Ni Oti Nai Ka Va ni Siga

Me vaka eda sa vakananumi kina ena mataka oqo, nikua na Sigatabu ni Curu Vakatui, e dusia tu na curu vakatui ni iVakabula ki Jerusalemi ka itekitekivu ni macawa tabu ni se bera Nona Veisorovaki cecere, ka okati kina Nona vakararawataki, Vakoti ena Kauveilatai, kei na Tucaketale.

Ni se bera vakalailai na Nona curu parofisaitaki ki na siti, a vakaogai koya vakataucoko o Jisu Karisito ena Nona kaulotu voli ni a rogoca o Koya mai vei rau Nona itokani lomani o Meri kei Marica ni sa tauvimate koto na ganedrau o Lasarusa.¹

Dina ga ni a tauvimate bibi sara o Lasarusa, na Turaga “sa tiko bogi rua tale ena tikina ko ya. Sa oti oqo sa qai kaya vei ira na tisaipeli, Meda lako tale ki Jutia.”² Ni se bera ni tekivu na ilakolako ki na vale ni Nona itokani e Pecani, “sa qai tukuna vakamacala vei ira ko Jisu, Sa mate ko Lasarusa.”³

Ni lako mai o Jisu ki Pecani ka sotavi Marica eliu qai sotavi Meri, baleta beka na yalolailai ena vuku ni Nona yaco bera mai, erau a tavaki Koya ni rau kaya yadua, “Kemuni na Turaga, kevaka ko ni a tiko eke, sa sega ni ciba na ganequ.”⁴ A qai kuria o Marica, “Sa na bona ko koya: ni sa qai bogi va na nona mate.”⁵

Na bogi va oya a bibi vei rau o Meri kei Marica. Me vaka eso na vakasama vaka‑koronivuli ni rapai, a vakabauti tu ni yalodra na sa mate ena tikoga ena yago me tolu na siga, ka solia tiko kina na inuinui ni se rawa tiko ni bula. Ia, ena ikava ni siga na inuinui oya sa yali, baleta beka ni yago esa na tekivu me vuca ka “bona.”⁶

E rawai rau tu o Meri kei Marica na ituvaki vakamosiyalo. “Ni sa qai raica ko Jisu tagi [nei Meri], sa vutugu ko koya ena yalona, a sa rarawa na lomana,

“Ka kaya, Evei na vanua dou a buluti koya kina? Era sa kaya vua, Turaga, ni lako mai mo ni raica.”⁷

Sa ikoya na gauna eda raica kina e dua na cakamana cecere ni iVakabula ena ni bula oqo. A kaya eliu na Turaga, “Dou kauta tani na vatu.”⁸ Sa qai masu vua na Tamana, ka “kaci ena domolevu, Lasarusa, lako mai.

“Ia ko koya ka mate sa lako mai ka viviraki tu na ligana kei na yavana e nai sole ni mate: ka sa vesu tu na matana ena dua na itavoi Sa kaya vei ira ko Jisu, Dou sereki koya, ka laiva me lako.”⁹

Me vakataki Meri kei Marica, sa noda na madigi meda sotava na veika kece ni bula vakavuravura, na rarawa sara mada ga¹⁰ kei na malumalumu.¹¹ Eda na sotava yadua na mosi ni yalo ka dau salavata mai na nona yali e dua eda lomana. Na noda ilakolako ni bula vakavuravura ena rawa ni okati kina na tauvimate yadua se na tauvimate veivakamalumalumutaki ni dua na daulomani; na yalolailai, lomabibi, se na veibolebole ni bulabula ni vakasama; na dredre vakailavo; cakitaki; ivalavala ca. Ka ena so na gauna na veika oqo e dau salavata tu na yaluma. Au sa sega ni duidui kina. Me vakataki iko, au sa sotava talega e vuqa na bolebole e namaki meda sotava ena bula oqo. Au sa dreti ki na itukutuku oqo me baleta na iVakabula kei na ka e vakavulici au kina me baleta na noda veiwekani vata kei Koya.

Ena gauna ni noda nuiqawaqawa levu, o keda, me vakai Meri kei Marica, eda vakasaqara na iVakabula se kerea vua na Tamada na Nona veivuke vakalou. Na italanoa kei Lasarusa e vakavulici keda ena ivakavuvuli ka rawa ni vakayagataki ena noda bula ni da sotava noda bolebole yadua.

Ni a yaco yani na iVakabula ki Pecani, era sa yalolailai kece ni na rawa ni vakabulai o Lasarusa—sa oti e bogi va,ka sa takali o koya. Ena so na gauna ni noda bolebole vakai keda, eda vakila beka ni sa rui bera na Karisito ka vaka me bolei sara kina na noda nuinui kei na vakabauta. Na noqu ivakadinadina sa ikoya ni da toso ki liu ena vakabauti Jisu Karisito, ena dau yaco ga mai na ikava ni bogi. Ena dau lako ga mai o Koya me vukei keda se me laveta lesu ki na bula na noda nuinui. A yalataka o Koya:

“Me kakua ni rarawa na lomamudou.”¹²

“Au na sega ni laivi kemudou mo dou luveniyali: au na lako mai vei kemudou.”¹³

Ena so na gauna e vaka beka ni sa sega ni lako mai o Koya vei keda me yacova na ikava ni bogi vakaibalebale oya,ni vaka me sa oti kece na inuinui. Ia na cava beka sa rui bera kina? A vakatavulica o Peresitedi Thomas S. Monson, “Na Tamada Vakalomalagi, sa dau solia vei keda e vuqa na veika meda marau kina, sa kila talega ni da na vuli ka tubu cake ka qaqaco sara ni da sotava ka qaqa mai na veivakatovolei eda na lako curuma.”¹⁴

Na Parofita o Josefa Simici sara mada ga a sotava e dua na bogi-va vakaitamera. O nanuma beka na nona vakatakekere? “Oi kemuni na Kalou, ko ni sa tiko evei? Evei na vale ni vakaruru sa ubia na nomuni ivunivuni?”⁹ Ni da vakabauti Koya, eda rawa ni namaka e dua na isaunitaro me vaka: “Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu.”¹⁶

E dua tale na itukutuku eda rawa ni vulica mai na italanoa kei Lasarusa sa ikoya na cava beka na noda itavi ena veivuke vakalou eda vakasaqara. Ni torova yani o Jisu na ibulubulu, a kaya taumada o Koya vei ira era tu ekea, “Dou kauta tani na vatu.”¹⁷ Ena kaukauwa a tu vua na iVakabula, e sega li ni rawa vei Koya me tosoya vakarawarawa walega na vatu ena cakamana? Oqo ke a dua na ka vakasakiti me laurai ka dua na ka sotavi guiguilecavi dredre, ia a kaya ga o Koya vei ira, “Dou kauta tani na vatu.”

Na ikarua, na Turaga, “sa kaci ena domolevu, Lasarusa, lako mai.”¹⁸ E sega beka ni na vakasakiti cake ke a cakava na Turaga vakai Koya me biuti Lasarusa ena cakamana ena icurucuru me rawa ni laurai vinaka kina o koya vei ira na lewevuqa ni sa kautani na vatu?

iKatolu, ni sa lako mai o Lasarusa, o koya a “viviraki tu na ligana kei na yavana e nai sole ni mate: ka viviraki na uluna ena dua na itavoi. Sa kaya vei ira ko Jisu, Dou sereki koya, ka laiva me lako.”¹⁹ Au kila ni sa rawa vua na Turaga me cakava me vakaturi Lasarusa tu ena icurucuru, ka savasava rawa tu ka rawa ni torovi yani ni lobi vinaka koto na nona sole ni mate.

Na cava na inaki ni kena vakabibitaki na tikina eso oqo? Na ka e tolu yadua oqo eratou a tautauvata—e sega ni dua a gadrevi kina na vakayagataki ni kaukauwa vakalou i Karisito. Na ka eratou rawa ni cakava na Nona tisaipeli, a vakaroti iratou o Koya me ratou cakava. A rawa dina vei iratou na tisaipeli me kauta tani na vatu vakataki iratou ga; O Lasarusa, ni vakaturi oti, a rawa ni tucake ka vakaraitaki koya mai ena icurucuru ni qara; ka o ira era lomani Lasarusa a rawa dina ni vukei koya me sereka tani na sole ni mate.

Ia, sai Karisito duadua ga a tu vua na kaukauwa kei na lewa me vakaturi Lasarusa mai na mate. Na noqu kurabui sa ikoya ni iVakabula e namaki keda me da cakava na ka kece eda rawa ni cakava, ka na cakava o Koya na ka o Koya duadua gae rawa ni cakava.²⁰

Eda kila ni “vakabauta [ena turaga o Jisu Karisito] sa ikoya e dua na ivakavuvuli ni cakacaka”²¹ kei na “caka mana e sega ni solia na vakabauta ia na vakabauta kaukauwa sa ikoya e bucini mai na talairawarawa ki na kosipeli i Jisu Karisito. Ena dua tale na kena ivosavosa, na vakabauta e lako mai na bula savasava.”²² Ni da segata meda caka vinaka ena vakayacori kei na maroroi ni veiyalayalati tabu kei na bulataki ni ivakavuvuli i Karisito ena noda bula, na noda vakabauta ena sega walega ni rauta vinaka me kauti keda yani ki na ikava ni bogi, ia ena veivuke ni Turaga eda na rawa ni kauta tani na vatu era tu ena noda salatu, meda tacake mai na yalolailai, ka sereki keda mai na ka kecega e vauci keda tu. E dina ni namaki keda tu na Turaga meda “kitaka na veika kecega eda rawata,”²³ meda nanuma tiko ni na vakarautaka o Koya na veivuke e gadrevi ena veika kece oqo ni da vakabauti Koya.

Ena rawa vakacava meda kauta tani na vatu ka tara na noda yavu ena Nona vatu?²⁴ Eda rawa ni muria na ivakasala ni parofita.

Me ivakaraitaki, a vakamasuti keda o Peresitedi Russell M. Nelson ena Okotova sa oti meda karona na noda ivakadinadina ni iVakabula kei na Nona kosipeli, meda cakacakataka ka susuga, meda vakania ena dina, ka meda kua ni vakaduka ena nodra vuku lasu na tawavakabauta. A yalataka o Koya vei keda yadua, “Ni o tomana tiko mo vaqaqacotaka na nomu ivakadinadina kei Jisu Karisito me ka bibi duadua vei iko, o na qai sarava na cakamana ena yaco ki na nomu bula.”²⁵

Eda rawa ni cakava na ka oqo!

E rawa vakacava meda tucake ka lako mai? Eda rawa ni veivutuni ena reki ka digitaka meda muria na ivunau. A kaya na Turaga, “Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua.”²⁶ Eda rawa ni segata meda veivutuni e veisiga ka toso ki liu ena reki ena dua na yalo lomasoli e sinai tu ena loloma me baleta na Turaga.

Eda rawa ni cakava na ka oqo!

Ena rawa vakacava, ena veivuke ni Turaga, meda sereki keda mai na ka kecega e vauci keda tu? Me imatai ka liu duadua oya meda vauci keda vakainaki kivua na Tamada Vakalomalagi kei na Luvena, Jisu Karisito, ena veiyalayalati. A vakatavulica o Elder D. Todd Christofferson: “Na cava na ivurevure ni [noda] kaukauwa vaka bula savasava ka vakayalo, ka da na rawata beka vakacava? Na ivurevure sa ikoya na Kalou. Na noda rawa ni yacova na kaukauwa oqori sa ikoya na noda veiyalayalati kei Koya. Ena veidinadinati vakalou oqo, na Kalou e vauci Koya me tokoni, vakasavasavataki, ka vakacerecerei keda me isau ni noda yalayala meda qaravi Koya ka muria Nona ivunau.”²⁷ Eda rawa ni vakayacora ka maroroya na veiyalayalati tabu.

Eda rawa ni cakava na ka oqo!

“Dou kauta tani na vatu.” “Lako mai.” “Dou sereki koya ka laiva me lako.”

iVakasala, ivakaro, kei na veiyalayalati. Eda rawa ni cakava na ka oqo!

A yalataka o Elder Jeffrey R. Holland, “Eso na veivakalougatataki e lako totolo mai, eso e lako bera mai, ka so e sega ni lako mai me yacovi lomalagi; ia vei ira ka ciqoma na kosipeli i Jisu Karisito, era lako mai.”²⁸

Ia emuri, “Okoya mo dou marau kina, ka kakua ni rere, ni’u sa tiko vata kei kemudou koi Au na Turaga, ka’u na tu e yasamudou.”²⁹

Oqo na noqu ivakadinadina, ena yaca tabu i Koya ka na dau lako tu ga mai, sai Jisu Karisito, emeni.