Nomu Veivakalougatataki Vakapeteriaki—Veidusimaki Veivakauqeti mai vei Tamada Vakalomalagi

Au a susugi mai vei rau na itubutubu talei ka rau a lomana ka vakavulica na luvedrau ena yalodina na kosipeli. Ka ni rarawa, e rau sotava tiko na dredre ena loma ni vica vata na yabaki ena nodrau vakamau na noqu itubutubu. Au a se dua na gone ena Lalai ni a mai tukuni vei au ni dua na siga rau sa na veisere ka keitou na digia o au kei iratou na taciqu se o cei vei rau me keitou na lai bula vata kaya. Ena dua na gauna balavu, au a sotava kina na nuiqawaqawa dina; ia, a qai veisautaka vei au na veika kece e dua na isolisoli mai vei Tamaqu Vakalomalagi—na noqu veivakalougatataki vakapeteriaki.

Ena yabaki 11, ni’u a leqataka vakalevu tiko na nodrau veimaliwai na noqu itubutubu, au a gadreva vakatitobu na noqu veivakalougatataki vakapeteriaki. Au a kila ni kilai au tu vakataucoko na Tamaqu ma Lomalagi kei na ituvaki saraga au tu kina. Au kila talega niu na ciqoma na veidusimaki mai Vua. Oti saraga nai ka 12 ni noqu siganisucu, au sa ciqoma noqu veivakalougatataki vakapeteriaki. Oya sa sivia qo e veimama na senitiuri sa oti, ia au se nanuma deivaki tu na gauna vakalou oya.

Ena vakavinavinaka, e sa tu vei keda na veidusimaki veivakauqeti me baleta na veivakalougatataki vakapeteriaki ena iVoladusidusi Rarabani Lotu:

“O ira kece na lewenilotu bula kilikili era sa papitaiso oti, sa rawa ni ciqoma e dua na veivakalougatataki vakapeteriaki, ka solia tu na veidusimaki veivakauqeti mai vua na Tamada Vakalomalagi.”

E dodonu me “tamata yalomatua na lewenilotu me kila vakavinaka kina na bibi kei na ituvaki tabu ni veivakalougatataki” ka “kila vakavinaka na yavu taumada ni ivakavuvuli ni kosipeli.”

“E dodonu me se gone toka na lewenilotu ka vuqa na vakatulewa bibi ni bula era se tu mai liu.” “E sega ni dodonu vei ira na iliuliu ni matabete me ra yalana e dua na yabaki ni bula vei ira na lewenilotu mera ciqoma na nodra veivakalougatataki vakapeteriaki.”

“Na veivakalougatataki vakapeteriaki yadua e ka tabu, maroroi, ka nona vakai koya na tamata oya.”

“Na tamata e ciqoma na veivakalougatataki vakapeteriaki me na vakamareqeta na kena veimalanivosa, vakasamataka vakatitobu, ka bula kilikili kaya me ciqoma kina na veivakalougatataki sa yalataki tu ena bula oqo kei na veigauna tawamudu.”¹

A sa dau vakatavulica vakaveitaravi o Peresitedi Russell M. Nelson me baleta na bibi ni dua na veivakalougatataki vakapeteriaki,² ka ni solia kivua yadua e ciqoma “na keda isema me yacovi iratou yani o Eparama, Aisake, kei Jekope”³ ka “sa ivolanikalou yadua kivei iko.”⁴

E levu sara na kena inaki vei au, na bibi ni noqu veivakalougatataki vakapeteriaki niu se gone kina. Taumada, e vukei au na noqu veivakalougatataki vakapeteriaki meu kila vakavinaka na noqu ivakatakilakila dina tawamudu—ocei dina o au kei na cava au na rawa niu yacova meu vakataka. A vukei au me kila, me vaka a vakavulica o Peresitedi Nelson, ni oi au e “dua na luve ni Kalou, e ” dua na [gone] ni veiyalayalati,” ka “dua na tisaipeli i Jisu Karisito.”⁵ Au vakila ni Rau kilai au ka lomani au na Tamaqu Vakalomalagi kei na noqu iVakabula ka Rau vakaitavi tiko ena noqu bula. E vukei au na veika oqo meu gadreva meu volekati Rau ka vakalevutaka na noqu vakabauta ka nuitaki Rau.

E dua na itokani lomani ka a lewena na Lotu vaka dua na itabagone qase cake a wasea: “Ena gauna a biuta kina o peteriaki na ligana e buradelaqu ka cavuta na yacaqu,a veisau na veika kece … sega ni gauna walega oya ia ena vo ni noqu bula. Au a vakila vakasauri ni—ena kaukauwa ka a vosa kina o koya—ni’u sa kilai tu vakavoleka sara ka vakatitobu. Na vosa a cavuta o koya a curuma na yagoqu taucoko. Au a kila ni Tamada Vakalomalagi e kilai au tu, mai loma ki tuba.”

Na noqu mai kilai au dina a vukei au me kila ka gadreva me’u cakava na veika a namaka tu vei au na Kalou.⁶

Oqo a muataki au meu vulica na veiyalayalati au a cakava kei na veivakalougatataki yalataki ena veiyalayalati ni Kalou kei Eparama.⁷ A solia vei au e dua na rai tawamudu ka vakauqeti au me maroroya vakalevu cake na noqu veiyalayalati.

Au a vulica vakawasoma na noqu veivakalougatataki vakapeteriaki, vakavuqa e veisiga, ka vukei au me vakila na veivakayarayarataki veivakacegui, veidusimaki ni Yalo Tabu, okoya a vukea me vakalailaitaka na noqu lomabibi ni’u muria voli Nona veivakauqeti. Oqo a vakalevutaka noqu gagadre me’u yavala me sureta na rarama, na dina, kei na Yalo Tabu meu vulica na noqu ivolanikalou ka masu e veisiga; ka tovolea meu yalodina ena vulici kei na vakamuri ni ivakavuvuli ni parofita kei na iapositolo ni Kalou. Na noqu veivakalougatataki vakapeteriaki a vukei au talega me’u gadreva me talairawarawa vakalevu cake ki na lomai Tamaqu Vakalomalagi, ka vukei au na vakanamata oqori me’u vakila na reki, ena dela ni noqu ituvaki veibolei eso.⁸

Au dau rawata na veivakaukauwataki vakayalo ena veigauna yadua au vulica kina noqu veivakalougatataki vakapeteriaki. Ena gauna rau qai veisere kina noqu itubutubu, na noqu veivakalougatataki vakapeteriaki, me vaka a vakavulica o Peresitedi Thomas S. Monson, a sa yaco me “dua na iyau talei vakamareqeti ka taleitaki sara,” dua saraga na “Liaona taukeni yadua.”⁹

Ia oqo, yalovinaka kakua ni nanuma cala. Au a sega ni vinaka sara. Au a cakava na veimataqali cala eso. Noqu dauniveivukeyaga tawamudu ena vakadeitaka ni se yaco tiko. Ia, na noqu veivakalougatataki vakapeteriaki a vukei au me’u gadreva me’u dau caka vinaka cake ka vinaka cake sara.¹⁰ Na vulici wasoma ni noqu veivakalougatataki vakapeteriaki a vakalevutaka noqu gagadre me’u vorata na veitemaki. A vukei au me’u gadreva ka yalodei tu me veivutuni, ka yaco kina na veivutuni me dua na ivakarau rekitaki vakalevu cake.

E a bibi sara vei au me’u ciqoma na noqu veivakalougatataki vakapeteriaki ni’u se gone ka ni se qai tubu tiko na noqu ivakadinadina. Au sa vakavinavinaka tawamudu ni ratou a kila na noqu itubutubu kei bisopi ni noqu gagadre a vakaraitaka ni’u sa vakarau tu.

Ni’u a se yabaki 12, na vuravura a se veilecayaki ka veivakasesei vakalailai sara mai na vuravura edaidai. E vakamacalataka na siga edaidai o Peresitedi Nelson me vaka “edua na gauna vereverea duadua ena itukutuku makawa kei vuravura,” e dua na vuravura ka “sinai tu ena ivalavala ca” ka dau “nanumi koya vakaikoya.”¹¹ E mai vinaka o ira noda itabagone edaidai era sa yalomatua cake mai vei au ni’u se yabaki 12, ka o ira talega e tu na vakatulewa bibi sara mera cakava ni ra se gone voli! Era gadreva talega mera kila se ocei dina o ira ka ni lomani ira tu na Kalou ka kilai ira vakavinaka sara!

Era na sega beka ni gadreva na tamata kece na nodra veivakalougatataki vakapeteriaki me vakai au. Au masuta ni ra na vakasaqara ena masumasu na lewenilotu era se sega ni ciqoma nodra veivakalougatataki vakapeteriaki mera kila na gauna era sa na tu vakarau kina. Au yalataka ni kevaka ko vakavakarau vakayalo, na nomu veika sotavi, me vaka na noqu, ena ka vakalou vei iko. Au masuta talega ni o ira era sa ciqoma oti nodra veivakalougatataki vakapeteriaki era na dau vulica ka vakamareqeta. Na vakamareqeti ni noqu veivakalougatataki vakapeteriaki a vakalougatataki au ena yalodei ni’u a yalolailai, na veivakalomavinakataki ni’u a taqaya, vakacegu ni’u a nuiqawaqawa, inuinui ni’u a lomaleqa, kei na reki ni’u a gadreva vakalevu sara tu. Na noqu veivakalougatataki vakapeteriaki a vukea me tubucake noqu vakabauta kei na nuitaka na Tamaqu Vakalomalagi kei na noqu iVakabula. E vakatubura cake talega na noqu lomani Rau—ka se vaka tikoga kina.¹²

Au vakadinadinataka ni veivakalougatataki vakapeteriaki e vakarautaka na veidusimaki veivakauqeti mai vua na Tamada Vakalomalagi. Au wasea na noqu ivakadinadina ni bula dina tiko na Tamada mai Lomalagi kei na Luvena—noda iVakabula, o Jisu Karisito—ka Rau kilai keda, lomani keda, ka gadreva me Rau vakalougatataki keda. Au kila deivaki talega ni o Peresitedi Russell M. Nelson e parofita ni Kalou e vuravura edaiedai. Ena yacai Jisu Karisito, emeni.