Mata e Mafai e Sefuluai Ona Tuumamaina Ou Popolega?

A o i ai lau fanau matutua i le aoga ae momoe lau fanau laiti, sa ou folafolaina i luga o le laulau o le umukuka pili a le matou aiga. Sa ou amataina ma le faatu lenei galuega faalemasina e ala i le tatalo mo le poto ma le gafatia e faasoasoa ai si a matou tupe maua itiiti. E pei ona masani ai, o le sefuluai o le siaki muamua lava lea e tusi.

Ina ua ou auai i le Ekalesia a Iesu Keriso o le Au Paia o Aso e Gata Ai o se ava ma se tina talavou, sa ou tautino ai e totogi le sefuluai. Ou te le’i faavaivai lava i lena folafolaga. Ae peitasi, sa matua ou atuatuvale lava i le le lava o tupe e totogi ai pili o mea e faaaoga i le isi masina, mokesi, ma le inisiua.

Ae o lenei ua avea au ma se tina nofotoatasi ma se fanau laiti e toaono. E masani ona ou lagonaina le lofituina ona o le faaauau pea o le tele o galuega, popolega i mea tautupe, ma filifiliga e le uma e aofia ai au taumafaiga o le avea ma se tina ma se tama ae leai se aiga lautele e tuuina mai ia te au se toomaga po o se lagolago.

A o ou saofai ai i le laulau ma augani atu i le Alii mo Lana fesoasoani ma [Lona] alofa tunoa, sa tatalaina e le Agaga Paia ou mata i se faaaliga matagofie ma le faamafanafana loto i le alofa o le Faaola. Sa mafai ona ou vaaia ia tupe na nonoina mo mea e manaomia o le aiga i se vaaiga fou, a o oo mai i lou manatua ia mea paia e tatau ona faamuamua o le olaga. Na ou iloaina na finagalo lo tatou Tama Faalelagi ina ia ou maua faamanuiaga na folafolaina mai ia i latou o e totogi faamaoni sefuluai ma taulaga. Na ou iloaina foi o le totogiina o sefuluai e tatau ona avea o se faatinoga fiafia o le alofa, ae le o le matau ma le popole.

A o faatumulia au i le Agaga o le Alii, na faapea ona ou tuuina atu ai se molimau o le tautinoga ua leva ona ou taofia mausali ma le paia. Na osofai e lou leo le sāō o le umukuka a o ou tautino atu e sili atu ia te au le leai o se vai i lou fale nai lo le leai o se vai ola na ofoina mai e le Faaola. E sili atu ia te au le leai o se meaai i luga o le matou laulau nai lo le leai o le Areto o le Ola. E sili atu ia te au le onosai i le pogisa ma le le lagolelei o le leai o se eletise nai lo le lafoaia o le Malamalama o Keriso i lo’u olaga. E sili atu ia te au lo matou nonofo ma lau fanau i se faleie, nai lo le lafoai o lou avanoa e ulufale atu i le maota o le Alii.

Na vave lava ona aluese le avega o le popole. Na manumalo lou alofa mo le Alii i le vaivai na afua mai i ou popolega. O lo tatou Tama Faalelagi o lo tatou laveai, lo tatou fesoasoani, ma lo tatou puipuiga. Na te foai moni mai mea uma tatou te manaomia. O Ana folafolaga e moni ma mautinoa. Ua Ia poloaiina i tatou e totogi sefuluai i mea tatou te maua ina ia mafai ona Ia sasaa mai faamanuiaga mai le lagi—e aofia ai le filemu o le mafaufau, saoloto mai le popole i mea o le lalolagi ma mea o le olaga nei, ma le talitonuina o Lona suafa paia.

Talu mai lava lena aso e oo mai nei, ou te faitauina o se mea fiafia le totogi o lau sefuluai, e aunoa ma le musua po o le matau, ia te Ia ma mo Ia o le na uluai alofaina au.