O Si o Matou Vaega Itiiti o le Lagi

Ina ua uma ona matou papatiso i le 1992, sa fai faatasi loa e lo matou aiga ia mea uma lava, e aofia ai le o i saungia lotu i le Aso Sa, konafesi a le Ekalesia, ma isi gaoioiga. Ae na alu aso, na i ai suiga, ma iu ai ina tuua na o au i le lotu—na iu ina le toe toaaga i le ekalesia lo matou aiga atoa. Na amata mai lava iina, soo se taimi lava ou te faalogo ai i se tasi i le lotu o aoao mai e uiga i aiga e faavavau, e tuia ai lava lou loto ma lofia ai au i se faanoanoaga tele.

O le 1995 na ou filifili ai e fai lou faamanuiaga faapeteriaka ina ia iloa atili ai le mea ua faamoemoe mai e le Alii ia te au ma ia ou maua ai le malosi. O lou faamanuiaga sa i ai le folafolaga lenei: e ala i le anapogi, tatalo, ma afiafi faaleaiga, o le a faapea ona maua ai lou aiga “i totonu o le talalelei.” Sa faaauau ona ou tatalo ma anapogi mo lou aiga, ae ou te lei mulimuli i le fautuaga o le faia o afiafi faaleaiga.

Na iu ina ou tuua lou aiga i São Paulo, Pasila, ina ia ou auauna atu i se misiona. A o ou auauna atu, sa ou vaaia le tele o ni aiga malepelepe, ae a o ou suesueina lou faamanuiaga faapeteriaka, na ou maua ai le tali mo na aiga: afiafi faaleaiga. E ala i le aoaoina atu o tagata e uiga i afiafi faaleaiga, na ou vaaia ai aiga ua faamalolosia, ulugalii na toe faaleleia, ma tamaiti o aiga na toe faatasia. I le faapuupuuga, na ou vaaia aiga o liuaina e avea o ni vaega itiiti o le lagi.

“Afai e mafai ona tupu lenei mea i aiga i lau misiona,” na ou manatunatu ai, “aisea lava e le mafai ai e lou lava aiga?”

Ina ua uma lau misiona, sa ou naunau lava e fai afiafi faaleaiga a lou aiga. O le taimi muamua, na auai tagata uma ma le musua, ma sa faigata lava ona faauma au lesona na fuafuaina. Ae na ou iloaina e le mafai ona fautuaina au e le Alii e fai se mea e le mafai ona avea o se faamanuiaga, o lea sa ou le fiu ai lava. Mulimuli ane, na faataunuuina ai le folafolaga o loo i lou faamanuiaga faapeteriaka.

Afai e le faia sa matou afiafi faaleaiga, ona ou faalogoina lea o faitioga mai lou aiga. Sa auai uma tagata o le aiga i manatu, aitia, ma fautuaga, ma sa latou faalogologo ma le totoa i le savali. E ui ina ua matou matutua i lena taimi, ae a oo i le taimi o taaloga, sa matou fiafia ai lava!

O le taunuuga, ua toe amata ona toe usitaia e tagata o lou aiga poloaiga na latou le amanaiaina, ma ua sili atu lo latou toaaga i le Ekalesia.

E mafai ona ou faapea moni atu, o lou aiga na liuaina ma avea o sina vaega itiiti o le lagi, e faafetaia ai se polokalama musuia lea e tatau ona avea ma se aganuu i aiga taitasi: o le afiafi faaleaiga.