O Le Tagata Asiasi E Le Vaaia

Sa tatavale le fatu o Iulia a o faamatatasi atu i totonu o le potu avanoa. O le potu Peraimeri, ma lona afa lio o nofoa faamomoe ma le laupapa pefua, na tutusa lelei lava foliga ma lona potu Peraimeri i le latou uarota. Ae na pei e mole le manava o Iulia a o savali atu i le faitotoa. Atonu lava e foliga tutusa ia mea, ae na iloa e Iulia sa le tutusa. O nei o ia o se tagata asiasi.

Na saofai ifo Iulia i le nofoa na aupito mamao mai le faitotoa. Sa fiafia o ia i mea uma lava e uiga i asiasiga a lona aiga i le taumafanafana e asi ia tausoga ma matua o matua, ae vagana ai le avea o se tagata asiasi i se uarota ese. Sa manaia le usuina o pese o le Peraimeri ma le aoao e uiga i le Faaola, ae sa le manaia le nofo na o ia ma le leai o se tasi e masani ai.

Sa le fiafia foi Iulia e faalogo atu i isi tamaiti o talanoa ma talie faatasi ae leai se tasi na tilotilo atu ia te ia. I lona manatu, na pei e leai se tasi e popole pe na sau o ia [i le Peraimeri] pe leai. Na pei lava o Iulia—e le vaaia, o le tagata asiasi maoae e le vaaia!

Sa taataai e Iulia ana fili eena uumi ma moomoo maimau pe a na i ai o ia i lana uarota faatasi ma lona faiaoga Peraimeri, o Johansson, ma lana uo lelei lava o Hana. “Atonu o le taimi lenei o le a ese,” sa ia fai ifo ai ia te ia lava a o ia fetuunaia lana matatioata ma toe faamafolafola tasi lona laulavalava. “Atonu a ou taumafai malosi lava, e mafai ona ou faia se eseesega.”

Na oso Iulia ina ua tatala mai le faitotoa. Na o mai i totonu o le potu ni teineiti se toatolu, a o talanoa fiafia lava. Na sosoo mai ai ni tama se toalua. Na manava faatopetope Iulia ma fosi faamalosi lona gutu ia ataata.

“Talofa!” sa ia fai atu ai. Na faafuasei ona tau fai tilotilo atu tamaiti uma ia te ia. Na vevela foliga o Iulia.

“A, talofa,” o se memumemu atu lea a se tasi o teineiti.

“E te fou mai?” na fesili ai le isi teineitiiti.

Na kilia e Iulia lona faai. “Leai, o lea ou te asiasi mai i lo’u tinamatua.”

“Oi”

Sa tofu le tagata ma lona nofoa. Na mou ese le ataata a Iulia ina ua ia iloaina na nofoia uma lava isi nofoa vagana ai le nofoa sa i ona talaane. Na leai se isi na fai atu se tala ia Iulia. Sa sioa ifo o ia i ona lima. “Ua toe oso mai foi le tagata asiasi maoae e le vaaia,” o ona mafaufauga ia. Na tafe ifo se loimata i lona alafau.

O le vaiaso mulimuli ane, na pei e opeopea le loto o Iulia a o ia faanatinati atu i le auala savali i le lotu. E ese le manaia o le toe foi mai i la’u uarota! Ina ua savali atu o ia i lona potuaoga, sa i ai iina Hana.

“Talofa, Iulia! Ua ou fiafia lava ua e toe foi mai!” o le tala lea a Hana.

Na nofo ifo Iulia i talaane o Hana. E lei umi ae la talie ma talanoa. Na faatoa amata lava ona faamatala atu e Iulia ia Hana mea uma e uiga i lona vaiaso faatasi ma Tinamatua, ae tu atu loa se teineitiiti umi lauulu enaena mumu i luma o le faitotoa. Na vaai atu Iulia o faaseesee ane le teineitiiti i le nofoa aupito mamao mai le faitotoa ma nofo ai na o ia.

“E masalo o ia o se tagata asiasi,” na mafaufau ai Iulia. “Oka, o le mea e lelei ai o le taimi lenei e le o au!” Na ea ae le teineitiiti e tilotilo solo ona toe sioa ifo lea i ona lima. Na lagona e Iulia le le mautonu o lona loto i le leai o se tasi na fai atu se upu i le teineitiiti asiasi. “Maimau pe a na le faigata le avea ma se tagata asiasi,” sa ia mafaufau ai. “E tatau lava ona ese!” Na toe emo atu le Aso Sa ua te’a i lona mafaufau mo sina taimi, a o ia manatuaina le avea ai ma tagata asiasi le vaaia. Na emoemo ona mata. Faatali laia—e mafai ona ia faia se eseesega i le taimi lenei!

Na tu ae i luga Iulia. “Talofa,” na ia fai atu ai ma se ataata. Na savali atu o ia i le isi itu o le potu ma saofai i le nofoa na sosoo ma le teineitiiti. “O e asiasi mai i le aso?”

Sa tilotilo ae le teineitiiti ma ni mata lapopoa, ona fiafia lea o ona foliga. “Ioe, o loo ou asiasi mai i le uso o lo’u tina. O e asiasi mai foi?”

Na lulu le ulu o Iulia. “E leai, ae ua ou iloa le lagona lena,” sa ia fai atu ai. “O au o Iulia. O ai lou igoa?”

“O Ela.”

“E te fia sau tatou te nonofo faatasi ma Hana?”

Sa ataata Ela ma luelue lona ulu. A o toe o atu teineiti e toalua i le isi itu o le potu, sa lagona e Iulia le fiafia o lona loto. “E le faatagaina ni tagata asiasi e le vaaia!” na ia mafaufau ai. “O le a ou matua faamautinoaina lava!”