Sa Rawa Vua Me Vakabulai Au!

Sa yalataka o Moronai ni kevaka eda wilika na iVola i Momani ka kerea na Kalou na Tamada Tawamudu, ena yalodina, ena lomamudou taucoko, ka vakabauta na Karisito ke sa dina, ena vakaraitaka na Kalou ena kaukauwa ni Yalo Tabu ni dina.¹ Milioni na tamata era vakayacora na yalayala ka ciqoma na ivakadinadina veivakadeitaki ni Vakalesui Mai ni taucoko ni kosipeli i Jisu Karisito.

E vauqeti keda o Moronai, meda wilika na iVola i Momani, ka “nanuma nona loloma na Turaga vei ira na luve ni tamata, mai na buli i Atama ka yacova sara mai na gauna [qo], … ka [vaka] nanuma sara e lomada.”² Na italanoa kei na ivakavuvuli ena iVola i Momani e vakananumi keda ka vakadinadinataka na loloma ni iVakabula, na yalololoma, kei na loloma veivueti.

Mai takali o tamaqu ena Epereli 2013. Niu vakavakarau meu vosa ena nona lotu ni veibulu, au vakila niu kalougata meu kila ka taleitaka na nona tiki ni ivolanikalou talei. A wasea o koya ena soqoni ni matavuvale, e dau wilika vata kei au niu dau gadreva na ivakasala, veidusimaki, se vaqaqacotaki ni noqu vakabauta. Au dau rogoci koya ni wasea ena vosa kei na ilesilesi. Au sega walega ni kilai ira, ia au se nanuma tiko na rorogo ni domona kei na vakila vakayalo e dau noqu ni dau wasei ira. Mai na kena wasei na ivolanikalou kei na vakila, sa vukei au o tamaqu meu yavutaki ena dua na yavu dei ni vakabauta na Turaga o Jisu Karisito.

E lomana vakabibi o tamaqu na itukutuku ni nona veisiko na iVakabula vei ira na tamata i Nifai.³ Oqo na itukutuku tabu ni tucaketale kei na bula vakalou ni Turaga o Jisu Karisito. Sa gunuva o Koya na bilo ni cudru ka vosota na ka kece ga meda kua ni rarawa kevaka eda na veivutuni.⁴ A sikova na vuravura ni yalo ka tauyavutaka na vunautaki ni kosipeli e kea.⁵ Sa tucake tale mai na mate, ka tiko o Koya kei ira ka ciqoma na ivunau mai vei Tamata me wasea na ivolanikalou kei ira na Nifai ka vakalougatataki na itabatamata e muri.⁶ E vakacerecerei o Koya ka sa tu Vua na Nona kaukauwa kei na igunirawata tawamudu. Eda rawa ni vuli mai na veika lalai ni Nona ivakavuvuli.

Ena 3 Nifai 11, eda wilika se vakacava na siro mai lomalagi na iVakabula me mai vakavulici ira na Nifaiti ni sai Koya o Jisu Karisito, era parofisaitaka na parofita nina lako mai ivuravura. A tukutukutaka O Koya ni sai Koya na Rarama kei Vuravura ka sa vakalagilagi na Tamada ni kauta na ivalavala ca kei vuravura. A sureti ira na tamata o Koya mera lako mai ka daramaka na ligadra kina sarisarina ka tara tale ga na we ni vako ena Ligana kei na Yavana. A vinakata o Koya mera kila ni sai Koya na Kalou ni Isireli ka vakamatei ena vuku ni ivalavala ca kei vuravura. Era yavala ena reki na tamata, ka lako yadudua yani me yacova ni ra sa raica kecega ka vakila ni sai Koya dina, ka volavola kina o ira na parofita mena lako mai.⁷

A vakatavulici ira na Nifaiti o Jisu baleta na bibi ni veivutuni, meda vakataki ira na gone lalai, kei na gadrevi ni papitaisotaki vua e dua ka tu vua na Nona lewa. A qai vakavulica o Koya e levu na ivakavuvuli eda vulica tiko ena yabaki oqo mai na Veiyalayalati Vou.

Ena 3 Nifai 17, eda wilika kina ni tukuna o Jisu vei ira na tamata ni sa kena gauna me lako o Koya vua na Tamada ka vakaraitaki Koya talega vei ira na yavusa i Isireli era sa yali tu. Ni rai yani o Koya vei ira na lewevuqa, a raica ni ra sa tagi, ka raici Koya matua tiko me vaka era na kerei Koya me ra tiko vakabalavu.⁹

Na nona sauma na iVakabula vei ira na Nifai e veivakauqeti ka veivakavulici. Ka sa kaya vei ira, “Raica, sa vakasinaiti na lomaqu ena yalololoma vei kemuni.”¹⁰

Au vakabauta ni Nona yalololoma e sega walega ni isau ni wainimatadra na tamata. E vaka me rawa ni raici ira mai na mata ni Nona isoro ni veivakaduavatataki. A raica na nodra mosi, rarawa, kei na veitemaki kecega. A raica na nodra tauvimate. A raica na nodra malumalumu, ka kila mai na Nona voraki ni rarawa mai Kecisemani kei Kolikoca na sala me vukei ira kina me vaka na nodra malumalumu.¹¹

Sa vakakina, ni sa raici keda tiko na noda iVakabula, o Jisu Karisito, sa raica ka kila vakavinaka o Koya na mosi kei na icolacola ni noda ivalavala ca. E raica na noda vakatotogani kei na bolebole eso. E raica o Koya na noda bolebole kei na vakararawataki ena mataqali cava ga—ka sa vakasinaiti o Koya ena yalololoma vei keda.

A Nona veisureti loloma vei ira na Nifai a muria ena vosa: “Sa dua li vei kemudou sa tauvimate? Moni kauti ira mai. Sa tiko li eso era sa lokiloki, na mataboko, na gera, na mudu, na vukavuka, ko ira sa malai, ko ira na didivara kei ira kecega sa tauvimate tu? Dou kauti ira mai kau na vakabulai ira, niu sa lomani kemudou; io sa vuabale sara na noqu loloma.”¹²

Ka ra sa lako mai na tamata “era sa na veimataqali mate kecega; a sa vakabulai ira kedega ko koya, ni ra sa kau yani vua.”¹³

Ena 1990 keitou a tiko mai na tauni lailai e Sale, mai Victoria, e Ositerelia. Keitou marau vakamatavuvale, Lotu, kei na cakacaka. Ena dua na Vakarauwai totoka ena vulai katakata ni bera vakalailai na Kirisimasi, keitou nanuma me keitou gade ki na so na raranigade kei na dua na baravi talei. Ni oti na marau ni dua na siga totoka ni qito vakamatavuvale, keitou vodo kece ena motoka ka lesu ivale. Niu draiva tiko, au moce vakalailai ka vakavuna e dua na coqa. Ni oti vakalailai ni noqu kilai yaloqu mai, au veiraiyaki ena motoka. Na watiqu, o Maxine, e ramusu vakaca na yavana ka dredre me cegu. E ramusu na sui ni loma ni serena. Eratou lecaika neirau goneyalewa tolutolu ia e vinaka ni ratou rairai ituvaki vinaka. A vica na noqu mavoa lalai. Ia na luvei keirau vula lima e sega ni vakilai koya.

Ena loma ni lomaocaoca kei na veilecayaki ni vakacalaka oya, a kaya vakatotolo sara na luvei keirau yalewa qase duadua, o Kate yabaki 11, “Ta, o gadreva mo solia vei Jeromi e dua na veivakalougatataki.” Ni oti na sasaga vakalailai, keitou a rawa ni biuta na motoka kei ratou na neirau goneyalewa. E sega ni rawa ni yavala o Maxine. Au kauti Jeromi vakamalua mai; au davo vakanadaku, au vakadavori koya vakamalua e serequ au solia vua e dua na veivakalougatataki ni matabete. Ni qai yaco mai na lori ni valenibula ni oti vakalailai e 40 na miniti, sa sega ni vakilai koya o Jeromi.

Ena bogi oya, au laivi ratou e lewe tolu na lewe ni noqu matavuvale e valenibula au gole galugalu kei lewe tolu na luvequ yalewa ivale. Ena loma ni bogi balavu oya, au masuta na Tamada Vakalomalagi me vinaka na neitou matavuvale kei iratou na mavoa ena motoka kadua. Ena loloma levu, na noqu masu kei ira ka cabo ena yalogu mai vei ira e lewevuqa a saumi vinaka. Era vueti taucoko va gauna, e dua na veivakalougatataki levu ka loloma uasivi.

Ia, au vakila ni ora voli na lomaqu kei na lomabibi baleta na noqu vakavuna e dua na vakacalaka rerevaki. Au dau yadra ena bogi ka vakananauma na ka vakadomobula a yaco. Au sagadredre tu mai ena vica vata na yabaki meu kunea na vakacegu ka vosoti au. Ka, me vaka niu liuliu vakamatabete, qai yaco ena noqu vukei ira tiko na tani mera veivutuni ka vukei ira mera vakila na yalololoma, na lomavinaka, kei na loloma ni noda iVakabula, au kidava ni rawa ni vueti au o Koya.

Na kaukauwa ni iVakabula me vakabula ka vueta e kovuta na cala vakacalaka, na vakatulewa malumalumu, na bolebole, kei na veivakatovolei cava ga—vata kei na noda ivalavala ca. Niu vuki Vua, na noqu vakila na ora kei na lomabibi sa vakaisosomitaki malua ena vakacegu kei na logavinaka.

E vakatavulica o Peresitedi Nelson: “Na nona veisorovaki na iVakabula ena vuku ni kawatamata, a dolava kina o Koya e dua na sala me ra rawata na kaukauwa ni veivakabulai, veivakaukauwataki, kei na veivueti vei ira kece era muri Koya. Na veika yaga vakayalo oqo e vakarautaki tu vei ira kece era segata mera rogoci Koya ka muri Koya.”¹⁴

Kemuni na taciqu kei na ganequ, se o kauta tiko na icolacola ni ca sega ni wali, se o kukuva tu e dua na cala vei iko ena dua na gauna balavu, se o kunedredre tiko mo vosoti iko baleta e dua na cala vakacalaka, sa nomu mo taura na kaukauuwa ni veivakabulai kei na veivueti ni iVakabula ko Jisu Karisito.

Au kila ni bula tiko o Koya. O Koya na noda iVakabula ka Dauveivueti. E lomani keda. E dau yalololoma vei keda o Koya, e vakasinaiti tu ena loloma soliwale, ka rawa ni vakabulai iko o Koya. Ena yacai Jisu Karisito, emeni.