Id-Dieċmi: Niftaħ it-Twieqi tas-Sema
It-twieqi tas-sema jinfetħu b’diversi modi. Afdaw fl-orarju tal-Mulej; il-barkiet dejjem jaslu.
Waqt li kont ninsab fl-Amerika t’Isfel, Brother Roger Parra mill-Veneżwela qasam miegħi din l-esperjenza:
“Fl-2019 il-Veneżwela inħakmet minn problemi kbar li wasslu biex għamilna ħamest ijiem bla dawl.
“Fit-toroq kienet tirrenja d-diżordni u l-anarkija, u bosta nies iddisprati ma kellhomx biżżejjed x’jieklu.
“Xi wħud bdew jisirqu mill-ħwienet tal-ikel, u bdew jeqirdu kulma jiġi quddiemhom.
“Bħala sid ta’ forn żgħir, kont qed ninkwieta ħafna għall-ħanut tiegħi. Bħala familja, iddeċidejna li nagħtu l-ikel kollu li kien hemm fil-forn tagħna lin-nies fil-bżonn.
“Lejl minnhom mill-aktar mudlam qamu irvellijiet ma’ kullimkien. L-uniku nkwiet li kelli kien is-sigurtà tal-għażiża marti u l-għeżież uliedi.
“L-għada filgħodu mort fil-ħanut tal-forn. Kull negozju tal-ikel li kien hemm qrib tiegħi kien ġie meqrud minn dawk li bdew jissakkeġġjaw, iżda b’għaġeb kbir għalija, il-forn tagħna baqa’ intatt. Ma kienu qerdu xejn minnu. B’umiltà jiena rringrazzjajt lil Missieri fis-Smewwiet.
“Meta wasalt id-dar, jiena għedt lill-membri tal-familja tiegħi bil-barka u l-protezzjoni ta’ Alla.
“Ilkoll kienu grati ferm.
“Ibni l-kbir, Rogelio, li kellu biss 12-il sena, qal, ‘Papà! Jiena naf għalfejn il-ħanut tagħna ġie protett. Inti u l-Mamà dejjem tħallsu d-dieċmi tagħkom.’”
Brother Parra temm jgħid: “Feġġ f’moħħi kliem Malakija. ‘Minħabba fikom inċanfar il-ġrad wikkiel biex ma jeqridilkomx il-frott tal-art’ [Malakija 3:11]. Aħna nżilna għarkupptejna u bi gratitudni rringrazzjajna lil Missierna fis-Smewwiet għall-miraklu tiegħu.”1
Ejjew Ġarrbuni
Dak kollu li għandna u dak kollu li aħna ġej minn Alla. Bħala dixxipli ta’ Kristu, aħna minn rajna naqsmu li għandna ma’ dawk ta’ madwarna.
Minn dak kollu li tana l-Mulej, Huwa talabna lura biex nagħtu lilu u lis-saltna tiegħu 10 fil-mija tal-qliegħ tagħna. Huwa wiegħed li hekk kif aħna nkunu onesti fid-dieċmi tagħna, Huwa “jiftaħ … it-twieqi tas-sema, u jsawwab fuqna … barka, bl-abbundanza.”2 Huwa wiegħed li sejjer jipproteġina mill-ħażen.3 Dawn il-wegħdiet tant huma ċerti,4 li l-Mulej iddikjara, “Ejjew ġarrbuni,”5 frażi li ma nsibuha fl-ebda post ieħor fl-iskrittura, għajr meta nikkwotaw lil Malakija.
It-twieqi tas-sema jinfetħu b’diversi modi. Xi wħud huma temporali, iżda ħafna huma spiritwali. Xi wħud huma sottili u faċli ma tindunax bihom. Afdaw fl-orarju tal-Mulej; il-barkiet dejjem jaslu.
Aħna nitnikktu ma’ dawk li qed isibuha diffiċli biex ikollhom il-bżonnijiet tal-ħajja. M’ilux il-Knisja tat 54 miljun dollaru Amerikan biex tipprovdi s-solliev lil tfal u ommijiet vulnerabbli madwar id-dinja.6 U bl-għajnuna tal-offerti mis-sawm tagħkom ta’ kull xahar, l-isqfijiet twajbin tagħna jgħinu eluf ta’ nies kull ġimgħa li b’mod temporali jeħtieġu l-ikel fuq il-mejda tagħhom, l-ilbies fuq daharhom, u saqaf fuq rashom. L-unika soluzzjoni permanenti għall-faqar ta’ din id-dinja huwa l-evanġelju ta’ Ġesù Kristu.7
Kwistjoni ta’ Fidi
L-Appostlu Pawlu wissiena li l-għerf tal-bnedmin jifhem il-ħwejjeġ tal-bnedmin iżda jsibha diffiċli jifhem il-ħwejjeġ ta’ Alla.8 Id-dinja titkellem dwar id-dieċmi f’termini ta’ flusna, iżda l-liġi sagra tad-dieċmi hija primarjament kwistjoni li tirrigwarda l-fidi tagħna. Li nkunu onesti fid-dieċmi tagħna huwa mod kif aħna nuru r-rieda tagħna li npoġġu l-ewwel lill-Mulej f’ħajjitna, qabel il-problemi u l-interessi tagħna. Inwegħidkom li hekk kif tafdaw fil-Mulej, wara intom tesperjenzaw il-barkiet tas-smewwiet.
Ġesù qal “agħtu lil Ċesari dak li hu ta’ Ċesari, u lil Alla dak li hu ta’ Alla.”9 Il-Mulej imqajjem mill-imwiet talab lin-Nefiti biex jiktbu fl-annali tagħhom il-wegħdiet tiegħu li nsibu f’Malakija.10 Fi żmienna, il-Mulej ikkonferma mill-ġdid il-liġi divina tad-dieċmi, filwaqt li ddikjara: “Dan għandu jkun il-bidu tad-dieċmi tal-poplu tiegħi. U huma għandhom iħallsu għaxra fil-mija tal-interessi tagħhom ta’ kull sena; u din għandha tkun liġi li tibqa’ għal dejjem.”11
Il-Mulej uriena b’mod ċar kif għandha taħdem id-dieċmi, fejn qal “Ġibuhom sħaħ id-dieċmi fit-teżor,”12 jiġifieri li għandna nġibu d-dieċmi fis-saltna rrestawrata tiegħu, Il-Knisja ta’ Ġesù Kristu tal-Qaddisin tal-Aħħar Żmien.13 Huwa talab biex l-użu ta’ dawn id-dieċmi sagri għandhom jiġu jikkunsidrati bl-għajnuna tat-talb minn kunsill magħmul mill-Ewwel Presidenza, mill-Kworum tat-Tnax-il Appostlu, mill-Veskovat li Jippresedi, “u permezz tal-istess leħen tiegħi lilhom, jgħid il-Mulej.”14
Il-Fondi Sagri tal-Mulej
Dawn il-fondi sagri mhumiex tal-mexxejja tal-Knisja. Huma tal-Mulej. Il-qaddejja tiegħu huma mill-aktar konxji tan-natura sagra tal-amministrazzjoni tiegħu.
Il-President Gordon B. Hinckley irrakkonta din l-esperjenza minn tfulitu: “Meta kont għadni tifel għamilt mistoqsija lil missieri … dwar l-infiq tal-fondi tal-Knisja. Huwa fakkarni li l-obbligu tiegħi, mogħti lili minn Alla, kien li nħallas id-dieċmi u l-offerti. Meta nagħmel dan, [missieri qal,] li dak li jien nagħti ma jibqax aktar tiegħi. Isir tal-Mulej li lilu jien nikkonsagrah.” Missieru kompla jgħid: “Dak li jagħmlu bih l-awtoritajiet tal-Knisja mhux biċċa [tiegħek, Gordon]. Huma jridu jagħtu rendikont lill-Mulej, li jitlob minnhom li jiġġustifikaw għemilhom.”15
Aħna verament inħossu l-piż li rridu “nagħtu rendikont lill-Mulej.”
Id-Dieċmi u l-Offerti Ġenerużi Tagħkom
Mid-dieċmi u l-offerti ġenerużi li intom ikkonsagrajtu lill-Mulej, is-sena l-oħra aktar minn biljun dollaru Amerikan intużaw biex jiġu mbierka dawk li huma fil-bżonn.16
Bħala parti mir-responsabbiltà tant kbira li nieħdu l-evanġelju rrestawrat madwar id-dinja, aħna għandna ’l fuq minn 71,000 missjunarju iservu f’414-il missjoni.17 Grazzi għad-dieċmi u l-offerti tagħkom, il-missjunarji, irrispettivament x’inhi s-sitwazzjoni finanzjarja tal-familja tagħhom, għandhom iċ-ċans li jservu.
Madwar id-dinja qed jinbnew tempji b’rata li qatt ma rajna qabel. Bħalissa, hawn joperaw 177 tempju, hawn 59 li bħalissa jinsabu taħt kostruzzjoni jew rinnovazzjoni, u 79 oħra fi stadju ta’ pjanar u disinn.18 Id-dieċmi tagħkom qed jippermettu li l-barkiet tat-tempju jiġu fis-seħħ f’postijiet li l-Mulej biss jista’ jbassar.
Hawn aktar minn 30,000 kongregazzjoni li tattendi f’eluf ta’ kappelli u faċilitajiet oħra f’195 pajjiż u territorju.19 Grazzi għad-dieċmi tagħkom frott tal-fedeltà tagħkom, il-Knisja qed tiġi mwaqqfa f’postijiet imbiegħda li forsi qatt m’intom se żżuru fost Qaddisin twajba li forsi qatt mhu se ssiru tafuhom.
Bħalissa l-Knisja qed tisponsorja ħames istituzzjonijiet ta’ tagħlim ogħla.20 Huma jservu ’l fuq minn 145,000 student. Bħalissa kull ġimgħa qed jiġu mgħallma mija u għaxart elef klassi fis-seminarji u Istituti tagħna.21
Dawn il-barkiet u tant oħrajn jaslu fil-parti l-kbira minn żgħażagħ u anzjani ta’ kull ċirkustanza ekonomika li jħallsu dieċma onesta.
Il-qawwa spiritwali tal-liġi divina tad-dieċmi ma nkejluhiex mill-ammont ta’ flus li jingħataw, għax kemm dawk li għandhom ħafna ġid kif ukoll il-foqra huma ordnati mill-Mulej biex jikkontribwixxu 10 fil-mija tad-dħul tagħhom.22 Il-qawwa niksbuha meta aħna nafadw fil-Mulej.23
Il-bqija tal-abbundanza tal-Mulej li hi riżultat tad-dieċmi ġenerużi tagħkom saħħet ir-riservi tal-Knisja, u tipprovdi opportunitajiet biex imexxu ’l quddiem il-ħidma tal-Mulej lil hinn minn kull ħaġa li esperjenzajna s’issa. Kollox hu magħruf għall-Mulej, u fil-ħin opportun, għad naraw l-għanijiet sagri tiegħu jiġu fis-seħħ.24
Il-Barkiet Niksbuhom b’Diversi Modi
Il-barkiet tad-dieċmi nirċevuhom b’diversi modi. Fl-1998, jien mort nakkumpanja lil dak li dak iż-żmien kien il-Presbiteru Henry B. Eyring f’laqgħa kbira tal-Knisja fir-reġjun f’Utah li issa hu magħruf bħala Silicon Slopes, komunità ta’ innovazzjoni kbira fit-teknoloġija. Kien żmien ta’ prosperità dejjem tikber, u l-Presbiteru Eyring wissa lill-Qaddisin biex ma joqogħdux iqabblu dak li għandhom ma’ dak li għandu ħaddieħor u jixtiequ li jkollhom aktar. Il-wegħda tiegħu ma ninsieha qatt, li hekk kif huma jħallsu dieċma onesta, ix-xewqa tagħhom li jkollhom aktar ġid materjali tonqos. Fi żmien sentejn, il-bużżieqa tat-teknoloġija nfaqgħet. Intilfu bosta impjiegi, u l-kumpaniji bdew isibuha diffiċli f’dan iż-żmien ta’ tibdil finanzjarju. Dawk li mxew wara l-parir tal-Presbiteru Eyring kienu mberkin.
Il-wegħda tiegħu fakkritni f’esperjenza oħra. Jiena ltqajt ma’ Charlotte Hlimi, li kellha 12-il sena, ħdejn Carcassonne, fi Franza, fl-1990, meta kont qed inservi bħala president tal-missjoni. Il-koppja Hlimi kienu nies fidili li kienu jgħixu f’appartament flimkien ma’ tmint itfal. Mal-ħajt kellhom stampa tas-Salvatur u tal-profeta. Waqt l-intervista għall-barka patrijarkali tagħha, jien staqsejt lil Charlotte jekk kenitx ħallset dieċma onesta. Hija wieġbet, “Iva, President Andersen. Ommi għallmitni li jekk inħallsu d-dieċmi tagħna aħna nistgħu niksbu barkiet kemm temporali kif ukoll spiritwali. Ommi għallmitni li jekk aħna nħallsu dejjem id-dieċmi tagħna, ma jkun jonqosna xejn. U President Andersen, aħna ma jonqosna xejn.”
Hekk kif tatni permess biex naqsam l-istorja tagħha, Charlotte, li issa għandha 45 sena u ġiet issiġillata fit-tempju, qalet: “Dak iż-żmien it-testimonjanza tiegħi tad-dieċmi kienet mill-aktar reali, u llum hija aktar b’saħħitha. Jiena mill-aktar grat għal dan il-kmandament. Hekk kif inkompli ngħixu jien inkompli niġi mbierka b’mod aktar abbundanti.”25
Xi darba, aħna lkoll se ntemmu l-vjaġġ tagħna fid-dinja. Ħamsa u għoxrin sena ilu, ftit jiem biss qabel mal-kunjata tiegħi, Martha Williams, mietet bil-kanċer, hija rċeviet ċekk żgħir bil-posta. Hija minnufih talbet lil marti Kathy biex tagħtiha l-ktieb taċ-ċekkijiet biex tħallsa id-dieċmi tagħha. Peress li ommha kienet dgħajfa wisq li bilkemm kienet tiflaħ tikteb, Kathy staqsietha jekk reditx li tiktbilha ċ-ċekk. Ommha wieġbet, “Le Kathy. Irrid niktbu jiena stess.” U mbagħad b’leħen sieket kompliet, “Irrid inkun denja quddiem il-Mulej.” Waħda mill-aħħar ħwejjeġ li Kathy għamlet għal ommha kienet li ħaditilha l-envelop bid-dieċmi tagħha għand l-isqof tagħha.
Il-Ħidma Importanti ta’ Alla
Ħuti, Il-Knisja ta’ Ġesù Kristu tal-Qaddisin tal-Aħħar Żmien tinsab “’l barra mill-oskurità,”26 u qed twassal barkiet meraviljużi lin-nies madwar id-dinja. Se jkun hemm min jieħu gost li ninsabu mexjin ’il quddiem u se jkun hemm min le. Ġie f’moħħi l-kliem tal-għaref Gamaljel, li, meta sema’ bil-mirakli ta l-Appostli Pietru u Ġwanni, widdeb lill-membri tal-kunsill f’Ġerusalemm:
“Ħallukom minn dawn in-nies u itilquhom: għax jekk … ħidma tagħhom ġejja mill-bnedmin, għad tisfa fix-xejn:
“Iżda jekk hi ġejja minn Alla, ma jseħħilkomx teqirduhom … ma ssibux ruħkom li qegħdin teħduha kontra Alla.”27
Jien u intom parti mill-ħidma importanti ta’ Alla fid-dinja. Hija mhux se tisfa fix-xejn iżda se tkompli miexja ’l quddiem madwar id-dinja, tħejji t-triq għar-ritorn tas-Salvatur. Nixhed għal dak li qal il-President Russell M. Nelson: “Fil-jiem li ġejjin, se naraw l-akbar manifestazzjoni tal-qawwa tas-Salvatur li d-dinja qatt rat. Bejn issa u ż-żmien li fih Huwa jerġa’ lura … Huwa se jsawwab numru bla għadd ta’ privileġġi, barkiet, u mirakli fuq il-fidilil.”28
Din hi x-xhieda tiegħi. Ġesù hu l-Kristu. Din hi l-ħidma qaddisa tiegħu. Huwa se jerġa’ jiġi. F’isem Ġesù Kristu, ammen.