Suġġerimenti tal-Ispirtu

Mill-Presbiteru Gary E. Stevenson

Tal-Kworum tat-Tnax-il Appostlu

Is-sħubija kostanti tal-Ispirtu s-Santu hija waħda mill-akbar doni spiritwali li l-Qaddisin tal-Aħħar Żmien jista’ jkollhom.

Introduzzjoni

M’ilux, l-għajnejn tad-dinja sportiva kienu ffokati fuq it-Tazza tad-Dinja tal-FIFA 2023 tan-Nisa li saret fl-Awstralja u New Zealand. Atleti ta’ klassi dinjija li kkwalifikaw minn ’il fuq minn 200 tim nazzjonali minn madwar id-dinja wrew il-kuraġġ, id-dedikazzjoni, it-talent, u l-atletiċiżmu tagħhom hekk kif ikkompetew għall-ogħla unur fid-dinja tal-futbol.

Aħna nimmeraviljaw ruħna meta naraw atleti f’numru ta’ sport differenti u f’dixxiplini oħra jiksbu l-ogħla livell tal-arti tagħhom. Aħna nitkellmu dwar it-talenti jew id-doni li tahom Alla. Dawn jinkludu lil dawk li huma kapaċi fiż-żfin, fil-ġinnastika, fil-mużika, fl-arti, fid-drama, fil-matematika, fix-xjenza, u aktar. Kull wieħed u waħda minnhom juru d-doni li tahom Alla li mbagħad jiġu rraffinati u onorati permezz ta’ ħidma, studju, u prattika bla heda. Id-doni mogħtija minn Alla jwasslu għal nies mill-aktar kapaċi.

Neżerċitaw id-Doni Spiritwali

Jekk inħarsu mil-lenti tal-evanġelju, Alla jiddota lil uliedu b’ħafna doni spiritwali, u jagħmilhom nies b’għadd ta’ doni spiritwali. Il-membri tal-Knisja li jżommu l-patti jiġu msawba bid-doni tal-Ispirtu, li jinkludu d-don ta’ testimonjanza ta’ Ġesù Kristu bħala s-Salvatur tagħna, id-don tal-Ispirtu s-Santu, id-don ta’ fidi li jfejqu u jiġu mfejqa, id-don tad-dixxerniment, id-don li jirċievu l-mirakli, u d-doni tal-għerf u l-għarfien.¹ Il-Mulej jistedinna biex b’ħerqa nfittxu l-aqwa doni, sewwasew id-doni spiritwali. Huwa jagħtina d-doni spiritwali biex iberikna u biex nużawhom ħalli nbierku lil ħaddieħor.²

Biex immorru lura għall-analoġija tagħna ta’ nies sportivi u atleti mill-aktar kapaċi, importanti niftakru li d-don biss ma jwassalx biex huma jibbrillaw. Minkejja li jkollhom talent naturali straordinarju, hu permezz ta’ prattika u sforz bir-reqqa u mill-aktar impenjattivi li jwassalhom biex huma jirraffinaw u jtejbu l-mistier tagħhom u b’hekk jilħqu l-ogħla livell possibbli. Anke dawk d-doni li aħna nirċievu u niskopru ħafna drabi jkunu akkumpanjati mill-frażi xejn pjaċevoli “hemm bżonn li timmuntah flimkien.”

Bl-istess mod, jiena osservajt li hemm kurva ta’ tagħlim marbuta mad-doni spiritwali. Li neżerċitaw id-doni spiritwali jitlob minna ċertu eżerċizzju spiritwali. “Biex ikollok il-gwida tal-Ispirtu s-Santu f’ħajtek jeħtieġ minnek ħidma spiritwali. Din il-ħidma tinkludi t-talb ferventi u l-istudju tal-iskrittura konsistenti. Tinkludi wkoll li tħares il-patti tiegħek u l-kmandamenti ta’ Alla. … Tinkludi li kull ġimgħa tieħu sehem b’mod denn fis-sagrament.”³

X’inhuwa l-frott li nirċievu meta neżerċitaw id-doni spiritwali? Dawn jinkludu suġġerimenti mill-Ispirtu li jgħinuna niffaċċjaw il-ħtiġijiet tagħna ta’ kuljum u juruna x’għandna nagħmlu u ngħidu kif ukoll barkiet ta’ paċi u faraġ. Hekk kif aħna nisimgħu u naġixxu skont is-suġġerimenti spiritwali, l-Ispirtu s-Santu jkabbar l-abbiltajiet u l-kapaċitajiet tagħna ferm aktar milli kapaċi nagħmlu aħna mingħajr l-għajnuna tiegħu. Dawn id-doni spiritwali prezzjużi jgħinuna f’kull aspett ta’ ħajjitna.⁴

Is-sħubija kostanti tal-Ispirtu s-Santu hija waħda mill-akbar doni spiritwali li l-Qaddisin tal-Aħħar Żmien jista’ jkollhom.

Kemm hu importanti dan id-don? Il-President Russell M. Nelson wieġeb din il-mistoqsija b’mod kategoriku meta huwa ddikjara li “fiż-żmien li ġej, mhux se jkun possibbli li aħna nkomplu ngħixu spiritwalment mingħajr il-gwida, id-direzzjoni, il-faraġ u l-influwenza kostanti tal-Ispirtu s-Santu.”⁵

Kif nistgħu Nistiednu u Nagħrfu s-Suġġerimenti tal-Ispirtu

Tul il-ministeru kollu tiegħi, skoprejt li hawn xewqa universali minn kulħadd biex ikun jaf kif għandu jistieden u jagħraf is-suġġerimenti tal-Ispirtu s-Santu. Is-suġġerimenti tal-Ispirtu huma xi ħaġa verament personali u nesperjenzawhom b’modi differenti. Aħna, madankollu, imberkin li għandna l-kliem tal-profeti, kemm tal-qedem kif ukoll dawk ta’ żmienna, li jagħtuna ċerti ideat siewja kif nistgħu nirċievu d-direzzjoni mill-Ispirtu.

Ippermettuli ngħidilkom erba’ prinċipji li jiggwidawna li jafu jgħinukom tistiednu u tagħrfu s-suġġerimenti tal-Ispirtu.

Ieqfu f’Postijiet Qaddisa

L-ewwel wieħed hu li tieqfu f’postijiet qaddisa.⁶ M’ilux jiena mort biex nipparteċipa fil-ftuħ għall-pubbliku tat-Tempju ta’ Tokyo, fil-Ġappun. Ir-rispons għal stedina formali mibgħuta kemm lill-midja kif ukoll lil mistednin VIP kien ferm akbar minn dak li stennejna. Mijiet kienu li ngħaqdu f’dawn iż-żjarat iggwidati fit-tempju. Il-mistednin ħassewhom mill-aktar kommossi bis-sbuħija tat-tempju, inkluż id-disinni u l-motifi b’rabtiet kbar mat-tradizzjoni Ġappuniża. Madankollu xi ħaġa li tqanqal il-qalb kienet ir-reazzjoni riverenti u rispettuża li wrew il-mistednin hekk kif l-ordinanzi għall-antenati ġew imfissra lilhom fil-kmamar fejn kienu se jitwettqu. Iżda l-aktar emozzjonalment qawwija kienu dawk li qanqal fihom l-Ispirtu.

Mument partikolari ma’ uffiċjal prominenti tal-gvern baqa’ mnaqqax f’moħħi. Wara mument ta’ silenzju meditattiv fil-kamra ċelestjali, mimli emozzjoni u mill-aktar kommoss, huwa qalli minn taħt l-ilsien, “Anke n-nifs li qed nieħu f’’din il-kamra qed inħossu differenti.” Indunajt li kien qed jipprova jiddeskrivi l-preżenza tal-Ispirtu s-Santu, li, fil-fatt, jgħammar f’postijiet sagri. Jekk tittamaw li tħossu l-Ispirtu, araw li tkunu f’post fejn l-Ispirtu jista’ jgħammar faċilment.

It-tempji u d-djar tagħna huma l-aktar postijiet sagri fost dawn il-postijiet iddedikati kollha. Fihom aħna nistgħu nistiednu u nagħrfu b’mod aktar faċli l-Ispirtu. Postijiet qaddisa oħra jinkludu d-djar tal-laqgħat, il-bini tas-seminarju u l-Istituti, u s-siti tal-istorja tal-Knisja u ċ-ċentri għall-viżitaturi. Ieqfu f’postijiet qaddisa.

Ieqfu ma’ Nies Qaddisa.

It-tieni, ieqfu ma’ nies qaddisa. Jien se niddeskrivi t-tieni prinċipju li jiggwidana permezz ta’ mument ieħor mill-memorja tiegħi.

Qatt ma nista’ ninsa l-parteċipazzjoni tiegħi f’devozzjonali li sar f’arena sportiva mill-aktar popolari. Normalment din l-arena tkun mimlija b’fans storbjużi jissapportjaw lit-tìm favorit tagħhom u forsi anke jinku lit-tìm oppost tagħhom. Iżda f’dik il-lejla, l-atmosfera kienet mill-aktar differenti. L-arena kienet mimlija b’eluf ta’ żgħażagħ miġburin flimkien biex jonoraw u jikkommemoraw il-ħajja tal-Profeta Joseph Smith. It-ton, kwiet u riverenti, il-gratitudni, u l-qalb fi spirtu ta’ talb tagħhom imlew l-arena bil-preżenza tal-Ispirtu s-Santu. Stajt letteralment nara dan fuq wiċċhom. Kien sewwasew id-don tal-Ispirtu s-Santu qed jaħdem, jafferma t-testimonjanzi li huma bdew jaqsmu dwar Joseph Smith u r-Restawrazzjoni tal-evanġelju.

L-Ispirtu ma jistax jibqa’ lura milli jkun preżenti ma’ grupp ta’ nies qaddisa miġburin flimkien. Jekk tittamaw li tħossu l-Ispirtu, araw li tkunu qalb nies fejn l-Ispirtu jista’ jgħammar faċilment. Is-Salvatur qal dan b’dan il-mod: “Għax fejn tnejn jew tlieta jkunu miġbura f’ismi hemm inkun jien f’nofshom.”⁷ Intom iż-żgħażagħ, ikkunsidraw li tkunu f’postijiet fejn hemm nies qaddisa, fil-kworums u l-klassijiet, GħSŻ u s-seminarju, l-attivitajiet tal-qasam u l-wited—anke l-korijiet tal-qasam. Agħżlu li tkunu ma’ nies u tmorru f’postijiet fejn tistgħu ssibu t-tjubija. Sibu l-qawwa tagħkom fl-għaqda ma’ sħabkom. Sibu ħbieb tajbin Kunu ħbieb tajbin. Issapportjaw lil xulxin kull fejn tkunu. Ieqfu ma’ nies qaddisa.

Ixhdu dwar Veritajiet Qaddisa

It-tielet, kemm tistgħu ixhdu dwar veritajiet qaddisa. Il-Farrâġ dejjem isemma’ leħnu meta aħna nixhdu permezz ta’ leħinna. L-Ispirtu jaqsam ix-xhieda tiegħu mal-kelliem kif ukoll mas-semmiegħ.

Darba niftakar kont qed nivvjaġġa f’taxi fi New York għal xi 45 minuta. Wara li kelli konverżazzjoni ħelwa dwar l-evanġelju mas-sewwieq sakemm wasalna l-ajruport, jien ħallastha u ppreparajt biex noħroġ mit-taxi. Hemm irrealizzajt li ma kontx qsamt it-testimonjanza tiegħi dwar dak li kont qsamt magħha. Wara pawsa żgħira, jien qsamt testimonjanza sempliċi u qasira, fejn jien stedint l-Ispirtu, u dan wassal biex biex id-dmugħ ifeġġ f’għajnejna.

Hekk kif tfittxu u tieħdu ċerti opportunitajiet biex taqsmu t-testimonjanza tagħkom ma’ ħaddieħor, intom toħloqu mumenti fejn intom stess tagħrfu l-Ispirtu.

Isimgħu X’Għandu Xi Jgħid l-Ispirtu s-Santu

L-aħħar prinċipju hu li tisimgħu x’għandu xi jgħid l-Ispirtu s-Santu. Hu jista’ jkun is-sieħeb kostanti tagħna iżda Hu jitkellem b’ton sottili u sieket. Il-profeta Elija sab li leħen il-Mulej ma kienx fir-riefnu, fit-theżżiż, jew fin-nar iżda kien “leħen ħelu u sieket.”⁸ Ma kienx “leħen iriegħed,” iżda pjuttost “leħen sieket mill-aktar ħelu, bħallikieku minn taħt l-ilsien,” u madankollu huwa “nifed sewwasew fil-fond ta’ ruħhom.”⁹

Il-President Boyd K. Packer iddikjara: “L-Ispirtu ma jiġbidx l-attenzjoni tagħna bl-għajjat jew billi jibda jċaqlaqna b’xi par idejn goffi. Pjuttost huwa jitkellem b’leħen sieket. Huwa jkellimna bi ħlewwa kbira li jekk inkunu nħossuna priokkupati, nafu lanqas biss inħossuh.”¹⁰ Jien osservajt li xi kultant leħnu tant ikun sottili, jew tant jien inkun priokkupat, li jkun xi ħadd maħbub tiegħi li jgħarrafni bih. Kemm-il darba ġara li s-suġġerimenti tal-Ispirtu s-Santu waslu għandi permezz ta’ marti, Lesa. Ġenituri jew mexxejja twajbin jafu jirċievu wkoll ċerta gwida spirata f’isimkom.

Il-ħoss, l-istorbju, u t-tilwim daqstant prevalenti fid-dinja jafu jitfu xi ftit is-suġġerimenti siekta tal-Ispirtu s-Santu. Sibu post kwiet, xi mkien qaddis fejn tistgħu tfittxu li tirċievu d-direzzjoni mill-Ispirtu.

Ftit ta’ Kliem ta’ Twissija

Hekk kif intom tikkunsidraw dawn il-prinċipji biex tistiednu u tagħrfu l-Ispirtu, ikkunsidraw il-kliem li ġej ta’ twissija u gwida.¹¹

Ikkonfermaw is-suġġerimenti spiritwali tagħkom. Per eżempju, is-suġġerimenti mill-Ispirtu jkunu f’armonija mal-iskrittura u t-tagħlim tal-profeti ħajjin.

Kunu ċerti li s-suġġerimenti li tirċievu jkunu konsistenti ma’ dak li għandkom tagħmlu. Jekk intom ma ġejtux imsejħa permezz ta’ awtorità xierqa, is-suġġerimenti mill-Ispirtu mhux se jiġu mogħtija lilkom biex tagħtu parir jew tikkoreġu lil ħaddieħor.

Il-ħwejjeġ spiritwali ma jistgħux jiġu sfurzati. Intom tistgħu tikkultivaw attitudni u ambjent li jistiednu l-Ispirtu, u tistgħu tħejju lilkom infuskom, iżda intom ma tistgħux tiddettaw kif u meta tasal l-ispirazzjoni. Uru s-sabar u afdaw li intom sejrin tirċievu dak li teħtieġu fil-ħin opportun.

Użaw l-aqwa ġudizzju tagħkom. Xi kultant inkunu rridu nitmexxew mill-Ispirtu f’kollox. Madankollu, ħafna drabi l-Mulej ikun iridna nużaw l-intelliġenza mogħtija lilna b’mod divin u naġixxu b’modi li huma konsistenti mal-aqwa għarfien tagħna. Il-President Dallin H. Oaks għallem:

“Xewqa li niġu mmexxija mill-Mulej hija qawwa, iżda jeħtieġ li tiġi akkumpanjata minn għarfien li Missierna fis-Smewwiet iħalli bosta deċiżjonijiet f’idejna. … Persuni li jippruvaw jitfgħu d-deċiżjoni kollha fuq il-Mulej u jitlobu li jiksbu rivelazzjoni għal kull għażla malajr isibu ċirkustanzi li fihom huma jitolbu għall-gwida u ma jiksbux dak li jridu. …

“Jeħtieġ li nikkontemplaw l-affarijiet f’moħħna. … Imbagħad għandna nitlobu għall-gwida u naġixxu skont l-istess gwida. … Jekk ma nirċevux gwida, jeħtieġ naġixxu skont l-aqwa ġudizzju tagħna.”¹²

Konklużjoni bi Stedina

Bħala konklużjoni, il-Qaddisin tal-Aħħar Żmien għandhom ikunu nies mogħnija li jħarsu l-patti. Madankollu, jeħtieġ li lkoll kemm aħna nfittxu li neżerċitaw id-doni spiritwali tagħna u mbagħad nistiednu u nitgħallmu nagħrfu s-suġġerimenti tal-Ispirtu. Erba’ prinċipji li jiggwidawna li jistgħu jgħinuna f’dan l-isforz spiritwali mill-aktar kruċjali huma:

Ieqfu f’postijiet qaddisa.
Nieqfu ma’ nies qaddisa.
Nixhdu dwar veritajiet qaddisa.
Nisimgħu x’għandu xi jgħid l-Ispirtu s-Santu.

L-abbiltà tagħkom li tistiednu u tagħrfu s-suġġerimenti tal-Ispirtu jiżviluppaw pass wara pass. “Li nsiru aktar intonati mal-lingwa tal-Ispirtu qisu bħal meta nitgħallmu lingwa oħra. Huwa proċess gradwali li jeħtieġ sforz diliġenti u li jieħu ż-żmien.”¹³

Biex immorru lura minn fejn bdejna, jekk jogħġobkom ftakru li bħala Qaddisin tal-Aħħar Żmien intom nies intelliġenti. Immaġinaw ftit din ix-xena waqt Ħadd is-sawm, li ġiet deskritta lili m’ilux. Tifla ċkejkna, wieqfa fuq banketta, bilkemm kienet tidher wara l-pulptu. Missierha kien wieqaf ħdejha biex iħeġġiġha u jgħinha billi jkellimha minn taħt l-ilsien f’widnejha hekk kif b’sens ta’ kburija hija qasmet mal-membri, “Jiena wild Alla.”

It-testimonjanza ta’ wara kienet minn adulta żagħżugħa li bħall-ewwel bdiet tħossha xi ftit eċċitata: “Nixtieq li xi ħadd ikellimni f’widnejja wkoll.” Imbagħad ħasset bħal dawl ta’ ispirazzjoni u bdiet tixhed, “Jien għandi lil xi ħadd ukoll li qiegħed ikellimni f’widnejja—l-Ispirtu s-Santu!”

Jien se nagħlaq bi stedina speċjalment għalikom iż-żgħażagħ kollha! Ħafna minnkom tibdew il-jum billi tieqfu quddiem il-mera. Għada, din il-ġimgħa, din is-sena, dejjem, ieqfu ftit hekk kif intom tħarsu lejn il-mera. Aħsbu ftit, jew jekk tridu għidu lilkom infuskom, “Wow, ħares lejja! Jiena persuna tal-għaġeb! Jiena wild ta’ Alla! Huwa jafni! Huwa jħobbni! Jiena mogħnija b’don—mogħnija bl-Ispirtu s-Santu bħala s-sieħeb kostanti tiegħi!”

Jiena nżid it-testimonjanza tiegħi ma’ tagħkom, intom il-Qaddisin tal-Aħħar Żmien mogħnija, dwar Alla l-Missier, Ġesù l-Kristu u l-Ispirtu s-Santu, li jixhed dwarhom. F’isem Ġesù Kristu, ammen.