Ko e Pilikihami ʻIongi Lelei Tahá

Naʻe fanongo pē ʻa Kefi kae fakamatala ʻa Misa Sotapeeki ki he founga ʻo e hiki holo ʻa e kakaí ʻi he ʻIunaiteti Siteití. Naʻá ne fiefia ʻi heʻene kalasi hisitōlia foʻoú. Naʻe huke holo ʻe Kefi e ngaahi peesi ʻo ʻene tohi hisitōlia foʻoú, peá ne tuʻu ʻi ha tā ʻo Pilikihami ʻIongi. Naʻe teʻeki ai ke ne ʻilo ʻe ia kimuʻa ʻa e mahuʻinga ʻo Pilikihami ʻIongi ʻi he hisitōlia ʻo e ʻIunaiteti Siteití.

Naʻe fakaʻosi ʻe Misa Sotapeeki ʻene fakamatalá. Naʻá ne pehē, “ʻE ʻi ai e ngāue ke fai mei ʻapi ʻi he ʻaho kotoa pē. Ko hoʻomou ʻuluaki ngāué ʻe tānaki mai ia ʻapongipongi.”

Naʻe māpuhoi ʻa Kefi ʻi hono ʻapí ʻi heʻene sio hifo ki he ngaahi fehuʻi naʻe vahe ange ʻe Misa Sotapēkí.

Naʻe fehuʻi ange ʻe heʻene faʻeé “Lahi e meʻa naʻe fai ʻi ʻapiakó?”

Naʻe talaange ʻe Kefi, “ ʻOku ʻi ai e ngāue ke fai mei ʻapi ʻi he ʻaho kotoa pē.” Naʻá ne manatuʻi ʻa e tā ʻi heʻene tohi hisitōliá. “Fineʻeiki, ʻoku ʻasi ʻa Pilikihami ʻIongi ʻi heʻeku tohi hisitōliá. Ko e hā naʻá ne fuʻu mahuʻinga ai ʻi he hisitōlia ʻo e ʻIunaiteti Siteití

Naʻe talamai ʻe he Fineʻeikí, “Naʻá ne tataki e hiki ʻa ha Kāingalotu ʻe toko lauiafe ki he Teleʻa Sōlekí. Hili iá naʻá ne fokotuʻutuʻu kinautolu ki ha ngaahi kolo. Ko e ngāue lahi hono palaní. Ko ha konga mahuʻinga ia ʻo e hiki ki he feituʻu fakahihifo ʻo e fonuá.”

ʻI he ʻaho hono hokó naʻe talaange ʻe Misa Sotapeeki, “Te tau laukonga mo fai e foʻi tulama he uike kahaʻú. Te mou takitaha fakatātaaʻi ha tokotaha ʻo kinautolu naʻe fononga fakahihifó. ʻE fakaafeʻi mai ki ai hoʻomou ngaahi mātuʻá mo e fānau ako kehé.”

Naʻe kamata vahe leva ʻe Misa Sotapeeki e niʻihi ke fakatātaaʻí pea tufa atu mo e ngaahi konga ke nau laú. ʻI heʻene ʻeke ange pe ko hai te ne fie fakatātaaʻi ʻa Pilikihami ʻIongí, naʻe hiki nima fakavavevave hake ʻa Kefi.

Naʻe pehē ange ʻe Misa Sotapeeki, “Ko hoʻomou ngāue mei ʻapi ki ʻapoó ko hono kamata ako maʻuloto hoʻomou kongá. Kuo pau ke mou lau maʻuloto lelei ia. ʻE fakafalala mei ai homou māká.”

Naʻe lau hifo ʻe Kefi ʻene kongá ʻi heʻena mavahe atu mo hono kaungāmeʻa ko Lolá mei he kalasí. Naʻe ʻalu hake ʻiate ia ha ongo faikehe. Naʻá ne talaange kia Lola, “ ʻOku hala ʻeni ia. ʻOkú ne ʻai ʻe ia ke hangē naʻe taʻefaitotonu ʻa Pilikihami ʻIongí.”

Naʻe pehē ange ʻe Lola, “ ʻOku kehe pē hoʻo fakakaukaú koeʻuhí ko homou siasí.”

Naʻe talaange ʻe Kefi, “He ʻikai ke u lava ʻo lea ʻaki e ngaahi meʻa ko ʻení.”

Naʻe fakamanatu ange ʻe Lola, “Kuo pau ke ke lau kinautolu ke tonu ʻaupito.”

Naʻe tafe hifo e loʻimatá he kouʻahe ʻo Kefí ʻi heʻene lele atu ki honau ʻapí ʻo hū fakavave ki loto he matapā ʻi muʻá.

Ne ʻeke ange ʻe he Fineʻeikí, “Toe lahi ange e ngāue ke fai atu mei ʻapí?”

Naʻe ʻoange ʻe Kefi ʻene laʻipepá mo pehē ange, “Kovi ange ia ai. Lau angé ʻená.”

Naʻe lau ʻe he Fineʻeikí e laʻipepá pea kalokalo. “Naʻe ʻikai ke ʻilo lahi e tokotaha naʻá ne hiki ʻení kia Pilikihami ʻIongi.”

Naʻe ʻeke ange ʻe Kefi, “Ko e hā e meʻa ʻoku totonu ke u faí?”

“ ʻUluaki meʻá ke ta kumi ha teunga ʻo Pilikihami ʻIongi,” ko e Fineʻeikí ange ia.

Ne ʻahiʻahiʻi ʻe Kefi e kote ʻuliʻuli lōloa ʻo ʻene kuitangatá pea pelu hake e ongo nima ʻo e sote hina ʻo hono tuongaʻané. Naʻe fakaʻaliʻali ange ʻe honau kaungāʻapi ko Misa Kalanitií e founga ʻalu ʻaki hono tokotoko ʻakaú.

Naʻe maʻu hake ʻe he Fineʻeikí ha fuʻu tatā ʻuliʻuli ʻi ha kōpate peá ne fakatui ia ʻi he ʻulu ʻo Kefí. Naʻe pehē ange ʻe he Fineʻeikí, “ ʻE laukau ʻaki koe ʻe Pilikihami ʻIongi. Ko e taimi ní ʻoku fie maʻu haʻo laʻipepa foʻou.”

Naʻe kumi ʻe Kefi ha ngaahi fakamatala fekauʻaki mo Pilikihami ʻIongi ʻi he ngaahi tohi hisitōliá pea mo e Uepi saiti ʻa e Siasí. Naʻe vave hono toe hiki foʻou ʻene laʻipepá.

Naʻe pehē ʻe Kefi, “Ko e talanoa moʻoni kia Pilikihami ʻIongí.”

Naʻe fakataha mai e kalasi ʻa Kefí ki he fale vaʻingá ʻi he ʻaho naʻe fai ai ʻenau tulamá. Naʻe tangutu pē e ngaahi mātuʻá mo e fānau ako kehé ʻo talitali ʻi honau ngaahi seá. Naʻe fakafeʻiloaki ʻe Misa Sotapeeki e polokalamá; naʻá ne mavahe leva mei he funga siteisí kae lau ʻe he kau akó ʻenau ngaahi kongá.

Naʻe fakaʻofoʻofa hono lau ʻe ʻĀleki ʻene kongá, ka naʻe fetoʻoaki ʻe Lenitolo ia ʻene ngaahi leá. Naʻe fekau ʻe Misa Sotapeeki ke ne toe kamata. Naʻe kuku ʻe Kefi hono tokotokó. ʻI he hoko hono taimí, naʻá ne lau maʻuloto e talanoa moʻoni ʻo Pilikihami ʻIongí.

ʻI he ʻosi ʻenau tulamá, naʻe ʻeke ange ʻe Lola, “Naʻá ke liliu e meʻa ʻi hoʻo laʻipepá?”

“ ʻIo. Naʻá ku tala e moʻoní,” ko Kefi ange ia.

Naʻe pehē ʻe Lola, “Ko Misa Sotapeeki ʻena ʻoku haʻú.”

Naʻe pehē ange ʻe Misa Sotapeeki, “Fakaʻofoʻofa ʻaupito, ongo tamaiki.” Naʻá ne toe hoko atu, “ ʻE Kefi, ko e Pilikihami ʻIongi lelei taha koe kuó u mamata aí.”