Na Tatamusuki Luluqa

Niu se gone tagane lailai, au vulica meu taleitaka na veiveisau ni draki vakairogorogo ni yabaki ena cevaira kei Montana, au tubu cake kina. Na noqu draki talei na vulai werewere—na gauna ni tatamusuki. Na neitou matavuvale e dau vakanuinui ka masu ni neitou veivula ni cakacaka kaukauwa ena saumi ena tatamusuki vuavuai vinaka. Oi rau na noqu itubutubu erau dau leqataka na draki, na bula ni manumanu kei na itei, ka vuqa tale na ka erau sega ni lewa rawa.

Niu tubucake, au vakila vakalevu cake na bibi ni ka e oka kina. Na neitou bula ni veisiga e vakatau tu kina tatamusuki. A vakavulica vei au o tamaqu baleta na misini keimami vakayagataka metamusuka na sorenikau. Au sarava na nona tosoya na misini kina iteitei, musuka e dua na laini lailai ni sila ka qai rai lesuva na misini me vakadeitaka ni sa levu sara na sila era sa tawa e loma ni taqe ivakatawa ka sega ni kolotaki laivi vatakeu na qa ni sila. E taleva vakavica na cakacaka oqo, ka veiveisautaka na misini ena veigauna yadudua. Au cici tikiva kau dikeva vata kaya na qa ni sila kau vakalecaleca niu kila na ka au cakava tiko.

Ni sa lomavakacegu oti o koya na kena veisau ni misini, au kunea eso na vua ni sila mai na qana ena qele au solia vua ena mata ni vakalelewa. Au na sega ni guilecava na veika e kaya vei au ko tamaqu: “Sa vinaka sara oqo ka sa veika saraga e rawa ni cakava na misini oqo.” Au sega sara ni duvata ena nona ivakamacala, au vakananuma ni segani taucoko na tatamusuki oqo.

Ena dua na gauna lekaleka mai muri, ni sa vuki me batabata na draki ena yakavi, au sarava na nodra tokivanua e udolu vakaudolu na gavula, na kokosi kei na ga ni ra vakaroro mai ki na iteitei me ra kana ena nodra ilakolako balavu ki na ceva. Era kana mai na vovo ni sila mai na neirau tatamusuki sega ni vinaka sara. Sa vakavinakataka sara na Kalou. Ka sa sega ni dua na sorenisila me yali.

E dau veitemaki wasoma me malele na noda vuravura ka vakakina ena loma ni itovotudei ni Lotu meda guta ga na vinaka. Na vakau itukutuku raraba, na vakanamata sega ni rawa, ka vakavuqa na noda vakalewai keda ga ka vakavuna na vakila ni da tawayaga—nida sega soti ni vinaka sara eda na sega ni vakakoya. Eso e sega ni kilamatata mada ga ni veisureti ni iVakabula “mo dou qai vinaka sara.”¹

Nanuma ni vinaka sara e sega ni tautauvata kei na yaco mo vinaka sara ena vukui Karisito.² Na igu mo vinaka sara e kaciva e dua na ivakatagedegede e dredre, ka vakavuna vei keda meda vakatauvatani keda kei ira na tani. Oqo e vakatubura na yalo ni caka cala kei na lomaleqa ka rawa ni vakavuna meda vakasuka ka vakatikitikitaki keda.

Na yaco me vinaka sara vei Karisito e dua tale na ka. Sai koya na iwalewale—ena veidusimaki ena loloma ni Yalo Tabu—ni yaco me da vakataka vakalevu cake tiko na iVakabula. Na ivakatagedegede oqo e tuvanaki mai vua e dua na Tamada Vakalomalagi yalovinaka ka kila-kece ka vakamacalataki matata ena veiyalayalati eda sureti meda ciqoma. E laveta mai vei keda na icolacola ni yalo ni caka cala kei na takiveiyaga, ka vakamatatataka tiko ga o cei o keda ena mata ni Kalou. E dina ni ikalawa oqo e laveti keda ka vakauqeti keda meda vinaka cake, eda sa vakarautaki ena noda yalodina vua na Kalou eda vakaraitaka ena noda sasaga meda muri Koya ena vakabauta. Ni da ciqoma na veisureti ni iVakabula meda lako mai Vua, eda vakila kusarawa ni noda vinaka duadua e vinaka varauta ka ni loloma soliwale na iVakabula ena vakacavara ena sala eda sega ni vakasamataka rawa.

E rawa nida raica na ivakavuvuli ni yaco ena Nona vakani ira na lima na udolu na iVakabula.

“Ni sa tacake o Jisu, ka raici ira na na lewe vuqa era sa lako mai vua, a sa kaya vei Filipi, E vei eda na volia kina na kakana, mera kana kina o ira oqo? …

“A sa sauma ko Filipi, E sega ni rauti ira oqo na madrai e voli ena rua na drau na peni mera taura vakalalai o ira yadudua.

“E dua vei ira na tisaipeli, ko Adriu, a taci Saimoni Pita, sa kaya vua,

“E dua na gone tagane sa tu eke, a sa tu vua e lima na i buli madrai bali, ka rua na ika lalai: ia ka cava oqo vei ira na lewe vuqa?”³

O) vakasamataka beka na cava e vakila na iVakabula baleta na gone tagane oqo, ka tu vua na vakabauta ni gone lailai me solia na veika e kila tu ni sega ni veirauti me sotavi kina na itavi oqo?

“Ia sa taura ko Jisu na madrai; ni sa vakavinavinaka oti, sa vei solia yaka vei ra na tisaipeli, ia ko ira tisaipeli vei ira sa dabe sobu; ka vakakina na ika a kena levu me vaka era vinakata.

“Ni ra sa mamau, sa kaya ko koya vei ira na tisaipeli, Dou kumuna vata na kena vo, ka me kakua ni dua na ka e yali.”⁴

Sa vakavinakataka ma iVakabula na isolisoli malumalumu.

Ni oti vakalailai na ka sotavi oqo, sa talai ira yani na Nona tisaipeli ko Jisu me liu ena dua na waqa. Sega ni dede era sa sotava e dua na cava e waitui ena lomaloma ni bogi. Era sa rere ni ra raica e dua na iyaloyalo ni yalo e taubale yani vei ira ena dela ni wai.

“A sa vosa sara vei ira ko Jisu, ka kaya, Dou vakacegu; koi Au ga; dou kakua ni rere.

“A sa vosa vei koya ko Pita, ka kaya, Na Turaga, kevaka sai kemuni, kacivi au me bau yani vei kemuni e dela ni wai.

“A sa kaya ko koya, Lako ga mai. Ia ni sa sobu mai waqa ko Pita, sa lako e dela ni wai me lako vei Jisu.

“Ia ni sa raica sa kaukauwa na cagi, sa qai rere; ia ni sa vakatekivu me lutudromu, sa kaci sara, ka kaya, na Turaga, ni vakabulai au.

“Sa qai dodoka sara na ligana ko Jisu, a sa taura, ka kaya vua, O iko sa lailai na nomu vakabauta, o sa vakatitiqa ena vuku ni cava?”⁵

Taciqu kei na ganequ, sa rawa ni tini e kea na veitalanoa oya. Au vakabauta ni rau lesu o Pita kei na iVakabula ka veitaubeni i waqa, sa suasua o Pita ka vaka na lialia, e rairai kaya vua na iVakabula, me vaka: “Isa, Pita, kakua ni rere ka kakua ni lomaleqa. Kevaka o rawa ni raici iko me vaka au sa raici iko, ena seavu na nomu vakatitiqa ka tubu na nomu vakabauta. Au lomani iko, Pita, nio sobu mai waqa. Na nomu isolisoli e sa ciqomi, e dina ga ni o a yavalati, au na dau tu ga me laveti iko mai na wai titobu, ka na vakavinakataki na nomu isolisoli.”

E vakavulica o Peresitedi Dieter F. Uchtdorf:

“Au vakabauta ni iVakabula ko Jisu Karisito ena vinakata mo raica, vakila, ka kila ni o Koya na ivurevure ni nomu kaukauwa. Ni ena Nona veivuke, ena sega ni vakaiyalayala na ka o rawa ni rawata. Na ka o rawa ni rawata e tawa vakaiyalayala. O Koya ena vinakati iko mo raici iko ena sala e raici iko kina o Koya. Ka duidui sara oqori mai na sala e raici iko kina o vuravura.

“O Koya e solia na kaukauwa vei ira na vakaocai; ka vei ira era guce, o Koya e vakalevutaka na kaukauwa.”⁶

E dodonu meda nanuma ni na ka vinaka duadua-ka-isolisoli sega ni vinaka sara. e rawa ni vakavinakataka na iVakabula. Se vakacava na irairai somidi ni noda igu, meda kakua ni beca na kaukauwa ni iVakabula. E dua na vosa rawarawa ni lomavinaka, e dua na veisiko ni veiqaravi lekaleka ka yalodina, e dua na lesoni ni Lalai vakatavulici ena loloma e rawa, vata kei na veivuke ni iVakabula, ni vakarautaka na vakacegu, vakamalumutaka na yalo, ka veisautaka na bula tawamudu. Na noda sasaga vakamalunmalumu e rawa ni vakavuna na cakamana, kei na kena cakacakataki, e rawa nida vakaitavi ena dua na tatamusuki uasivi sara.

Vakawasoma, nida dau biu ena ituvaki eda na dodoka kina na ka eda sotava. De rairai beka eda na vakila nida tawayaga kina itavi. De rairai beka eda raici ira eda qarava vata kei na ka vakila nida sega ni vinaka sara. Kemuni na taciqu kei na ganequ, kevaka ko vakila vakaoqo, vakaraici ira na turaga kei na marama vakasakiti era toka qo e dakuqu kau veiqaravi kei ira.

Au vakila na nomuni mosi.

Au sa vulica, se cava ga, me vaka ga ni via vinaka sara e sega ni tautauvata kei na yaco mo vinaka sara ena vukui Karisito, na vakatautauvatataki iko e sega ni tautauvata e sega ni tautauvata kei na vakatotomuria. Nida vakatauvatanitaki keda kei ira na tani, e rawa ni rua ga na kena isau. Ke sega nida raici keda nida vinaka cake mai vei ira na tani ka yaco me daulelewa ka vakalewai ira, se eda raici keda nida lailai mai vei ira na tani ka yaco me lomaleqa, vakalewai keda, ka yalo lailai. Na noda dau vakatautauvatataki keda kei ira na tani e dau vakavudua me yaga, e sega ni veilaveti, ka so na gauna e dau vuna na yalo lailai E dina, ni vakatautauvata vakaoqo e rawa ni veivakarusai vakayalo, tarovi keda mai na noda ciqoma na veivuke vakayalo eda gadreva Mai na dua tale na yasana, na noda vakatotomuri ira eda rokova ka ra vakaraitaka na ivalavala va-Karisito e rawa ni vu ni vuli, veilaveti, ka rawa ni vukei keda meda yaco me tisaipeli vinaka cake i Jisu Karisito.

Sa solia vei keda na iVakabula na ivakaraitaki meda muria ni sa vakatotomuria O Koya na Tamada. “Sa kaya vua ko Jisu, Niu sa tiko dede vaka oqo kei kemudou, ko sa sega ni kilai au, Filipi? Ko koya sa raici au, sa raici Tamaqu, ko sa qai kaya vakaevei, Vakaraitaki Tamamu vei keitou?”⁷

A sa qai vakatavuvuli ko koya, “E dina, e dina, au sa kaya vei kemudou O koya sa vakabauti au, ena kitaka talega na cakacaka au sa kitaka.”⁸

Se vakacava na irairai somidi ni noda igu, kevaka eda lomadina, ena vakayagataki keda na iVakabula me vakayacora na Nona cakacaka. Kevaka eda cakava walega na noda vinaka duadua ka nuitaki Koya me cakava na kena vo, eda rawa ni tiki ni cakamana ka wavoliti keda tu.

E kaya o Elder Dale G. Renlund, “E sega ni gadrevi mo vinaka sara, ia keimami gadrevi iko, baleta ni ko ira kece sa yalorawarawa era rawa ni cakava e dua na ka.”⁹

Ia me vaka e vakatavulici keda o Peresitedi Nelson, “Na Turaga e taleitaka na noda sasaga.”¹⁰

Sa tu vakarau na iVakabula me ciqoma na noda isolisoli malumalumu ka vakavinakataki ira sara ena Nona iloloma soliwale. Na tu vata kei Karisito, e sega kina na tatamusuki sega ni vinaka sara. Me tu vei keda na yaloqaqa meda vakabauta ni Nona loloma soliwale e noda—ni na vukei keda O Koya, vueti keda mai na titobu nida sa veilecayaki, ka vakavinakataka na noda igu sega ni vinaka sara.

Ena talanoa vakaibalebale ni dauteitei, e vakamacalataka na iVakabula ni sorenikau era teivaki ena qele vinaka. Eso era vuaidrau, eso e onosagavulu, ka so tale e tolusagavulu. Era tiki kece ni Nona tatamusuki vinaka sara.¹¹

Na parofita o Moronai a sureti keda kece, “Ia dou lako mai vei Karisito, ka mo dou vakataucokotaki vua, … ka kevaka dou sa vakuwai kemudou mai na veika kecega sa sega ni vakalou, ka lomana na Kalou ena nomudou igu, vakasama, kei na nomudou kaukauwa kecega, sa na qai rauti kemudou nona loloma soli wale, ia na nona loloma soli wale dou sa vakataucokotaki kina ena vukui Karisito.”¹²

Taciqu kei na ganequ, au vakadinadinataki Karisito, o koya e tu vua na kaukauwa me vakavinakataka sara mada ga na noda isoro yalomalumalumu duadua. Meda cakava na noda vinaka duadua, kauta mai na ka eda rawata, ka, ena vakabauta, tauca na noda isolisoli sega ni vinaka sara e Yavana. Ena yacai Koya na Turaga ni Tatamusuki vinaka sara, sai Jisu Karisito, emeni.