Aħna Wliedu

Tiftakar l-​esperjenza li kellu l-​profeta Samwel meta l-​Mulej bagħtu fid-​dar taʼ Ġesse biex jidlek lis-​sultan il-​ġdid taʼ Iżrael? Samwel ra lil Elijab, l-​ewwel wild taʼ Ġesse. Jidher li Elijab kien twil u kellu dehra taʼ mexxej. Samwel ra dan u wasal għal konklużjoni. Irriżulta li kienet konklużjoni ħażina, għalhekk l-Mulej għallem lil Samwel: “Tħarisx lejn is-sura tiegħu, jew it-tul taʼ persuntu; … għax il-bniedem iħares lejn l-appartenza, il-Mulej ma jarax bħalma jara l-bniedem, dak biss li jidher fl-għajn, imma l-qalb.”¹

Tiftakar fl-esperjenza li kellu d-dixxiplu Ananija meta l-Mulej bagħtu biex ibierek lil Sawl? Ir-​reputazzjoni taʼ Sawl ippreċedietu, u Ananija kien semaʼ dwar Sawl u l-​persekuzzjoni krudili u bla waqfien tiegħu tal-​Qaddisin. Ananija semaʼ u wasal għal konklużjoni li forsi m’għandux jaqdi lil Sawl. Irriżulta li kienet konklużjoni żbaljata, u l-Mulej għallem lil Ananija, “Hu għodda magħżula minni biex iwassal ismi quddiem il-ġentili, u s-slaten, u wlied Iżrael.”²

X’kien l-​inkwiet taʼ Samwel u Ananija f’dawn iż-​żewġ każijiet? Huma raw bʼgħajnejhom u semgħu bʼwidnejhom, u bʼriżultat ta’ dan, huma għaddew ġudizzju fuq oħrajn ibbażat fuq id-dehra u s-smigħ.

Meta l-kittieba u l-Fariżej raw lill-mara adultera, x’raw? Mara dgħajfa, midinba li ħaqqha l-mewt. Meta raha Ġesù, x’ra? Mara li kienet ċediet temporanjament għad-dgħufija tal-ġisem iżda setgħet terġa’ lura permezz tal-indiema u l-Fidwa Tiegħu. Meta n-nies raw liċ-ċenturjun, li l-qaddej tiegħu kien marid bil-paraliżi, x’raw? Forsi raw persuna ħalliel, barrani, wieħed li għandu jiġi disprezzat. Meta rah Ġesù, x’ra? Bniedem imħasseb għall-ġid ta’ membru tad-dar tiegħu, li fittex lill-Mulej b’sinċerità u fidi. Meta n-nies raw lill-mara bit-tnixxigħa tad-demm, x’raw? Forsi mara maħmuġa, imwarrba li trid tiġi evitata. Meta raha Ġesù, x’ra? Mara marida, solitarja u aljenata minħabba ċirkustanzi li ma kellhiex jedd fuqhom, li ttamat li tfieq u terġa’ tagħmel parti mis-soċjetà.

F’kull każ, il-Mulej ra lil dawn l-individwi għal min kienu u għalhekk għen lil kull wieħed minnhom. Kif iddikjaraw Nefi u ħuh Ġakobb:

“Hu jistedinhom kollha biex jiġu lejh… , iswed u abjad, maqbuda u ħielsa, raġel u mara; u jiftakar fil-ġnus; u li kollha huma simili għal Alla.”³

“Il-wieħed hu prezzjuż f’għajnejh daqs l-ieħor.”⁴

Jalla bl-istess mod ma nħallux l-għajnejna, widnejna jew il-biżgħat tagħna jqarrquna imma niftħu qalbna u moħħna u naqdu liberament lil dawk ta’ madwarna kif għamel Hu.

Xi snin ilu, marti, Isabelle, irċeviet ministeru li ma kienx tas-soltu. Intalbet iżżur armla anzjana fil-qasam tagħna, membru bi sfidi ta’ saħħa u li s-solitudni tagħha ġab imrar f’ħajjitha. Il-purtieri tagħhakienu magħluqin; l-appartament tagħha kien mizgħud bl-affarijiet; hi ma riedet lil ħadd iżurha u għamlitha ċara li “m’hemm xejn li nistaʼ nagħmel għal ħadd.” Mimlija kuraġġ, Isabelle wieġbet, “Iva, hemm! Tista’ tagħmel xi ħaġa għalina billi tħallina niġu nżuruk.” U għalhekk Isabelle marret, mimlija bil-fidi.

Ftit tal-ħin wara, din l-persuna għamlet operazzjoni f’saqajha,u kienet teħtieġ li jinbidlulha l-faxex ta’ kuljum, xi ħaġa li ma setgħetx tagħmel mingħajr għajnuna. Għal ġranet sħaħ, Isabelle marret id-dar tagħha, taħslilha saqajha, u tbidlilha l-faxex. Qatt ma ratha kerha; qatt ma xammitha tinten. Hija ratha biss bħala bint sabiħa ta’ Alla fi bżonn taʼ mħabba u kura tenera.

Matul is-snin, jien u għadd kbir ta’ oħrajn ġejna mbierka bid-don ta’ Isabelle li naraw kif jara l-Mulej. Sew jekk inti l-president tal-wited jew tal-qasam, kemm jekk int ir-re tal-Ingilterra jew tgħix barra, kemm jekk titkellem il-lingwa tagħha jew waħda differenti, kemm jekk tħares il-kmandamenti kollha jew tissielet biex tgħix xi wħud, hi ser isservik bl-aqwa ikla fuq l-aqwa platti tagħha. L-isfond ekonomiku, il-kulur tal-ġilda, l-isfond kulturali, in-nazzjonalità, il-grad ta’ tjieba, il-qagħda soċjali, jew kwalunkwe identifikatur jew tikketta oħra mhuma ta’ ebda konsegwenza għaliha. Hi tara bil-lenti ta’ qalbha; hi tara wild Alla f’kulħadd.

Il-President Russell M. Nelson għallem:

“L-avversarju jifraħ bit-tikketti għax jifirduna u jirrestrinġu l-mod kif naħsbu dwarna nfusna u dwar xulxin. Kemm hi ta’ dieqa meta nonoraw it-tikketti aktar milli nonoraw lil xulxin.

“It-tikketti jistgħu jwasslu għal ġudizzju u animosità. Kwalunkwe abbuż jew preġudizzju lejn ħaddieħor minħabba nazzjonalità, razza, orjentazzjoni sesswali, ġeneru tas-sess, kwalifiċi, kultura, jew xi identifikaturi sinifikanti oħra joffendu lill-Ħallieq tagħna!”⁵

Franza mhux min jien; imma il-post fejn twelidt. Abjad mhux min jien; imma l-kulur tal-ġilda tiegħi, jew in-nuqqas tagħha. Professur mhux min jien; imma dak li kont naħdem biex nsostni lill-familja tiegħi. Awtorità Ġenerali Sebgħin mhux min jien; imma fejn naqdi fis-saltna f’dan iż-żmien.

“L-ewwel u qabel kollox,” kif fakkarna l-President Nelson, jien “wild t’Alla.”⁶ Hekk int, u hekk in-nies l-oħra kollha ta’ madwarna. Nitlob biex inkunu nistgħu naslu għal apprezzament akbar ta’ din il-verità meraviljuża. Tibdel kollox!

Jista’ jkun li trabbejna f’kulturi differenti; jista’ jkun li ġejjin minn ċirkostanzi soċjoekonomiċi differenti; il-wirt mortali tagħna, inkluż in-nazzjonalità tagħna, il-kulur tal-ġilda, il-preferenzi tal-ikel, l-orjentazzjoni politika, eċċ., jistgħu jvarjaw ħafna. Imma aħna wliedu, ilkoll kemm aħna, mingħajr eċċezzjoni. Għandna l-istess oriġini divina u l-istess potenzjal bla limitu permezz tal-grazzja ta’ Ġesù Kristu.

C. S. Lewis jgħidha hekk: “Hi ħaġa serja li tgħix f’soċjetà ta’ allat possibbli, li tiftakar li l-aktar persuna stramba u xejn interessanti li tista’ titkellem magħha xi darba taf tkun kreatura li, li kieku kellek taraha issa, tiġik it-tentazzjoni li taduraha. … M’hawnx nies ordinary. Inti qatt ma tkellimt ma’ sempliċi mortali. Ġnus, kulturi, arti, ċiviltà—dawn huma mortali, u ħajjithom hi għalina bħal ħajja ta’ nemusa. Iżda huma l-immortali li niċċajtaw magħhom, naħdmu magħhom, niżżewġu, ninjoraw, u nisfruttaw.”⁷

Il-familja tagħna kienet privileġġjata li tgħix f’pajjiżi u kulturi differenti; uliedna ġew imberkin li jiżżewġu fi ħdan etniċi differenti. Wasalt biex nirrealizza li l-evanġelju ta’ Ġesù Kristu huwa ekwilibriju kbir. Hekk kif aħna nħaddnuh tassew, “dan l-Ispirtu jixhed flimkien mal-ispirtu tagħna li aħna wlied Alla.”⁸ Din il-verità tal-għaġeb teħlisna, u teħles it-tikketti u d-distinzjonijiet kollha li jistgħu jolqtuna u r-relazzjonijiet ta’ bejnietna “jinbelgħu fi … Kristu.”⁹ Malajr isir ċar li aħna, kif ukoll oħrajn, “għalhekk ma għadkomx aktar barranin u frustieri, imma intom ċittadini flimkien mal-qaddisin u nies tad-dar ta’ Alla”¹⁰

Dan l-aħħar smajt lill-president tal-fergħa ta’ waħda mill-units lingwistiċi multikulturali tagħna jirreferi għal dan, kif għamel il-Presbiteru Gerrit W. Gong, bħala l-appartenenza tal-patt.¹¹ Xʼkunċett sabiħ! Aħna nappartjenu għal grupp ta’ nies li kollha jippruvaw iqiegħdu lis-Salvatur u l-patti tagħhom fiċ-ċentru ta’ ħajjithom u li jgħixu l-evanġelju bil-ferħ. Għalhekk, aktar milli naraw lil xulxin mil-lenti inqas ċara tal-mortalità, l-evanġelju jtejjeb l-ħarsa tagħna u jippermettilna naraw lil xulxin mil-lenti inqas difettusa u li ma tinbidlix tal-patti sagri tagħna. Meta nagħmlu hekk, nibdew neliminaw il-preġudizzji naturali tagħna u l-preġudizzji lejn l-oħrajn, li mbagħad jgħinhom jimminimizzaw il-preġudizzji u l-preġudizzji tagħhom lejna,¹² f’ċiklu virtuż mill-isbaħ. Tabilħaqq, aħna nsegwu l-istedina tal-għażiż profeta tagħna: “Għeżież ħuti, kif nittrattaw lil xulxin hu tassew importanti! Kif inkellmu lil ħaddieħor u kif nitkellmu fuq ħaddieħor fid-dar, fil-knisja, fuq ix-xogħol, u onlajn, huma importanti ħafna. Illum, qed nitlob li aħna ninteraġixxu ma’ ħaddieħor b’mod eqdes u ogħla.”¹³

Illum waranofsinhar, fl-ispirtu ta’ dik l-istedina, nixtieq inżid il-wegħda tiegħi ma’ dik tat-tfal maħbubin tagħna tal-Primarja:

Nixhed li Hu li aħna nsejħu bħala Missierna fis-Smewwiet huwa tabilħaqq Missierna, li jħobbna, li jaf lil kull wieħed minn uliedu mill-qrib, li jimpurtah tassew minn kullħadd, u li aħna tassew bħalu. Nixhed li l-mod kif nittrattaw lil xulxin huwa riflessjoni diretta tal-fehmietna u l-apprezzament għas-sagrifiċċju aħħari u l-Att tal-Fidwa ta’ Ibnu, is-Salvatur tagħna, Ġesù Kristu. Nitlob biex, bħalu, nistgħu nħobbu lil ħaddieħor għax dik hija l-aqwa ħaġa li għandek tagħmel, mhux għax qed jagħmlu t-tajjeb jew joqogħdu fis-sura t-“tajba”. F’isem Ġesù Kristu, ammen.