O Se Suega o le Faamoani

Patricia: O i maua ma lau uo lelei lava o Francini, o ni isi o nai tagata toaliti o le Ekalesia i le matou aoga i Pasila, ma e tele taimi ma te iloaina ai o mea iti ma te faia e faia ai se eseesega tele.

O se tasi o na mea iti na tupu i se vasega o le matematika i le Aso Toonai na ma i ai faatasi ma Francini. O le aso tonu lava lenei, na le aoga ai Francini. I le taimi o le vasega, na toe tufa mai ai a matou suega na faia i ni nai aso ua mavae. Sa ou le ano tele i le taimi na tuu mai ai e le faiaoga le suega a Francini i luga o la’u kesi ma fai mai ou te alu ma ave i ai.

Talu ai ona ua uma ona ma talanoa ma Francini i tulaga na ma manatu na oo i ai a ma suega, ae sa ou tei i lou vaaia na sili atu ona togi nai lo le mea na ma faamoemoeina. Sa ou tilotilo atu i lana suega ma ou iloa ai na misi i le faiaoga ona faasese se tasi o tali na sese. E aunoa ma sou mafaufauina, sa ou fai atu ai i le faiaoga ua fai si maualuga tele o togi o Francini.

Ae o le mea ou te lei iloaina sa tau fai autilotilo uma mai le vasega ia te au. O le taimi lava na ou tautala ai, na amata ai foi ona faitioina au e le vasega, ma fai mai na sese la’u mea na fai i lau uo, ma sa fai mai ua ou manao ia sili atu ou togi nai lo ia.

Sa ou le mautonu ma sa ou le fiafia i le tali mai a tamaiti o le matou vasega. Na ou mautinoa lava na ou faia le mea ou te iloa na semanu e faia foi e Francini. Ae na fai mai se tasi e le mafai e se tagata ona faamaoni ina ia alu ai i lalo ona lava togi. Na manatu tagata uma o au o se faalata i la’u uo. Sa ou taumafai e ta’u atu ia i latou, ou te iloa o le a faamaoni foi Francini i ona togi ma o loo i ai lava i le lalolagi tagata e sili ona faamaoni.

Ina ua uma le tele o finauga, na tonu loa i le faiaoga ma le vasega o le a latou tofotofoina i ma’ua. Na fai mai le faiaoga o le a ia taofia pea le togi sese o Francini ma o le a matou faatali e vaai pe o le a sona uiga o le a faaalia i le Aso Gafua.

Ou te lei fiafia i lea manatu. Na ou manatu sa le amiotonu le tofotofoina o Francini. Ae na fai lava le faaiuga a le faiaoga, ma sa le mafai ona ou suia.

O le faaiuga o lena vaiaso sa ou popole lava pe o le a le mea o le a tupu, e ui ina sa ou to’a lava o le a faia e Francini le mea sao. Sa ou tatalo faatauanau ina ia ona iloa le mea sese i lana suega.

I le vasega o le matematika i le Aso Gafua, sa nofo mataalia le vasega atoa a o latou taufai autilotilo atu i le aumaiga e Francini o lana suega.

Francini: E lei leva lava ona amata le vasega i le Aso Gafua, ae toe aumai loa e le faiaoga la’u suega o le matematika. Na toeitiiti lava a ou tuueseina e aunoa ma le vaai lelei i ai, ae na ou matauina na maualuga atu ou togi nai lo le mea na ou mafaufauina. Na sii lo’u lima ma ou alu atu i le kesi a le faiaoga. Na ou fesili i ai pe na sa’o lona makaina o le suega, ma sa ia tali mai ioe. Ona ou tusi atu lea i la’u suega ma ou fai atu, “Ae na i ai sa’u mea sese.” I le taimi lena, na alu atu ai foi Patricia i le kesi a le faiaoga ma ta’u atu ia te ia na te le’i makaina se tali sese i lana suega, ae ona o le vevesi i le Aso Toonai, na misi ai i lana vaai.

O le taimi lava lea na vavao ai le vasega. O nisi na amata ona tomumumu e faapea na ta’u mai e Patricia ia te au, ae o isi na ataata mai ma le maasiasi. Sa ou le mautonu i le eseese o uiga faaalia i nei mea na tutupu.

Mulimuli ane, na faamalamalama mai e Patricia le mea na tupu i le Aso Toonai. Na faateia au i le iloaina sa ou sueina se suega e le faatatau i le matematika ma na tali atu tamaiti o le matou vasega i lau uo i se tulaga faapena. Ae peitai, sa ou fiafia ona sa ou faamaoni ma o tatalo a Patricia na fesoasoani e musuia ai au ina ia ou iloaina le mea sese i la’u pepa suega. Ou te faafetai lava ona na talitonuina au e la’u uo.

Patricia ma Francini: Sa ma aoaoina uma se lesona tele lava mai lenei aafiaga. Ua tuputupu ae a ma’ua molimau e uiga i le tiute taua o loo i ai i le Au Paia o Aso e Gata Ai i le avea ai o ni molimau a Iesu Keriso ma ni faataitaiga o Ana aoaoga. Ma te faafetai lava i le Alii ona o Lana talalelei, lea na ma maua ai le avanoa e fai ai se eseesega.