O Se Avanoa e Sui Ai

Ua fitu tausaga talu ona avea au ma se tagata o le Ekalesia. I lena taimi, na ou iloa ai lava ua na o le pau lenei o le Ekalesia moni a le Alii o Iesu Keriso, ae i se tasi taimi o lou olaga, sa ou le toaga ai i le Ekalesia.

O le faafitauli na amata ina ua siitia atu lo matou aiga i se nuu fou. E fitu lelei masina o matou taumafai e sue le nofoaga o le falelotu na tatau ona matou o i ai, ma nai nisi vaiaso e amata ai ona matou o i le lotu. Sa ou le fiafia tele i le suiga, ma ina ua mavae ni nai vaiaso, sa ou le toe alu loa i le lotu.

I se tasi aso na ou maua ai se asiasiga faafuasei ae mafana mai lo’u epikopo. Na ia valaauliaina au ou te toe sau i le lotu i Aso Sa ma ia ou auai i le seminare. Na tonu ia te au e talia nei valaaulia.

O ni nai vaiaso talu ona ou toe alu i le lotu, na faalauiloa mai ai e le epikopo ia te au le polokalama o le Tiute i le Atua. Sa ia faamatala mai le mea na faatatau i ai, ma na ou manao ai ou te amataina.

Sa amata ona ou faatumuina ma faamaeaina ia sini o loo i le tamaitusi. Na amata ona ou iloaina o le polokalama o le Tiute i le Atua, sa fesoasoani ia te au e sui ai lou olaga mo le lelei sili atu. Sa oo ina ou toaga lava i le Lotu ma ou fiafia ou te alu i le seminare. O loo ou taumafai pea ia ou ola i tulaga faatonuina a le Ekalesia i se lelei e sili atu, ma ou te fiafia lava e faitau i tusitusiga paia ma le Liahona.

Ina ua ou amataina le polokalama o le Tiute i le Atua, sa ou faatuina ni sini e pei o le alu i se misiona, ma le auai i le aoga sauniuni a le Au Paia o Aso e Gata Ai o le Benemérito de las Américas, ma le tele o isi sini. O le tautoulu ua mavae, na ou maua ai le Taui o le Tiute i le Atua ma le Perisitua Mekisateko, ma e le o toe mamao ae ou alu i le misiona.

Ou te faafetai i lou Tama Faalelagi i aso taitasi mo le tuuina mai o le avanoa ou te sui ai ma avea ma se tagata agavaa o Lana Ekalesia. Ou te faafetai tele foi mo polokalama ma taitai o le Ekalesia na fesoasoani ina ia ou sui.