Tauagafau: O Se Mataupu Faavae Taua mo Tagata Uma i Taimi Uma

O le tamaitusi Mo Le Malosi o le Autalavou o loo aumaia ai ni taiala taua mo le tauagafau. O le tamaitusi lenei e taua tele mo le autalavou ma tagata matutua: “O lavalava e le tausaafia, e aofia ai ofuvae ma laulavalava ua matua pupuu lava, o ofu fufusi, o ofu e le ufiufia ai le puimanava, ma isi ofu e iloagofie atu ai ou itutino. … E tatau i tamaitai ona oofu i lavalava e ufiufi ai tauau, ma aua nei ofuina ni ofu e maualalo le ua i luma po o le papatua foi, po o ni ofu foi e iloagofie atu ai isi itutino. … E tatau foi i alii ona tausisia le tauagafau i o latou foi foliga vaaia. E ao ia i latou uma ona aloese mai le faia o lavalava e le tatau ai, o foliga vaaia foi e le tatau ai, ma le faiga po o le faafugaina o o latou lauao. E ao ona tumama e le aunoa, ma aloese foi mai le faainaelo po o le manatu faasamasamanoa i ofu, o teuga, ma amioga. Ia fesili ifo ia te oe lava, ‘Faamata ou te maua le lagona toafimalie lelei i o’u foliga vaaia pe a na fai o loo ou i ai i le afioaga o le Alii?’”¹

Saili i le taitaiga a le Agaga a o e filifili mo se ofu e tauagafau. Ma le isi, a o e mafaufau i mataupu faavae e o faatasi ma le tauagafau, atonu foi o le a faamanuiaina oe mai lou fesili ifo ia te oe lava i fesili faapitoa e pei o nei:

• Pe aliali se vaega tele o lo’u tino pe a ou saofai, punou, aapa i luga, pe a’ea’e i faasitepu?

• Pe ou te faatosinaina mai tagata ia te au lava i le faia o ni lavalava e valavala tele pe faatosina?

• Pe tatau ea ona ou fetuunaia, afeafe, pe toe faatulaga ou ofu malumalu ina ia mafai ona ofu ai se ofu faapitoa?

A tatou malamalama lelei lava i le aoaoga faavae o loo i tua atu o nei mataupu faavae o le tauagafau, ona tatou iloa ai lea o le tauagafau o le uiga auau mama lea e taiala ma pulea ai amioga.

O le aoaoga faavae o loo i tua o le tauagafau e amata lava i lo tatou iloa o i tatou o fanau a le Atua, na foafoaina i Lona faatusa (tagai Mose 2:27). O o tatou tino o ni meaalofa paia mai le Tama Faalelagi ma ua i ai ni faamoemoega paia ua Ia fuafuaina mo o tatou tino. I le avea ai ma ni tagata loto faafetai ua maua ni tino, tatou te faafetaia lenei meaalofa e ala i le faia o o tatou tino e pei ona Ia fetalai mai ai e tatau ona tatou faia ai (tagai MFF 88:33). Tatou te aoao e faamasani, pulea, ma taofiofi o tatou tino ma o latou faaaogaaga faaletino ina ia avea ai e pei o lo tatou Tama Faalelagi.

Mai lava i le amataga, na poloaiina ai e le Alii ia Lana fanau e ufiufi o latou tino. Ina ua uma ona aai Atamu ma Eva i le fua o le laau faasaina, na pupula o laua mata ma la iloaina ai lo laua le lavalava. Sa taumafai Atamu ma Eva e ufiufi i laua i nai titi na fatuina i lau o le mati. Ae sa le lava ia talieleele, o lea na faia ai e le Alii mo i laua ni ofu na sili atu ona tauagafau i pa’u o manu. (Tagai Kenese 3:7, 21.)

Sa i ai i le Atua se faatulagaga maualuga atu i na aso, e pei ona i ai i aso nei. O Ona tulaga faatonuina ua le pei lea o tulaga faatonuina a le lalolagi. E pei ona fetalai o Ia i le Isaia 55:8–9:

“Aua o o’u manatu e le o outou manatu, o o’u ala e le o outou ala, ua fetalai mai ai Ieova.

“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu.”

Talu ai o le tauagafau o se tasi lea o “ala maualuga” a le Alii ae le o se sitaili o aga fesootai, o lea na aoao mai ai i augatupulaga uma. Mafaufau i nisi nei o faataitaiga mai tusitusiga paia e uiga i lavalava ma aoaoga o loo aoao mai ai e uiga i le tauagafau.

O le tauagafau e faaalia ai le lotomaulalo. Na tausalaina e le perofeta o Iakopo i le Tusi a Mamona le faamaualuga ma le fiafia i oa. Na ia lapataiina lona nuu e puipui o latou loto faamaualuga mai le faatamaiaina o o latou agaga. O se tasi o auala na latou faaalia ai lo latou faamaualuluga tele o le faiga o o latou lavalava. Na ta’u atu e Iakopo ia te i latou, “Ona ua maua e nisi o outou ni oloa e sili i lea o outou uso, ua faafefeteina outou i le faamaualuga o outou loto, ua malō o outou ua ma ua faamaualuga o outou ulu ona o le taugata o outou ofu, ma ua faasaua i o outou uso, aua ua outou manatu ua sili outou ia te i latou” (Iakopo 2:13).

O le manatu o le faamaualalo i le faiga o o tatou lavalava ua saga faamalamalamaina mai i le Mataupu Faavae ma Feagaiga 42:40: “Aua e te mitamita i lou loto; ia aunoa ma teu ou ofu uma.” Pe o le uiga ea la e le mafai ona tatou faia ni lavalava e mananaia ni sitaili? E leai, e tatau ona tatou faia ni lavalava e talafeagai ai ma le fuafuaga, ae e le tatau ona tatou soona popole i le ituaiga sitaili pe faapea foi e tatau ona maua i taimi uma ni sitaili fou. E sili atu le lelei o le faaaoga o punaoa tautupe i faamoemoega e sili atu ona tumau ma anoa.

O le faiga o o tatou lavalava mo tapuaiga e faaalia ai lo tatou faaaloalo mo le Alii. Na poloaiina Mose e le Alii e sauni lavalava paia ia agavaa mo le faaaogaina i Lona maota paia (tagai Esoto 28:2). E manino mai i le poloaiga lenei na silafia e le Alii, o lavalava mo aso uma sa le talafeagai lea mo faamoemoega faapea. Pe ua faapei ea i tatou o Mose, e atagia o tatou lagona o le alofa mo le Tama Faalelagi i le faia o lavalava talafeagai mo tapuaiga?

E pei ona faaalia e nei faataitaiga, “ua apoapoai mai e le aunoa ia perofeta a le Atua i Ana fanau, ina ia fai faalelei o latou lavalava.”² I o tatou lava taimi ua faamanatu mai ia i tatou “o le faiga o ou ofu o se ata lea o le ituaiga tagata e i ai oe. O lou ofu ma au teuga, e auina atu ai i isi tagata ni savali e uiga ia te oe, ma e uunaia ai au amioga faapea foi ma isi. A fai faalelei au teuga [tumama, ma teu faalelei lou ulu, ma oti faalelei pe afai o se tama, ma sele le ava] ma fai faalelei ou ofu e tausaafia ai, ua e valaaulia le mafuta mai a le Agaga, ma e mafai ona avea ma faatosinaga mo le lelei i e o loo siomia ai oe.”³

O se tasi o faamanuiaga tupito e o mai faatasi ma le tauagafau o se lagona faateleina o le talitonu o le tagata ia te ia lava. Na faasoa mai e se tasi o uso le tala i se uo o le na aoaoina—ma sa faamanuiaina e—le mataupu faavae o le tauagafau i le aluga o le aoaoina e uiga i le talalelei:

“O ni nai taumafanafana ua mavae, na ma o ai ma sa’u uo i le lotu. Sa taunuu mai o ia i lo’u fale ae ma te lei o i le lotu, i ni lavalava lea e masani ona ofuina i le taumafanafana: o se ofu manifinifi e leai ni lima. Sa ou talisapaiaina lona lagona o le alu i le lotu o se tulaga lea e ofu ai se ofusoloatoa, ma na ma o loa. Sa faafeiloai o ia e isi tagata o le uarota i le matou aulotu, ma sa toe sau foi o ia i nisi o taimi i vaiaso na sosoo ai. Sa amata foi ona sau i fonotaga o le faatamaoaigaina o aiga, auaiga ma le tagata lava ia ma aumai nisi o lana fanau i le Peraimeri ma gaoioiga a le autalavou. A o faagasolo na gaoioiga i aso o le vaiaso i na aso vevela o le taumafanafana, sa masani lava ona ia ofuina mai se palausi e leai ni lima ma se ofuvae pupuu na pau i luga atu o tulivae. Sa le leaga ona lavalava, ae na mautinoa lava sa lei malamalama o ia i lena taimi i tulaga faatonuina a le Au Paia o Aso e Gata Ai.

“Ina ua mavae ni nai vaiaso, sa ou fesili loa i ai pe manao e aoao atili e uiga i le Ekalesia mai faifeautalai. Na fai mai o ia, e matamuli lava ma sa le toalelei i le talanoa i ni tagata na te le’i iloaina. Sa na ona manao lava e faaauau pea ona auai i tapuaiga ma gaoioiga a le matou uarota ma fai mai a i ai lava sana fesili, o le a fesili mai ia te au po o isi tagata o le uarota ua masani i ai.

“Sa malie ia te au aua a o faaauau ona sau o ia i le lotu ma gaoioiga a le Ekalesia, na amata ona ia ofuina ni laulavalava uumi atu, ofuvae pupuu uumi atu, ma ni ofutino e i ai lima. O le taimi muamua sa ou manatu na mafua ona fai faapea ona lavalava ona o le tau o le tautoulu o le a oo mai, ae e lei umi ae ou iloaina sa ia matauina lava le faiga o lavalava o ana uo o le Au Paia o Aso e Gata Ai.

“Ou te le iloa pe o le suiga i ona lavalava o le mafuaaga lea e tasi o le faateleina o lona talitonu ia te ia lava lea na amata ona ou matauina ia te ia, ae ou te manatu o se vaega lea. A o faaauau ona ia aoaoina mataupu faavae o le talalelei, e pei o lona tofi paia o se afafine o le Atua, na foliga mai na faatuputeleina ai lona lagonaina o lona taua faaletagata lava ia. Na faateleina lona talitonu ia te ia lava a o amata ona malamalama lelei i mafuaaga na i tua mai o nisi o mea tatou te faia. Ma a o faateleina lona talitonu ia te ia lava, sa faapea ona naunau ai o ia e aoao atili e uiga i le talalelei—e aofia ai le faia o ana lesona e faifeautalai, o se mea sa popole ai i se taimi na muamua atu.

“O ona lavalava sa na o se tasi lea o vaega o lona iloa ma malamalama i mataupu faavae ma tulaga faatonuina o le talalelei, ae ina ua ia iloaina na mafai lava ona ia fetuutuunaia le vaega lea o lona olaga, na ia iloa ai e mafai foi ona ia faia ni suiga e sili atu le taua. I le iuga, o nei suiga na oo atu ai i lona liua mai i le talalelei a Iesu Keriso ma auai ai i le Ekalesia. Mulimuli ane, na maua ona faaeega paia i le malumalu, ma sa le’i manaomia se suiga o lana pusa lavalava aua ua uma ona ia faataitaia ia mataupu faavae o le faatauagafau.”⁴

A o avea le tauagafau ma uiga mama e faapea ona puleaina ma faatonutonu ai o tatou olaga, e faapea ona tatou maua ai se lagona faateleina o le taua o le tagata lava ia. Manatua folafolaga a le Mataupu Faavae ma Feagaiga 121:45–46:

“Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia ma au aumea tumau, a o lou tootoo ma tootoo lē feliuliuai o le amiotonu ma le upu moni.”

Talosia ia tatou taumafai ia agavaa mo nei faamanuiaga.