Agavaa mo le ma le Auai i Tapuaiga i le Malumalu

Silvia H. Allred, fesoasoani muamua i le au peresitene aoao o le Aualofa: “O le malumalu o le maota o le Alii. Na te taitaia tulaga o loo faaaogaina ai, o sauniga e tatau ona faataunuuina, ma tulaga faatonuina tatou te agavaa ai e ulu atu ai. … O le agavaa o le tagata lava ia o se tulaga manaomia taua ina ia olioli ai i faamanuiaga o le malumalu. Tatou te saunia e ala i le usitai i poloaiga ma saili e fai le finagalo o le Atua” (“Malumalu Paia, Feagaiga Paia,” Liahona, Nov. 2008, 113).

Elder David B. Haight (1906–2004) o le Korama a Aposetolo e Toasefululua: “E tatau ia i tatou o e e ulu atu i le malumalu ona ola i ni olaga e fesoasoani ia i tatou ia tatou agavaa e ulu atu, ma auai atoatoa. … E suesueina lo tatou agavaa e ulu atu i le malumalu i a tatou faatalanoaga … ma taitai perisitua. E molimauina ia tatou saini, ma a latou foi, i o tatou pepa faataga o le malumalu, lo tatou agavaa e ulu atu i le malumalu” (“O Mai i le Maota o le Alii,” Liahona, Iulai 1992, 17).

MFF 110:7:“O le a ou faaali a’u lava i lo’u nuu i le alofa mutimutivale i lenei fale.”

Peresitene Howard W. Hunter (1907–95): “Sei o tatou o atu i le malumalu e le aunoa pe a gafatia e le taimi, seleni ma tulaga faaletagata lava ia. Ia tatou o atu e le gata mo o tatou lava tuaa ua maliliu, ae ia tatou o atu foi mo faamanuiaga patino o le tapuai i le malumalu, mo le faapaiaina ma le saogalemu lea o loo tuuina mai e na puipui paia ma mamalu. O le malumalu o se nofoaga o le matagofie, o se nofoaga o faaaliga, o se nofoaga o le filemu” (“O Le Faailoga Sili o le Avea ai o i Tatou ma Tagata o le Ekalesia,” Liahona, Nov. 1994, 6).

MFF 38:32: “O le a ou tuuina atu ai la’u tulafono ia te outou; o iina foi o le a faaeeina ai outou i le mana mai luga” (tagai foi MFF 95:8).

Elder Robert D. Hales o le Korama a Aposetolo e Toasefululua: “O faamanuiaga o faaeega paia o le malumalu e alagatatau mo i tatou taitoatasi e pei lava ona i ai o tatou papatisoga. O le mafuaaga lea e tatau ai ona saunia i tatou lava ina ia tatou mama e ulu atu i le malumalu o le Atua. O le galuega faalemalumalu o se avanoa lea e faataunuu ai faaeega paia o le tagata lava ia ma feagaiga mo i latou o ola ma faapea foi ona faataunuu ai nei sauniga mo le faaolaina o e ua maliliu. O le mafuaaga lenei ua aoaoina ai i tatou i tusitusiga paia e fausia malumalu ma saunia o tatou olaga ina ia agavaa e auai i sauniga ma feagaiga paia o le malumalu. …

“O le faamoemoega autu o le malumalu o le tuuina mai ai lea o sauniga e manaomia mo lo tatou faaeaga i le malo selesitila. O sauniga o le malumalu e taitai atu ai i tatou i lo tatou Faaola, ma tuuina mai ai faamanuiaga lea e oo mai ia i tatou e ala i le Togiola a Iesu Keriso” (“Temple Blessings,” i le Brigham Young University 2005–2006 Speeches [2006], 1, 4).

Peresitene Gordon B. Hinckley (1910–2008): “O alii ma tamaitai uma e o atu i le malumalu i se agaga o le faamaoni ma le faatuatua, latou te tuua le fale o le Alii o se alii po o se tamaitai sili atu. O loo i ai le manaomia o le faaleleia pea lava pea o o tatou olaga. E i ai taimi e manaomia ai le tuua o le pisapisao ma le vavao o le lalolagi ae laa atu i totonu o puipui o se maota paia o le Atua, ina ia lagona ai Lona agaga i se siosiomaga o le paia ma le filemu” (“O Misiona, Malumalu, ma le Taitaiga,” Liahona, Nov. 1995, 66).