A Domo ni Mamarau!

“Ena gauna oqo, na cava eda sa rogoca ena kosipeli sa vunautaki vei keda? Na domo ni mamarau! Na domo ni loloma soliwale mai lomalagi; kei na domo ni dina mai na loma ni qele; na itukutuku rekitaki vei ira na mate; na domo ni mamarau vei ira na bula kei ira na mate; na itukutuku rekitaki.”¹

Taciqu kei na ganequ, sa rui dredre me da rogoca na vosa oqo mai vua na Parofita o Josefa Simici ka sega ni tuburi keda e dua na siga ni bati ni dredre levu!

Na mata dredredre e vesuka vakadua na sinai kei na vakaturaga ni reki e kunei ena ituvatuva cecere ni marau ni Kalou na Tamada Vakalomalagi, baleta ni da vakadeitaki, “sa sucu na tamata, me rawata na marau.”²

Eda a kaila ena reki³ ena noda bula taumada ni da sa rogoca na ituvatuva ni bula marau ni Kalou, ka da tomana na noda kaila ni marau eke ni da sa bula muria na Nona ituvatuva. Ia ka cava sara mada na ibalebale ni kena kuruvaki na marau oqo mai vua na Parofita. Na cava e tubu kina na titobu kei na ituvaki ni yalo taraloma vakaoqo?

A vakatavulica tiko na parofita o Josefa baleta na nodra papitaisotaki na mate. Oqo e dua dina na ivakatakila lagilagi ka a ciqomi ena reki levu. Ni ra vulica taumada na lewe ni Lotu ni ra sa rawa ni papitaiso nodra daulomani ka ra sa mate, era cibi. A kaya o Wilford Woodruff, “Ena gauna ga au sa rogoca kina a lade na yaloqu ena reki!”⁴

Na papitaiso me baleti ira na mate e a sega ni dina duadua, ka vakatakila ka vakalesuya mai na Turaga. E vuqa tale na isolisoli kei na edaumeni ka a guta tu na Kalou me solia vei ira Luvena tagane kei na yalewa.

Na isolisoli eso oqo e oka kina na lewa ni matabete, na veiyalayalati kei na cakacaka vakalotu, na vakamau ka tudei me tawamudu, na nodra tauri se vauci na gone vei ira na nodra itubutubu ena loma ni matavuvale ni Kalou, ka yaco sara ki na veivakalougatataki me lesu ki vale ki na iserau ni Kalou na Tamada Vakalomalagi kei na Luvena, ko Jisu Karisito. Na veivakalougatataki kece oqori e rawa mai na Veisorovaki i Jisu Karisito.

Baleta ni nanuma na Kalou ni ko ira oqo era Nona veivakalougatataki cecere ka savasava duadua,⁵ e sa vakarota o Koya me tara na veivale tabu ka rawa kina Vua me solia na iloloma uasivi oqo vei ira na Luvena.⁶ Na veivale oqo sa na Nona vale e vuravura. Na veivale oqo era na valetabu na vanua e vauci se vesuki kina e vuravuara ena Yacana kei na Nona vosa kei na lewa me vauci kina e lomalagi.⁷

Ni da lewena na Lotu nikua, eso vei keda e rawa nida taura vaka rawarawa wale na vei dina lagilagi tawamudu oqori. Sa yaco me vaka e tikida tu. Ena so na gauna ena veivuke ke da raici ira mai na matadra era vulica tiko ena imatai ni gauna, A vakavotui mai vei au na ka oqo mai na dua na ka sotavi walega.

Ena yabaki sa oti, ni bera toka na kena vakatabui tale na Valetabu e Tokyo Japani, a levu sara na vulagi sega ni noda lotu era a gadiva na valetabu oya. E a dua na ilakolako va oya e a lako yani kina e dua na iliuliu dauvakasama mai na dua tale na matalotu. Keimami vakavulici koya neimami vulagi baleta na ituvatuva ni bula marau i Tamada vakalomalagi, na itavi bibi duadua i Jisu Karisito ena ituvatuva oya, kei na ivunau ni rawa ni vauci tawamudu na matavuvale mai na cakacaka vakalotu ni veivauci.

Ni sa cava na sarasara, keitou sureta na neitou itokani me wasea na veika e vakila. Ni semati tu kina vakaduavatataki ni vuvale—ena veigauna sa oti, gauna oqo kei na veigauna mai muri—e taroga na tamata vinaka oqo ena yalodina, “Era kila beka o ni vakabauta vata na titobu ni ivakavuvuli oqo?” A kuria, “Oqo e rawa ni dua vei ira na ivakavuvuli duadua ka na rawa ni duavata kina na vuravura tawase oqo.”

Sa qai dua na vakararai kaukauwa. Na tamata oqo e sega walega ni tarai mai na tara vakamatau ni valetabu ia e tarai mai na kurabui kei na titobu na ivakavuvuli me duavata ka vauci tawamudu vei Tamada Vakalomalagi kei Jisu Karisito.⁸

E dodonu meda kua ni kurabui, kina, ni dua ka sega ni noda vakabauta e kidava na vakaturaga ni veika e yaco e loma ni valetabu. Na ka e rawa ni yaco me ka matau se ivakarau vei keda ena so na gauna e dau laurai ena kena lagilagi kei na vakaturaga mai vei ira era rogoca se vakila ena imatai sara ga ni gauna.

E dina ga ni sa tiko na valetabu mai na veigauna makawa, me tekivu mai na Vakalesuimai ni kosipeli, sa dua na ka vakaliuci duadua vei ira kece na parofita mai na gauna ni Parofita o Josefa Simici. Ka sa rawarawa ni da kila na vuna.

Ni a vakavulica tiko na parofita o Josefa baleta na nodra papitaisotaki na mate, e a vakatakila e dua tale na dina levu. E vulica o koya: “Meu vakadeitaka mada vei kemuni ni oqo na ivakavuvuli me baleti ira na mate kei ira na bula ka na sega ni rawa ni vakamamadataki, me baleta na noda vakabulai. Ni sa yaga ka bibi na nodra vakabulai ki na noda vakabulai, … era na sega ni vakavinakataki rawa kevaka eda sega—eda na sega talega ni vakavinakataki rawa kevaka eda sega na noda mate.”⁹

Eda raica rawa, ni gadrevi sara na valetabu kei na cakacaka e caka baleti ira ruarua na bula kei ira na mate e qai matata sara.

Sa yadrava tu na meca. Na nona kaukauwa e vakarerei mai na cakacaka vakalotu kei na veiyalayalati e vakayacori e loma ni valetabu, ka na cakava na ka ga e rawa me tovolea me tarova kina na cakacaka. Baleta na cava? Baleta ni kila o koya na kaukauwa e yaco mai na cakacaka tabu oqo. Ni sa vakatabui na valetabu vou yadua, na kaukauwa mana i Jisu Karisito e tete yani ki vuravura taucoko me valuta na sasaga ni vunica ka vueti keda mai nida lako mai Vua. Ni tubu cake na iwiliwili ni valetabu kei ira na dau maroroi veiyalayalati, e malumalumu sobu kina na vunica.

Ena gauna taumada ni Lotu, eso era dau lomaleqataka ni sa kacivaki e dua na valetabu vou, ni ra dau tukuna “Eda sega ni dau tekivuna e dua na valetabu me sega ni tekivu qiri kina na lali mai eli.” Ia a sauma ena yaloqaqa o Brigham Young, “Au vinakata meu rogoca tale me taqiri.”¹⁰

Ena bula oqo, eda na sega ni drotaka rawa na ivalu, ia e rawa ni noda na kaukauwa me ulabaleta na noda meca. Na kaukauwa kei na qaqaco oya a lako mai vei Jisu Karisito ni da sa cakava ka maroroya na veiyalayalati ni valetabu.

A vakatavulica o Peresitedi Russell M. Nelson: “Sa toro mai na gauna era na wasei tani kina o ira era sega ni talairawarawa vua na Turaga mai vei ira era talairawarawa. Na noda ivakadei taqomaki vinaka duadua sai koya me da kilikili kaya na curumi ni Nona vale savasava.”¹¹

Oqo eso tale na ikuri ni veivakalougatataki ka yalataka na Kalou mai vei ira na Nona parofita.

O gadreva beka na cakamana? Esa tukuna na noda parofita: “Au yalataka ni Turaga ena kauta mai na mana e kila o Koya ni ko gadreva ni ko solibula mo veiqaravi ka sokalou ena Nona valetabu.”¹²

O gadreva beka na kaukauwa veivakabulai ka veivaqaqacotaki ni iVakabula ko Jisu Karisito? ivakadinadina ni veivakabulai kei na kaukauwa veivaqaqacotaki ni Veisorovaki ni iVakabula. E vakadeitaka vei keda o Peresitedi Nelson “Na veivakavulici kece e valetabu… e vakalevutaka na noda kilai Jisu Karisito vinaka.… Ia, ni da maroroya na noda veiyalayalati, sa solia vei keda na Nonakaukauwa veivakabulai, veivaqaqacotaki. Io, eda sa gadreva sara na Nona kaukauwa ena veisiga ni mataka.”¹³

Ena imatai ni Sigatabu na Curu Vakatui ni curumi Jerusalemi yani ena qaqa ko Jisu Karisito, e lewe vuqa vei ira na Nona tisaipeli i jisu Karisito era mamarau ka vakacaucautaka na Kalou ena domo levu, “Sa kalougata na Tui sa lako mai ena yaca ni Turaga.”¹⁴

Sa veirauti vinaka saraga ni a vakatabui ena Sigatabu ni Gone ni 1836 na Valetabu e Kirtland. Ena gauna talega koya era reki na tisaipeli i Jisu Karisito. Ena msu ni veivakatabui koya, e cauraka na Parofita o Josefa Simici na vosa ni veivakacaucautaki oqo:

“Oi kemuni na Turaga na Kalou Qaqa, ni rogoci [keimami] ka sauma vei keimami mai lomalagi, na nomuni itikotiko tabu, ena lagilagi, ena rokovi,ena kaukauwa, ena vakaturaga, ena qaqa, ena lewa, ena dina, ena lewa dodonu.

“Ka mo ni vukei keimami ena kaukauwa ni Yalomuni, me keimami domovata kei ira na serafimi serau era sa tiko wavolita na nomuni itikotiko vakaturaga, na neimami sere ni vakavinavinaka, kei na vakacaucau ka vaka, Osana vua na Kalou kei na Lami!

“Ka me ra kaila vakadomoilevu na nomuni yalododonu ena reki.”¹⁵

Kemuni na taciqu kei na ganequ, ena Sigatabu ni Gone nikua, me vaka nida tisaipeli i Jisu Karisito ka vakacaucautaka na Kalou tabu ka reki ena Nona vinaka vei keda. “Na cava eda sa rogoca ena kosipeli sa vunautaki vei keda? E dina ga “na domo ni mamarau!”¹⁶

Au vakadinadinataka ni rawa ni ko vakila na reki levu cake niko curuma tiko na valetabu ni Turaga. Au vakadinadinataka niko na vakila na reki e tiko Vua baleti iko, ena yacai Jisu Karisito, emeni.