Il-Verità Eterna

Wara li jien u marti, Anne, irċevejna sejħa biex inservu bħala mexxejja tal-missjoni full-time, il-familja tagħna konna determinati li nitgħallmu l-isem ta’ kull missjunarju qabel naslu fl-għalqa tal-missjoni. Aħna ksibna ritratti, ħloqna flashcards, u bdejna nistudjaw l-uċuħ u nimmemorizzaw l-ismijiet.

Meta wasalna, aħna għamilna numru ta’ konferenzi introduttorji mal-missjunarji. Hekk kif bdejna niltaqgħu magħhom, smajt lit-tifel tagħna ta’ disa’ snin jgħid:

“Qed nieħu gost niltaqa’ miegħek Sam!”

“Minn fejn inti Rachel?”

“Mamma mija, David, kemm int twil!”

Xi ftit allarmat, mort fuq ibni u minn taħt l-ilsien għidtlu, “Isma’, tajjeb niftakru għandna nirreferu għall-missjunarji bħala Presbiteru jew Sister.”

Huwa ħares lejja xi ftit konfuż u qal, “Pa, ħsibt li suppost kellna nimmemorizzaw isimhom.” It-tifel tagħna għamel dak li ħaseb li kellu jagħmel skont kif fehem hu.

Għalhekk, x’inhu l-għarfien tal-verità fid-dinja tal-lum? Aħna kontinwament ninsabu bbumbardjati b’opinjonijiet qawwija, b’rappurtar preġudikat, u dejta mhux kompluta. Fl-istess ħin, il-volum u s-sorsi ta’ din l-informazzjoni jipproliferaw. Il-ħtieġa tagħna li nagħrfu l-verità qatt ma kienet aktar importanti.

Il-verità hi mill-aktar importanti biex aħna nistabbilixxu u nsaħħu r-relazzjoni tagħna ma’ Alla, insibu l-paċi u l-hena, u nilħqu l-potenzjal divin tagħna. Illum, ejjew nikkunsidraw il-mistoqsijiet li ġejjin:

• X’inhi l-verità, u għalfejn hi importanti?

• Kif nistgħu nsibu l-verità?

• Meta nsibu l-verità, kif nistgħu naqsmuha ma’ ħaddieħor?

Il-Mulej għallimna fl-iskrittura li “il-verità hija l-għarfien tal-ħwejjeġ kif verament huma, kif kienu u kif se jkunu” (Doctrine and Covenants 93:24). Ma “ġietx maħluqa jew magħmula” (Doctrine and Covenants 93:29) u “m’għandiex tmiem” (Doctrine and Covenants 88:66).¹ Il-verità hija assoluta, ma tinbidilx, u immutabbli. Fi kliem ieħor, il-verità hija eterna.²

Il-verità tgħinna nevitaw il-qerq,³ nagħrfu t-tajjeb mill-ħażin,⁴ nirċievu l-protezzjoni,⁵ u nsibu l-faraġ u l-fejqan.⁶ Il-verità tista’ wkoll tiggwida għemilna,⁷ twassalna biex inkunu ħielsa,⁸ tqaddisna,⁹ u tmexxina lejn il-ħajja ta’ dejjem.¹⁰

Alla jiżvelalna l-verità eterna permezz ta’ network ta’ relazzjonijiet rivelatorji li tinvolvi lilu nnifsu, lil Ġesù Kristu, l-Ispirtu s-Santu, lill-profeti, u lilna. Ejjew niddiskutu l-irwoli distinti madankollu interkonnessi li kull parteċipant għandu f’dan il-proċess.

L-ewwel, Alla hu is-sors tal-verità eterna.¹¹ Hu u Ibnu, Ġesù Kristu,¹² għandhom għarfien perfett tal-verità u dejjem jaġixxu f’armonija ma’ prinċipji u liġijiet vera.¹³ Din il-qawwa tagħtihom iċ-ċans li joħolqu u jiggvernaw id-dinjiet¹⁴ kif ukoll li jħobbu, jiggwidaw, u jieħdu ħsieb lil kull wieħed u waħda minna b’mod perfett.¹⁵ Huma jridu li aħna nifhmu u napplikaw il-verità ħalli aħna nkunu nistgħu ngawdu l-barkiet li jgawdu Huma.¹⁶ Huma jafu jgħaddulna l-verità wiċċ imb wiċċ jew, b’mod aktar tipiku, permezz tal-Ispirtu s-Santu, tal-anġli, jew tal-profeti ħajjin.

It-tieni, l-Ispirtu s-Santu jagħti xhieda tal-verità kollha.¹⁷ Huwa jiżvelalna ċerti veritajiet b’mod dirett u jixhed dwar verità mgħallma minn ħaddieħor. Is-suġġerimenti mingħand l-Ispirtu tipikament jaslu bħala ħsibijiet f’moħħna u sentimenti f’qalbna¹⁸

It-tielet, il-profeti jirċievu l-verità mingħand Alla u jaqsmu dik il-verità magħna.¹⁹ Aħna nitgħallmu l-verità mill-profeti tal-passat fl-iskrittura²⁰ u mill-profeti ħajjin waqt il-konferenza ġenerali u permezz ta’ mezzi uffiċjali oħra.

Finalment, jien u intom għanda rwol kruċjali x’nilagħbu f’dan il-proċess. Alla jistenna li aħna nfittxu, nagħrfu, u naġixxu skont il-verità. L-abbiltà tagħna li nirċievu u napplikaw il-verità tiddependi fuq il-qawwa tar-relazzjoni tagħna mal-Missier u mal-Iben, ir-rispons tagħna għall-influwenza tal-Ispirtu s-Santu, u l-allenjament tagħna mal-profeti tal-aħħar żmien.

Jeħtieġ li niftakru li Satana jaħdem biex iżommna ’l bogħod mill-verità. Huwa jaf li mingħajr il-verità, ma nistgħux niksbu l-ħajja ta’ dejjem. Huwa jinseġ ċerti veritajiet mal-filosofiji tad-dinja biex iħawwadna u jaljenana minn dak li Alla qed jipprova jikkomunika magħna.²¹

Hekk kif infittxu l-verità eterna,²² iż-żewġ mistoqsijiet li ġejjin jistgħu jgħinuna nagħrfu jekk xi kunċett ġej minn Alla jew minn xi sors ieħor:

• Il-kunċett li qed jiġi mgħallem huwa konsistenti mal-iskrittura u mal-profeti ħajjin?

• Qed ikolli konferma mingħand l-Ispirtu s-Santu dwar dan il-kunċett?

Alla jiżvela l-veritajiet duttrinali permezz tal-profeti, u l-Ispirtu s-Santu jikkonferma dawk il-veritajiet u jgħinna napplikawhom.²³ Jeħtieġ li nfittxu u nkunu preparati biex nirċievu dwar is-suġġerimenti spiritwali meta jiġu.²⁴ Aħna l-aktar li aħna riċettivi għax-xhieda tal-Ispirtu meta nkunu umli,²⁵ nitlobu b’mod sinċier u nistudjaw il-kliem ta’ Alla,²⁶ u nħarsu l-kmandamenti tiegħu.²⁷

Ladarba l-Ispirtu s-Santu jikkonfermalna xi verità speċifika, l-għarfien tagħna jikber hekk kif inpoġġu dak il-prinċipju fil-prattika. Maż-żmien, hekk kif ngħixu b’mod konsistenti dak il-prinċipju, aħna niksbu għarfien ċert ta’ dik il-verità.²⁸

Per eżempju, jiena għamilt ċerti żbalji u ħassejt fija rimors għall-għażliet xejn tajbin. Iżda permezz tat-talb, tal-istudju, u l-fidi f’Ġesù Kristu, jiena rċevejt xhieda tal-prinċipju tal-indiema.²⁹ Hekk kif jien komplejt nindem, l-għarfien tiegħi tal-indiema spiċċa ssaħħaħ. Jien ħassejtni eqreb ta’ Alla u Ibnu. Issa jien naf li d-dnub jista’ jinħafer permezz ta’ Ġesù Kristu, għaliex nesperjenza l-barkiet tal-indiema kuljum.³⁰

Għalhekk, x’għandna nagħmlu meta nfittxu sinċerament il-verità li għadha mhux żvelata? Jien għandu empatija lejn dawk fostna li jixtiequ tweġiba li qisha mhu se tasal qatt.

Lil Joseph Smith, il-Mulej qallu, “Iskot sakemm jien nara li kollox jiġi żvelat … dwar din il-ħaġa” (Doctrine and Covenants 10:37).

U lil Emma Smith, spjegalha, “Toqgħodx tgerger minħabba dak li għadek ma tistax tara, għax għalissa għadu mhux żvelat lilek u lid-dinja, u fl-għerf tiegħi jiġi żvelat skont l-orarju tiegħi” (Doctrine and Covenants 25:4).

Jien ukoll fittixt tweġiba għal mistoqsijiet sinċiera. Ċerti misoqsijiet ġew imwieġba; oħrajn le.³¹ Hekk kif nibqgħu sodi—nafdaw fl-għerf u fl-imħabba ta’ Alla, inħarsu l-kmandamenti tiegħu, u nafdaw f’dal li aħna nafu—Huwa jgħinna nsibu l-paċi sakemm Huwa jiżvela l-verità ta’ kollox.³²

Meta nkunu qed infittxu l-verità, jgħin li aħna nifhmu d-differenza bejn duttrina u polisi. Duttrina tirreferi għall-veritajiet eterni, bħan-natura tad-Divinità, il-pjan tas-salvazzjoni, u -sagrifiċċju espjatorju ta’ Ġesù Kristu. Polisi hija l-applikazzjoni tad-duttrina ibbażata fuq iċ-ċirkustanzi kurrenti. Polisi tgħinna namministraw il-Knisja f’mod ordnat.

Filwaqt li d-duttrina qatt ma tinbidel, il-polisi minn żmien għall-ieħor taġġusta ruħha. Il-Mulej jaħdem permezz tal-profeti tiegħu biex isostni d--duttrina tiegħu u biex jimmodifika l-polisis tal-Knisja skont il-ħtiġijiet ta’ wliedu.

Sfortunatament, aħna xi kultant inħawdu l-polisi mad-duttrina. Jekk aħna ma nifhmux id-differenza, nirriskjaw li nsuri disillużi meta jinbidlu l-polisis u nafu anke nibdew niddubitaw l-għerf ta’ Alla jew l-irwol rivelatorju tal-profeti.³³

Meta niksbu l-verità minn Alla, Hu jħeġġiġna biex naqsmu dak l-għarfien ma’ ħaddieħor.³⁴ Aħna nagħmlu dan meta ngħallmu xi klassi, niggwidaw lil xi tifel, jew niddiskutu l-veritajiet tal-evanġelju ma’ xi ħbieb.

L-għan tagħna hu li ngħallmu l-verità b’mod li tistieden il-qawwa li tikkonverti tal-Ispirtu s-Santu.³⁵ Ippermettuli naqsam magħkom ftit stediniet sempliċi mingħand il-Mulej u l-profeti tiegħu li jistgħu jgħinukom.³⁶

1. Iffokaw fuq Missierna fis-Smewwiet, Ġesù Kristu, u d-duttrina fundamentali tagħhom.³⁷

2. Araw li l-bażi tkun dejjem l-iskrittura u l-kliem tal-profeti tal-aħħar żmien.³⁸

3. Ibbażaw fuq duttrina stabbilita permezz ta’ diveri xhieda awtorevoli.³⁹

4. Evitaw l-ispekulazzjoni, l-opinjonijiet personali, jew l-ideat tad-dinja.⁴⁰

5. Il-punt tad-duttrina li tgħallmu għallmuh fil-kuntest tal-veritajiet tal-evanġelju relatati.⁴¹

6. Użaw metodi ta’ tagħlim li jistiednu l-influwenza tal-Ispirtu.⁴²

7. Ikkomunikaw b’mod ċar biex tevitaw li tiġu mifhuma ħażin.⁴³

Kif ngħallmu l-verità jagħmel differenza. Pawlu jħeġġiġna nitkellmu “l-verità b’imħabba” (ara Efesin 4:14–15). Il-verità hija l-akbar ċans kif inbierku lil ħaddieħor meta naqsmuha magħhom b’imħabba Kristjana.⁴⁴

Il-verità mgħallma mingħajr imħabba tista’ twassal għal sentimenti ta’ ġudizzju fuq ħaddieħor, skoraġġiment, u solitudni. Ħafna drabi twassal ukoll għal riżentiment u diviżjoni—anke għal kunflitt. Mill-banda l-oħra, l-imħabba mingħajr verità hija vojta u ma tantx hemm ċans li twassal għat-tkabbir.

Kemm il-verità kif ukoll l-imħabba huma essenzjali għall-iżvilupp spiritwali tagħna.⁴⁵ Il-verità tipprovdi d-duttrina, il-prinċipji, u l-liġijiet neċessarji biex niksbu l-ħajja ta’ dejjem, filwaqt li l-imħabba timmotivana biex inħaddnu dak li hu veru u naġixxu skont dik il-verità.

Jiena għal dejjem grat lejn dawk kollha li bil-paċenzja kollha għallmuni b’imħabba l-verità eterna.

Biex nikkonkludi, ippermettuli naqsam magħkom veritajiet eterni li saru ankra għal ruħna. Jiena sirt naf dawn il-veritajiet billi mxejt wara l-prinċipji li ddiskutejna llum.

Jiena naf li Alla huwa Missierna fis-Smewwiet.⁴⁶ Huwa għandu kull għarfien ,⁴⁷ kull qawwa,⁴⁸ u jaf iħobb b’mod perfett.⁴⁹ Huwa ħoloq pjan għalina biex niksbu l-ħajja ta’ dejjem u nsiru bħalu.⁵⁰

Bħala parti minn dak il-pjan, Huwa bagħat lil Ibnu, Ġesù Kristu, biex jgħinna.⁵¹ Ġesù għallimna biex nagħmlu r-rieda tal-Missier⁵² u nħobbu lil xulxin.⁵³ Huwa patta għal dnubietna⁵⁴ u ta ħajtu għalina fuq is-salib.⁵⁵ Huwa qam mill-mewt wara tlett ijiem.⁵⁶ Permezz ta’ Kristu u l-grazzja tiegħu, aħna se nqumu mill-mewt,⁵⁷ nistgħu niksbu l-maħfra,⁵⁸ u nistgħu nsibu l-qawwa fil-hemm.⁵⁹

Tul il-ministeru tiegħu fid-dinja, Ġesù waqqaf il-Knisja tiegħu.⁶⁰ Maż-żmien, dik il-Knisja nbidlet, u ħafna veritajiet spiċċaw intilfu.⁶¹ Ġesù Kristu rrestawra l-Knisja tiegħu u l-veritajiet tal-evanġelju permezz tal-Profeta Joseph Smith.⁶² U llum, Kristu jkompli jmexxi l-Knisja tiegħu permezz tal-profeti u l-appostli ħajjin.⁶³

Jien naf li hekk kif nersqu lejn Kristu, aħna nistgħu eventwalment “niġu pperfezzjonati fih” (Moroni 10:32), niksbu “milja ta’ hena” (Doctrine and Covenants 93:33), u nirċievu “dak kollu li għandu l-Missier” (Doctrine and Covenants 84:38). Dwar dawn il-veritajiet jiena nixhed fl-isem imqaddes ta’ Ġesù Kistu, ammen.