O Mea Matagofie O Loo i Luma Atu

“O i ai se isi o ala pea?” O le taimi muamua na ou fesili ai, e lua ni tali ioe tuumumusu na ou mauaina. Ae, i ni itula mulimuli ane, na tali mai le leai o se leo, o au lava le tagata mulimuli o loo i le potu e le o mafai ona moe.

O lo’u po muamua lea i le Nofoaga Autu e Aoaoina Ai Faifeautalai (NAF). O lena aso, na ou faatofa atu ai i ou matua, feiloai i lau soa ma isi faifeautalai fou e o atu i Italia, ma auai atu i uluai faasologa o vasega. Sa ou vaivai, ae na taavilivili lo’u mafaufau i le popolevale. “O le a lenei mea ua ou faia ia te au?” Sa faafia ona ou fesili ifo ai ia te au lava. Ou te lei iloaina pe mafai moni ona ou aoao e avea ma se faifeautalai. Mata ou te maua le lototoa e alu atu ai i se atunuu ese ma talanoa atu i tagata ese e uiga i le talalelei? Atonu sa le tatau lava ona ou i ai iinei. Na amata ona tafe ifo o’u loimata i o’u alafau.

Ona ou manatuaina lea o se mea na tau mai e lo’u tina e uiga i lona tuagane o Lale. Na faamisiona Uncle Lale i le misiona a Iurukuei ma Parakuei i le vaitaimi o le 1970. O le taimi muamua sa tele ni po sa le mafai ai ona moe ona o le popole i lona le atoatoa. Ina ua ia lagona na pei ua le mafai ona ia toe onosaia, o lea na aluese ai o ia mai lona moega, ma alu i totonu o le faletaele, ma tootuli ai ma augani atu i le Tama Faalelagi mo se toafilemu. I se auala e le mailoa, faatasi ai ma le fesoasoani a le Alii, na mafai ai e Uncle Lale ona faataunuuina ma auauna atu ma le faamaoni i se misiona.

Sa ou maua sina faamoemoe i lenei manatu o lea na ou laalaa lemu atu ai i le potu taalaelae e tau atu i le faletaele. I si malamalama laitiiti, na ou tootuli ai i luga o le fola malulu ma ou tagi masusu ai. Sa ou faatauanau atu i le Tama Faalelagi e tuuina mai ia te au le toafilemu ina ia mafai ona ou maua le lototele e agai ai i luma.

Sa ou faatalitali. Ae leai se mea na tupu. Sa ou toe faatalitali teisi, ae na o le leo lava o lau tagi na faalogoina. Mulimuli ane, na leai se isi mea e fai ae ou toe foi atu i le moega.

I le taimi ae ou te lei moe, na oo mai ai le tali. Na faatumulia lou mafaufau e le Agaga i se lagona fiafia ma le mafanafana e uiga i se nofoaga matagofie. Na faafuasei ona ou iloaina e ui ina ou i ai i se taimi faigata o le fefe i le amataga, ae afai ou te fetaomi pea i luma, o le a oo atu ai lava i le mea ua finagalo le Alii e tatau ona ou i ai. O lea manatu na faatumulia ai au i le toafilemu, ma sa ou moe loa.

Na faaataata mai e le Alii ni mea matagofie o loo i luma atu. I taimi faigata a o ou nofo ai i le NAF, na moeiini ou mata ma manatua le mea na ou lagonaina. O le tatalo ma le galue malosi, na ou faatoilaloina ai ou popolega.

E lei umi ae ou i ai i Genoa, Italia, faatasi ma lau soa fou. O le umukuka o lo ma falemautotogi na i ai se faitotoa tioata na tau atu i se poletito. Na ou laa atu i fafo i le poletito ma ou faataupupula atu i le aai. Ua uma ona ou iloaina ma ua ou fiafia i lenei aai. O le nofoaga lea na vaai i ai mata o lo’u mafaufau i lena po i le NAF. Na ou iloaina sa taitaiina mai au e le Alii i lenei taimi, ma na ou i ai tonu lava i le mea na tatau ona ou i ai.