O Kila Li Na Vuna Au Vakabauti Karisito Niu Lotu Vakarisito?

Ena dua na yakavi ni oti mai na cakacaka, eso na yabaki sa oti, au a vodo ena noqu basi ki vale mai New Jersey ki na Koro ko Niu Ioka. Na marama au dabe tikiva a raica na ka au vola tiko ena noqu komupiuta ka taroga mai, “Ko vakabauti … Karisito?” Au tukuna yani, ‘Io, e vakakina.’ Ni keirau veitalanoa tiko, au vulica ni se qai toki ga mai e kea mai na nona vanua totoka e Esia me mai cakacaka e Niu Ioka ena vanua veiqatitaki vakalevu ena tekinoloji ni itukutuku.

Au mani tarogi lewa, “O kila li na vuna oi au niu vaKarisito au vakabauti Jisu Karisito”? A sauma talega mai vakamalua ka sureti au meu tukuna vua. Ia niu vakarau sauma, au tu ena dua na gauna e luvuci na noda mona ena vuqa na vakasama. Oqo na imatai ni gauna meu vakamacalataka kina na vuna na ituvaki vaKarisito vua e dua ka sega sara ga ni kila ka vuli vinaka sara. Au sega ni rawa ni kaya walega, “Au muri Jisu Karisito baleta ni a yalorawarawa Ko koya me rarawa ka mate ena vuku ni noqu ivalavala ca.” Ena rairai nanuma okoya, “Na cava me mate kina o Jisu? E sega ni rawa ni vosata walega na Kalou ka savai keda eda kerei Koya me cakava?”

Ko na sauma vakacava oya ena vica na miniti? Ko na vakamacalataka beka vakacava na ka oqo vua e dua na itokani? Oi kemuni na gone kei na itabagone; e rawa ni o ni tarogi ira na nomuni itubutubu se iliuliu e muri, “Na cava na vuna e mate kina o Jisu?” Kemuni na taciqu kei na ganequ, au via vakatusa: ni veika kece au kila me baleta na ivakavuvuli ni Lotu, itukutuku makawa, lawatu, kei na veika tale eso, na isau ni uto ni taro oqo ena noda vakabauta e sega ni lako rawarawa mai. Na siga oya,au sa lewa meu raimatua cake ki na veika bibi sara ki na bula tawamudu.

Ia, au tukuna vei noqu itokani vou¹ ni tiko vei keda e dua na yalo me ikuri ni dua na yago ka sa Tama ni yaloda na Kalou.² Au tukuna vua ni da a bula vata kei na Tamada Vakalomalagi ni bera ni da sucu mai ki na vuravura oqo.³ Baleta o Koya ni lomani koya ka vaka kina ko ira kece na Luvena, e cakava o Koya e dua na ituvatuva meda taura e dua na yago me ucuya na Yagona vakalagilagi,⁴ meda tiki ni dua na matavuvale,⁵k a lesu ki na Nona iserau loloma me marautaka na bula tawamudu vata kei na noda matavuvale,⁶ me vakai Koya kei na Nona.⁷ Ia, au kaya, eda na sotava e rua na veivakataotaki levu ena vuravura lutu gadrevi oqo:⁸ (1) mate vakayago—na tawasei ni yagoda mai na yaloda. E dina sara, e kila o koya ni da na mate kece. Kei na (2) mate vakayalo—na noda tawasei tani mai vua na Kalou baleta na noda ivalavala ca, cakacala, kei na malumalumu vakayago e vakayawaki keda mai na Nona iserau tabu.⁹ E sema talega o koya ki na ka oqo.

Au tukuna vua ni oqo e dua na revurevu ni lawa ni lewa dodonu. Na lawa tawamudu oqo e gadrevi kina me saumi e dua na itotogi tawamudu me saumi ena vuku ni noda ivalavala ca yadua se voroka na lawa se dina ni Kalou, se eda na sega ni rawa ni lesu tale me da bula ena Nona iserau.¹⁰ Ena sega ni dodonu, ka “sega ni rawa vua na Kalou me cakitaka na lewa dodonu.”¹¹ E kilamatata oqo o koya ia e ciqoma rawarawa ni Kalou e lomavinaka vakalevu, loloma, ka yalogu me kauta mai na noda bula tawamudu.¹² Au tukuna vua na noqu itokani ni rawa vei keda me noda e dua na meca lawaki dredre, ka kaukauwa—na ivurevure ni ca kei na lasu—me saqati keda.¹³ Ia, e dua ka tu vua na kaukauwa vakalou tawayalani me ulabaleta na veisaqasaqa kei na veivakataotaki ena gadrevi me vakabulai keda.¹⁴

Au qai wasea vua na itukutuku vinaka—ni “ituktuku vinaka mo dou reki vakalevu kina kei ira kecega na tamata”¹⁵—ka “Ni sa lomani ira na kai vuravura na Kalou, me solia kina na Luvena e dua bauga sa vakatubura, me kakua ni rusa ko ira yadua sa vakabauti koya, me ra rawata ga na bula tawamudu.”¹⁶ Au a vakadinadinataka vua na noqu itokani, kau vakadinata vei kemuni, ni o Jisu Karisito e iVakabula oya, ni a dodonu me vakararawataki, mate, ka tucake tale—na Nona Veisorovaki tawavakaiyalayala me na—vueti ira na kawatamata mai na mate vakayago¹⁷ ka me solia na bula tawamudu vata kei na Kalou kei na noda matavuvale¹⁸ kivei ira kece era na muri Koya. E tukuna na iVola i Momani, “Sa vakakina na Kalou a qaqa ena mate; ka solia vua na Luvena na kaukauwa me vakamamasu ena vukudra na luve ni tamata; sa vakasinaiti ena [loloma cecere kei na] yalololoma; ni sa voroka na ivau ni mate, ka colata e lomana na nodra caka cala kei na nodra talaidredre, ni sa sereki ira, ka vakaceguya na gagadre ni lewa dodonu.”¹⁹

Na ikalawa eso ka vakatakila na Kalou e dodonu meda taura ni da muri Jisu ka ciqoma na bula tawamudu e vakatokai na ivakavuvuli i Karisito. Era oka kina na “vakabauti Jisu Karisito, ke na Nona Veisorovaki, veivutuni, papitaiso [ki na lotu i Jisu Karisito ni Yalo Dodonu Edaidai], ciqoma na isolisoli ni Yalo Tabu, ka vosota me yacova na ivakataotioti.”²⁰ Au wasea na veikalawa oqo kei na noqu itokani, ia oqo eso na sala ka ra vakatavulica walega oqo na parofita kei na iapositolo na sala ka veivakalougatataki kina na ivakavuvuli i Karisito vei ira kece na Luvena na Kalou.

E vakasalataka o Peresitedi Russell M. Nelson: “Sa kaukauwa sara na ivunau savasava i Karisito. E veisautaka na bula ni tamata yadua e kila vinaka ka vakasaqara me tekivutaka ena nona bula.”²¹

E vakavulica o Elder Dieter F. Uchtdorf, “[Na idusidusi] ni Me iSakisaki ni iTabagone e dua na ivakavuvuli matata i Karisito [ka] sureti iko na [itabagone] mo ni vakayaco digidigi e yavutaki mai [kina].”²²

E vakavulica o Elder Dale G. Renlund, “Keitou sureti ira na daukaulotu mera vakayacora na veika era kerei ira kina era vakavulica mera cakava: bulataka na ivakavuvuli i Karisito ena nodra bula [ka] lakova yani ka tikoga nea salatu ni veiyalayalati.”²³

Na ivunau i Karisito e vakaukauwataki ira era kunedredre tiko se vakila ni ra sega ni lewe ni Lotu baleta ni vukei ira, me vaka e kaya o Elder D. Todd Christofferson, “e vakadeitaka: A mate o Jisu Karisito ena vukuqu [ka] lomani au.”²⁴

Kemuni na itubutubu, kevaka e dredre tiko vei luvemu e dua na ivakavuvuli vakosipeli se ivakavuvuli vakaparofita, yalovinaka vorata na veimataqali vosa ca²⁵ se yavavala ena vuku ni Lotu se ki vei ira na kena iliuliu. Nai tovo, vakavuravura oqo era rawa ni vakaleqa na yalodina nei luvemu.²⁶ E vinaka vei iko ni ko via taqomaka se tovaka na luvemu talei se mo vakaraitaka na ivakatakilakila ni duavata vua. Ia koi au kei na watiqu, ko Jayne, keirau kila mai na veika sotavi yadua ni vakatavulici ni luvemu lomani ena vuna e gadrevi vakabibi kina o Jisu Karisito kei na bulataki na Nona ivakavuvuli ni marau ena veivaqaqacotaki ka vakabulai koya. Meda vagolei ira vei Jisu, o koya na nodra dautataro dina vua na Tamada. E vakavulica na iApositolo o Joni, “O koya yadua sa muria na ivakavuvuli i Karisito sa tu ruarua vei Tamana kei na Luvena.” Sa qai vakaroti keda meda qarauna “kevaka e dua sa lako mai vei kemudou, ka sega ni kauta mai na ivakavuvuli oqo.”²⁷

Keirau a sikova wale tikoga oqo kei Jayne na lekutu ka taura cake kina o Mosese e dua na gata parasa e matadra na luvei Isireli era sa lako tu. Sa yalataka tu na Turaga me na vakabulai ira kece era a kati ira na gata batigaga kevaka era na raica ga.²⁸ Ena nona taura cake na ivunau i Karisito e matada, sa cakava tiko vakakina na parofita ni Turaga, “me vakabulai ira na veimatanitu.”²⁹ Se cava ga na ikati se gaga se kunedredre eda sotava ena lekutu vakayago oqo, me da kakua ni vakataki ira, ena gauna makawa kei na gauna oqo, a rawa ni ra vakabulai ia, e seva, “era sega ni raica ni ra sa sega ni vakabauta ni na vakabulai ira.”³⁰ E vakadeitaka na iVola i Momani: “Raica, oqo na sala; ka sa sega tale e dua na sala se na yaca sa soli e rukui lomalagi me ra vakabulai kina na tamata ki na matanitu ni Kalou oqo. Ia oqo, raica, oqo na ivakavuvuli i Karisito.”³¹

Na yakavi oya mai New Jersey, na wasei ni noda gadrevi Jisu Kartisito kei na Nona ivakavuvuli e solia vei au e dua na ganequ kei na tacina vou. Keitou vakila na ivakadinadina vakacegu, ka veivakadeitaki ni Yalo Tabu. Au mani sureti koya me solia na nona sala ni veitaratara ka me tomana na veitalanoa kei rau na daukaulotu. A marau o koya me kitaka vakakina.

“Ia sa ka bibi sara me vakatakilai na veika oqo vei ira na lewei vuravura,” e tukuna na iVola i Momani—me da loloma, wasea ka sureta³² ni da vakasoqoni Isireli vata ki na noda itikotiko taucoko kei na noda matavuvale—“me ra kila kina ni sa sega na tamata sa tiko rawa ena iserau ni Kalou, ka vakavo ga ena vuku ni vinaka, kei na loloma cecere, kei na loloma [kei na ivakavuvuli] ni Mesaia Tabu.”³³ Ena yacai Jisu Karisito, emeni.