavi rau na daukaulotu o Travis, ka papitaiso sara ena 2019. O Travis sa vaka e dua na daukaulotu vei Kacie, koya a lakocuruma e dua na veisau me saumaki mai. Erau a vauci ena Valetabu mai Salt Lake ena Sepiteba ni 2020. Ni oti e rua na yabaki na nona papitaiso, a kacivi o Travis me veiqaravi ena matabisopi.

E tiko vei Travis e dua na mate dredre me kune, koya e vakavuna me cokovata na tiuma ena tiki bibi ni yagona e loma. Sa vuqa na veisele e vakayacori vua me kauta tani na kumukumuni ni tiuma e dau yaco tiko, ia e sega ga ni vakabulai rawa na mate qo. Vica na yabaki sa oti, a tukuni vei Travis ni lailai mai na 10 na yabaki e vo vua me bula.

Kacie e tauvi koya na retinitis pigmentosa, e dua na mate kune dredre koya e vakavuna me rabalailai tiko ga mai na veika e raica me yacova sara ni sa mataboko.

E tukuna vei au na nona bula. E nanamaki o koya ni dua na gauna, sega ni dede, e sa na dawai, mataboko ka sega na veivuke vakailavo, ka susuga duadua e 4 na gone. Au tarogi koya e tauri koya tiko vakacava ni kila ni ituvaki ni nona siga ni mataka? E matadredredre ka kaya ena vakacegu, “Se sega vakadua meu kune marau se me vakalevutaki na noqu inuinui ena noqu bula me vakataka oqo. Keirau tautauri matua tiko ki na iyalayala keirau ciqoma ena valetabu.”

O Travis e sa bisopi tiko nikua. Vula rua sa oti, e vakayacori tale vua e dua na veisele. E nuidei tiko ka kune vakacegu o koya. Sa ca saratiko mai na nona rai o Kacie. Na gauna oqo e sa lako vata tiko kei dua na koli dau veiqaravi vei ira na mataboko ka sega ni rawa me draiva. Ia e dei tiko, susugi ira tiko na luvena, veiqaravi tiko vaka daunivakasala ni Goneyalewa.

E rau tara tiko o Travis kei Kacie na nodrau vale ena dela ni vatu. E rau vakararavi ena ivunau kei Karisito kei na iyalayala ni Kalou ena “vakatabuya ko koya na [noda] rarawa [me da] rawata kina na vinaka.”³⁰ Ena iutvatuva uasivi ni Kalou, na noda sotava tiko rarawa e semati ki na bula dodonu tawacala vei Karisito.³¹ Me vaka na tamata vuku ena vosa vakaibalebale koya e tara na nona vale ena dela ni vatu,³²ni taubi mai na uca, ka waluvu mai na vanua, ka liwa kaukauwa na cagi, ka ravuta na vale erau tara o Travis kei Kacie, e na sega ni lutu, baleta ni tara ena dela ni vatu.³³

Sega ni vosa o Jisu ena kevaka e yaco na taubi ni uca kei na waluvu kei na cagi ena noda bula; e vosa tiko o Koya ni na yaco vakaidina na tubucake ni cagilaba. Na isutu ni vosa vakaibalebale oqo e sega ni yaco vakacava na cagilaba ia na noda ivakarau ni noda sauma lesu na Nona veisureti o Koya me da rogoca ka cakava na veika e vakavulica.³⁴ E sega ni dua tale na sala dodonu me da bula kina.

Ni da tara oti na noda vale ena yavu ni sema vakaveiyalayalati kei Karisito, eda sa vakararavi tiko ena vunau i Karisito kei na iyalayala ni bula tawamudu. Na tamata era nujtaka na ivakavuvuli i Karisito era toso tikoga ki liu ena yalodina vei Karisito ka vosota me yacova na ivakataotioti. E sa sega sara e dua tale na sala “me [da] vakabulai kina na tamata ki na matanitu ni Kalou.”³⁵

Au vakadinadinataka ni dina ka bula tiko o Jisu Karisito ka sa vakaturi cake tale mai na mate. Au vakadinadinataka ni lomana na vuravura na Kalou ni tala mai na Luvena me vueti keda mai na ca³⁵ ka vakabulai keda mai na rarawa.³⁶ Au vakadinadinataka ni sa kaciva o Koya na parofita ni Kalou ena gauna oqo, o Peresitedi Russell M. Nelson me veivosaki kina ka me liutaki keda. .

Ena vuniyaloqu mai loma, au sureti kemuni mo ni vakararavi kina ivunau i Karisito ka taracake na nomuni bula ena yavu ni Dauveivueti. Ena sega ni laivi iko o Koya. Ena yacai Jisu Karisito, emeni.