Ave Au i le Malumalu

I le taeao o se tasi Aso Toonai a o ou auauna atu ai i le Malumalu o Lima Peru, na oo mai ai se vaega pe tusa ma le 20 tamaiti mai se tasi o siteki i Lima e asiasi. Ina ua uma ona matou lululima ma le fiafia ma tamaiti taitoatasi, na saunoa atu le peresitene o le malumalu ia i latou e uiga i le galuega paia o le malumalu. Sa faapitoa ona ia faamamafaina mai le faaauauina o mafutaga faaleaiga ma le uiga o le fasifuaitau “E faavavau aiga.”

Sa faaaloalo ma faalogologo ma le totoa ia tamaiti. O se tasi o nei tagata asiasi o se teineitiiti laitiiti na igoa ia Rosita, e lima ona tausaga. O le po lena sa tuai ona moe o ia seia oo ina foi mai lona tama mai le galuega, ma sa faatalitali ai lava mo ia i le faatausiusiuga o lona moega.

Ina ua taunuu mai o ia, sa tei o ia i le vaai o loo ala pea lona afafine. Na oso ese mai Rosita mai le moega ma momoe atu ia te ia. Sa ia siiina o ia i luga, ma sa ia opo mai le ua o lona tama ma kisi atu ia te ia.

“O a mai lau Rosa laitiiti?” na ia fesili ai.

“O lea ou te manuia, Papa.”

“Sa e teine lelei ananei?”

“Ioe, Papa.”

“Na i ai se mea na e manao ou te faia mo oe?”

Sa luelue lona ulu.

“O le a? O le a le mea e te manao ai, lau pele?”

“Papa,” na ia fai mai ai, sa nofonofo laitiiti, “o afea e te aveina ai au i le malumalu?”

Sa tutu lona tama mo ni nai sekone ona faatoa tali atu lea.

“O le a ou aveina oe, Rosa. Ae o loo ou faigaluega malosi i le taimi nei, ma o loo ou pisi lava. Ae ou te folafola atu ou te aveina oe.”

“Faafetai lava, Papa,” o le tala lea a Rosita, ma toe fusi ma sogi atu i lona tama.

“Ia alu loa i lou moega ma taumafai e moe.”

O ni masina se tele mulimuli ane, na faapotopoto ai le aiga o Rosa i totonu o se tasi o potu faamauga o le malumalu. Na sosoo ai ma taimi o le olioli tele ina ua uma le sauniga o le faamauga. Sa fusi atu ma le alofa tele ma le faapelepele e le tama o Rosa ia lana fanau taitoatasi, ae faaiu lava i le uii—o Rosita.

“O ni nai masina talu ai na faia ai e lenei tamaitai laitiiti se malaga i le malumalu faatasi ma tamaiti o le Peraimeri mai le matou siteki,” na tau atu ai e le tama o Rosita i le fai faamauga na faia le sauniga. “O le po lena sa faatalitali mai ai lava o ia seia ou oo atu i le fale mai le galuega, ma fesili mai pe o afea o le a ou aveina ai o ia i le malumalu. Na ou iloaina sa le na o fafo o le malumalu sa fia vaai i ai o ia, o lea na tatau ai ona ou faatulagaina lelei lo’u olaga ma lafoai au mausa le lelei. Na alu ai se taumafaiga tele, ae ua iu lava ina ou manumalo. O le asō o le aso sili lea ona matagofie ua ou iloaina aua o nei ua faatasia ai lou aiga mo le faavavau atoa.”