Pe Na Ou Ola Atoatoa i le Talalelei?

O le a faatali ia au suesuega i tusitusiga paia. Na feala uma le toatolu o le ma fanau tama—ma na alapopo nai lo le mea na masani ai. O le uii o Caden, na 18 masina i lena taimi, na faataio mai i lona moega. Na ou alu atu i lona potu ma iloa ai i le taimi lava lena, na ma’i o ia.

O lea na amataina ai se Aso Gafua o le sosoo mai o lea luitau ma lea luitau. I se tasi taimi, ae e lei umi ona ou suiina lavalava o Caden ma taumafai e fafaga o ia, na ia togiina ai se fagu lapoa i luga o le fola, ma masaa solo ai le sosiapu ma salalau solo ai tioata taei i totonu o le umukuka. A ou faamamaina le gasu, sa ou mafaufau i mea uma lava ua le uma ona fai: talafaasolopito o aiga, auaunaga, teuina o meaai i le fale, galuega faafaifeautalai.

“E mafai faapefea ona ou faia mea uma ou te iloa e tatau ona ou faia pe afai o lea e tau le mafai ona ou taulimaina galuega masani o le aso?” Na ou mafaufau ai. E oo ane i le afiafi, ua ou lelava lava, ae sa ou tuueseina ni mafaufauga faalotovaivai i le taimi o le aiga i le afiafi, afiafi faaleaiga, ma taimi masani e faataeele ai tamaiti ma faamomoe.

Mulimuli ane, ina ua momoe uma ia tamaiti, na ou saofai ifo ai e fai mea na leai sou taimi e fai ai. Na ou tago atu i le Liahona, o Me 2006 lea na susueina i le saunoaga a Peresitene Henry B. Eyring na faaautuina “E Faapei o se Tamaitiiti.” Na tau atu lau vaai i se fuaitau na ou faailogaina muamua: “Ina ia tausisia faamanuiaga o lena suiga [natura suia] i o tatou loto o le a moomia ai le naunautai, taumafaiga, ma le faatuatua. Sa aoao mai e le Tupu o Peniamina na o ni nai mea e manaomia i lena tulaga. Fai mai a ia, ina ia faatumauina se faamagaloga o a tatou agasala mai lea aso i lea aso, e tatau ona tatou fafaga i e o fia aai, faaoofu i e o le lavalava, asiasi atu i e mamai ma fesoasoani atu i tagata i la le agaga ma la le tino” (Liahona ma le Ensign, Me 2006, 17).

Na vave lava ona ou toe lagonaina foi sa ou le ola atoatoa i le talalelei. Sa ou mafaufau, “E mafai faapefea ona ou fafagaina e fiaaai, faalavalava i e le lavalava, asiasi i e mamai, ma fesoasoani atu i tagata i le faaleagaga ma le faaletino, ae o lea e tau le mafai ona ou tausia lou lava aiga?”

O le taimi lena na ou lagonaina ai se lagona lofituina o le faamaoniga mai le lagi. Sa matua manino, patino, ma mafai ona vaaia, o lea na ou iloaina ai na tatau ona ou tusia i lalo ina ia le galo ai ia te au. Sa mafai ona ou vaaia i lou mafaufau le sau ma le toe sau pea o lou aso—na tumu i le fafagaina o e fiaaai, faiga o tagamea e faalavalava ai e le lavalava (na faafia ona ou suia lavalava o Caden), tausia ma le alofa o le ma pepe ma’i, fesoasoani i lau tama e lima tausaga e saunia se lesona o le afiafi faaleaiga e faatatau i le galuega faafaifeautalai, ona matou talanoa faatasi lea ma lou aiga e uiga i le mana o faataitaiga—i se isi faaupuga, o le fesoasoani i tagata i le faaleagaga ma le faaletino.

Na oo mai le manatu i se lagona malosi o le toafilemu na ou iloa ai sa tau mai e le Alii ia te au ua Ia taliaina lau taulaga. O le tausia o lou aiga, na ou faataunuuina ai apoapoaiga a le Tupu o Peniamina ma Peresitene Eyring.