Faatinoina o Tala o Tusitusiga Paia i Afiafi Faaleaiga

A o i ai le ma fanau e toalua i le aoga faataitai, sa masani ona ma taumafai e faatumauina lo laua gauai mai i afiafi faaleaiga. I se tasi vaiaso a o ma fuafuaina se lesona e uiga i le usiusitai, na tonu ia i ma’ua o le a ma faamatalaina le tala ia Amona. Sa ma manatu foi a uma ona ma faamatalaina atu le tala mai le tusi o tala mai tusitusiga paia, ona ma taumafai lea e faatino. Sa ma aoina mai meaola meataalo mo mamoe ma fai se pelu pepa faigofie. Sa matua fiafia i ai le ma fanau ma fai mai e fai ma toe fai. O se taimi mulimuli ane i lena vaiaso, na fai mai uma ai i laua po o le a le tala o le a ma faatinoina i le Aso Gafua e sosoo ai.

I le aluga o nai tausaga na sosoo ai, sa ma faaaofiaina ai le “faatinoina o tala mai tusitusiga paia” i a matou afiafi faaleaiga i ni nai taimi. Sa masani ona fesoasoani mai le ma fanau e sue pe fai ni mea faitino faigofie pe a uma ona matou faamanatuina le tala i faitauga tusitusiga paia faaleaiga. Sa ma vaaia foi lo la faataitaia o tala i taimi e taaalo ai.

Sa matou faatinoina le tala ia Nifae ma le aumaiga o papatusi, Noa na fauina le vaa, Tavita na fetaui ma Koliata, o aafiaga o paionia, ma le tele o isi tala. Sa ma faailoa atu mataupu faavae o le talalelei na matou aoaoina mai nei faataitaiga, ma sa mafai ona molimauina e le ma fanau le ala o loo fesoasoani mai ai le Tama Faalelagi ia i tatou i ni auala e talitutusa lava i aso nei.