Nanuma Tiko Na Ka e Bibi Duadua

Ni da vakananuma ena macawa oqo na curu ena qaqa ki Jerusalemi na iVakabula ni bera toka na Nona solibula ni veisorovaki, au nanuma na Nona vosa ni nuinui kei na vakacegu: “Oi au na vu ni tucake tale, kei na vu-ni-bula: ko koya sa vakabauti au, kevaka sa mate; ena bula ga.”¹

Au lomani Koya. Au vakabauti Koya. Au vakadinadinataka ni o Koya na Vu-ni Tucaketale kei na Bula.

Na ivakadinadina oqo e vakacegui au ka vakaukautaki au ena loma ni va veimama na yabaki sa oti, ka sa gole yani kina, ko Barbara, na watiqu. Au calati koya.

Vakawasoma meu dau vakanananuma na neirau vauci tawamudu kei na neirau bula vata.

Au a wasea e liu au a sotavi Barbara kina ena imatai ni gauna kei na sala e vakavulici au kina meu vakayagataka na kila ni “talemuria” au a vulica ena noqu kaulotu. Au dodonu meu talemuri koya vakatotolo ni oti na imatai ni neirau sota baleta ni rairai totoka o lewa, kilai levu, ka osooso sara na nona ivolanivula ni veimaliwai. Au a rawai taumada ni rawarawa ni sotavi o koya ka veimaliwai. Au qoroya na nona vinaka. Au vakila ni keirau buku me duabau. E vaka me rawarawa sara ga ena noqu vakasama.

Keirau veigadivi kei Barbara, ka sa tekivu me tubu na neirau veimaliwai, ia e sega ni vakadeitaka ni dodonu vua na vakamau kei au.

E sega ni rauta na noqu kila; e gadreva o Barbara me kila vakataki koya. Au kila ke keirau lolo ka masulaka na ka oqo, ena rawa ni vakadeitaki mai lomalagi o Barbara.

Keirau a sega ni veigadivi ena dua na mua ni macawa me rawa ni keirau lolo ka masu yadua me keirau kilai keirau. E kalougata vei au, ni a ciqoma o lewa na veivakadeitaki vata ga vei au. Na kena vo, me vaka era kaya, sa itukutuku makawa.

Ni sa takali o Barbara, eratou biuta na luvei keirau e vica na lesoni ena vatu ni ibulubulu ka vinakata o Barbara me ratou nanuma tiko. E dua vei ira na lesoni oqori sai koya na “ka e bibi duadua sai koya na ka e bula balavu duadua.”

Nikua, au na wasea mai yaloqu e vica na vakila kei na vakasama me baleta na veika e bibi duadua.

iMatai, e bibi duadua na veimaliwai kei na Tamada Vakalomalagi kei na Luvena, na Turaga o Jisu Karisito. Na veimaliwai oqo e bibi dina ena gauna oqo kei na veigauna tawamudu.

iKarua, na veimaliwai vakamatavuvale era okati ena veika e bibi duadua.

Ena noqu veiqaravi taucoko, au sikovi ira kina e vuqa na tamata kei na matavuvale era vakacacani ena leqa tubukoso E levu era tokitaki, via kana, ka rere. Era gadreva na veivuke vakavuniwai, kakana, kei na vale.

Era gadreva talega na nodra matavuvale.

Au kidava ni so ena sega beka tu vei ira na veivakalougatataki ni dua na matavuvale voleka, kau oka kina na matavuvale savu, itokani, kei na matavuvale ni tabanalevu me “matavuvale.“ Na veimaliwai oqo e yaga ki na bulabula ni lomadra kei na yago.

Na veimaliwai oqo e rawa talega ni solia na loloma, reki, marau, kei na vakilai ni taukei.

Na susugi ni veimaliwai bibi oqo e ka ni digidigi. Na digidigi me tiki ni dua na matavuvale e gadrevi kina na veidinadinati, loloma, vosota, veitaratara, kei na veivosoti.² E tiko na gauna eda na sega ni duavata kei na dua tale na tamata, ia, e rawa ni yaco vakakina ka sega na veisei. Ena veimusumusuki kei na vakamau, eda sega ni dau lutu yani ki na dodomo se lutu tani mai na dodomo me vaka na iyaya e tosoi ena dua na papa ni qito jese. Eda digitaka meda dodomo ka veitokoni vakai keda. Eda cakava vaka kina ena veimaliwai tale eso vakamatavuvale kei ira na itokani era vaka na matavuvale vei keda.

Me vaka e cauraka na ivakaro ni matavuvale, “Ena vakatara vei keda na ituvatuva vakalou ni bula marau me da laki tomana tale na noda veiwekani vakamatavuvale ena tai kadua ni ibulubulu. Ena qai rawa kina vua na tamata yadua me suka lesu ki na iserau ni Kalou ka ra duavata tawamudu tale na veimatavuvale ena veicakacaka tabu vakalotu kei na veiyalayalati ena veivaletabu vakalou.”³

E dua tale na ka bibi duadua o ya meda muria na veivakauqeti ni Yalotabu ena noda veimaliwai bibi duadua kei na noda sasaga meda lomani ira na wekada me vakataki keda, oka kina na noda veiqaravi vakaitaukei kei na veiqaravi raraba. Au a vulica taumada na lesoni oqo ena noqu bula niu se bisopi tiko.

Ena dua na bogi levu ni draki batabata, au a biuta tu mai na valenivolavola ni bisopi niu a vakauqeti bibi meu sikova e dua na yada qase ena tabanalevu. Au raica yani na noqu kaloko—sa 10:00 ena yakavi. Au nanuma ni sa bera ni yaco e dua na veisiko vaka oya. Kena ikuri, sa uca cevata tiko. Au sa mani nanuma meu sikova na marama lomani oqo me imatai ni ka ena mataka ka kakua ni vakaogai koya ena bogi levu oya. Au draiva ki vale ka laki moce ia au a veivukiyaki ena bogi taucoko baleta ni sa yavalati au tiko na Yalotabu.

Ena mataka lailai ka tarava, au draiva sara ga ki na vale nei yada. A dolava na katuba na luvena yalewa ka kaya ena tonawanawa ni mata, “Isa, Bisopi, vinaka vakalevu na nomu lako mai. A takali o tinaqu ena rua na auwa sa oti”—Au luvuci vakaidina. Au na sega sara ni guilecava na vakila ni lomaqu. Au a tagi. O cei e bibi cake mai na yada lomani oqo e dodonu me taura na ligana o nona bisopi, vakacegui koya, ka rairai solia vua e dua na iotioti ni veivakalougatataki? Au a calata na madigi o ya baleta niu a vakaseva na veivakauqeti kaukauwa oqo mai vua na Yalotabu.⁴

Taciqu kei na ganequ, cauravou kei na goneyalewa, kei kemuni na gone ena Lalai, au vakadinadinataka ni muria na veivakauqeti ni Yalotabu sa dua na ka e bibi duadua ena noda veimaliwai taucoko.

Kena itinitini, ena mua ni macawa ni Sigatabu ni Curu Vakatui oqo, au vakadinadinataka ni saumaki vua na Turaga, wasea na ivakadinadina me baleti Koya, kei na qaravi Koya era sa maliwai talega ni veika e bibi duadua.

Na vakabauta na Turaga o Jisu Karisito sa ikoya na yavu ni noda ivakadinadina. Na ivakadinadina sa ivakadinadina se vakadeitaki ni dina tawamudu ka vakauqeti kina na loma kei na yalo yadua mai na Yalo Tabu. Na ivakadinadina kei Jisu Karisito, ka sucu mai vua ka vaqaqacotaki ena Yalotabu, e veisautaka na bula—ena veisautaka na ivakarau ni noda vakasama kei na ivakarau ni noda bula. Na ivakadinadina e vagolei keda vua na Tamada Vakalomalagi kei na Luvena vakalou.

O Alama e vakavulica:

“Raica, au sa vakadinadinataka vei kemuni niu sa kila ni sa dina na veika au sa tukuna oqo. Ia dou sa kila li na vuna au kaya kina ni sa dina?

“Raica au sa kaya vei kemuni, sa vakatakilai ira vei au na Yalo Tabu ni Kalou. Raica, au a lolo ka masu ena vuqa na siga meu kila kina na veika oqo. Ia au sa kila ni sa ka dina, ni sa vakatakila vei au na Turaga na Kalou ena kaukauwa ni nona Yalo Tabu”⁵

Na tiko walega ni dua na ivakadinadina e sega ni rauta. Ni sa tubu cake na noda saumaki mai vei Jisu Karisito, eda sa vinakata me da vakadinadinataki Koya—na Nona vinaka, loloma, kei na yalovinaka.

E vakavuqa ena noda soqoni ni ivakadinadina ena Sigatabu ni lolo, eda rogoca kina na malanivosa “Au vakavinavinaka” kei na “Au loloma” vakalevu cake mai na noda rogoca na malanivosa “Au kila“ kei na “Au vakabauta.“

Au sureti kemuni mo ni wasea vakawasoma na nomuni ivakadinadina me baleti Jisu Karisito. Kauta na ivakadinadina ni ka o kila ka vakabauta kei na ka o vakila, ka sega wakega ni ka o vakavinavinakataka. Vakadinadinataka na veika o sa sotava ena nomu mai kila ka lomana na iVakabula, na bulataki ni Nona ivakavuvuli, kei na Nona kaukauwa veivueti kei na veivukei ena nomu bula Ni ko solia na nomu ivakadinadina ni ka o kila, vakabauta, ka vakila na Yalo Tabu ena vakadeitaka na dina vei ira ka ra vakarorogo ki na nomu ivakadinadina. Era na cakava oqo baleta ni ra sa vakaraici iko ni ko vakacegu ni vakamuri i Jisu Karisito. Era na raica na ibalebale ni Nona tisaipeli Era na vakila e dua na ka era a sega beka ni vakila eliu. Na ivakadinadina savasava e lako mai na yalo sa veisau ka rawa ni kau yani ena kaukauwa ni Yalo Tabu ki na yalodra eso tale era sa dola tu me ra ciqoma.

O ira era vakila e dua na ka ena vuku ni nomu ivakadinadina era na qai kerea vua na Turaga ena masu me vakadeitaka na dina ni nomu ivakadinadina. Sa na qai rawa ni ra kila vakataki ira

Taciqu kei na ganequ, au vakadinadinataka ka vakatusa vei kemuni niu kila ni o Jisu Karisito na iVakabula ka Dauveivueti kei vuravura. E bula tiko o Koya. O Koya na Luve ni Kalou sa tucaketale, ka sai koya oqo na Nona Lotu ka liutaka na Nona parofita kei na ira na iapositolo. Au masuta me dua na siga niu na lako yani ki vuravura ka tarava, meu cakava ni caudre serau tu na noqu ivakadinadina.

Ena noqu veiqaravi, au sa vulica kina na veika e bibi duadua sai koya na noda veimaliwai kei na Tamada Vakalomalagi kei na Luvena Daulomani, noda matavuvale, kei ira na wekada, ka vakatara na Yalo ni Turaga me dusimaki keda ena veimaliwai oqori me rawa ni da vakadinadinataka na veika e bibi duadua ka bula balavu duadua. Ena yacai Jisu Karisito, emeni.