Naʻe fakamoleki ʻe he kāingalotu ʻi ʻAfiliká ʻa e ʻaho Tokonakí, 21 ʻo ʻAokosi 2010, ke fakaleleiʻi honau ngaahi koló ko e konga ia ʻo e ʻAho ʻo e Nima Fietokoni ʻi ʻAfilika Kotoa Peé ki he 2010.

ʻI he taʻu ní, naʻe fakaafeʻi ʻe he Siteiki ʻApa Naisīliá ʻa e ngaahi kulupu toʻu tupu lahi ʻi he koló ke kau fakataha mo kinautolu, ʻo nau ʻomai ai ha kakai ʻe toko 1,000 tupu. ʻI he Vahefonua ʻUmuahia Naisīliá, naʻe laka hake ʻi he toko 100 ʻa e kāingalotu mei ha ngaahi kolo ʻe ono naʻa nau kosi ʻa e musié, tutuʻu ʻa e ngaahi matalaʻiʻakaú, mo fakamaʻa ʻa e ngaahi fakatalí mo e kelekele ʻo e Kautaha Fakamafolalea ʻo e Vahefonua ʻApiá.

ʻI ʻAkulā, Kaná, naʻe vahe ʻa e ngaahi koló ke nau fakamaʻa ha ngaahi feituʻu kehekehe, ʻo kau ai ʻa e ngaahi falemahakí, ʻapiako ʻa e fānaú, mo e ʻapi polisí. Naʻe ʻi ai e kāingalotu ʻe niʻihi naʻe vahe ke nau fakafonu ʻa e ngaahi luoluó pe fakamaʻa ʻa e ngaahi fakatafenga vai ʻa ia kuo mapuní.

Ko e feituʻu kotoa pē naʻe ʻi ai ʻa e kāingalotú mo honau vesi Nima Fietokoní, naʻe talitali fiefia kinautolu ʻe he ngaahi koló ʻaki ʻa e loto houngaʻia koeʻuhí ko ʻenau tokoní. Naʻe fakahā ʻe he faifekau tauhi ʻo e ʻApiako Fakatekinikale ʻo e Vahefonua ʻApiá ki he kau ngāue tokoní, “ ʻI ha kuonga ʻoku ʻeke ai ʻe he tokotaha kotoa pē pe ko e hā ʻe fai ʻe he puleʻangá maʻanautolú, ko e fakalakalaka fakafiefia ia ke ʻi ai ha kautaha ʻokú ne hokohoko atu ʻa e ngāue tokoni maʻá e faʻahinga ʻo e tangatá.”

ʻOku lava ke maʻu ʻi he taimí ni ʻa e ngaahi folofola ʻe tolu ʻa e Siasí kuo fakatahaʻí ʻi he lea faka-ʻInitonēsiá, ʻo lava ai e kakai lea faka-ʻInitonēsiá ke maʻu ʻa e Tohi ʻa Molomoná, Tokāteline mo e Ngaahi Fuakavá, mo e Mataʻitofe Mahuʻingá ʻa ia kuo paaki fakataha ʻi heʻenau lea pē ʻanautolú. ʻOku toe maʻu foki mo e pulusinga foʻou ʻo e Tohi ʻa Molomoná ʻi he lea faka-ʻInitonēsiá.

ʻOku toe maʻu foki ʻa e folofola ʻe tolu kuo fakatahaʻí ʻi he lea faka-ʻInitonēsiá ʻi he ʻinitanetí. ʻOku kau ʻi he folofola ʻi he ʻinitanetí ʻa e ngaahi futinouti, ngaahi mapé, mo e ngaahi taá peá ne fakangofuaʻi ʻa e niʻihi te nau lau iá ke fakaʻilongaʻi ʻa e ngaahi folofolá mo fakahoko ha ngaahi fekumi ʻaki ʻa e ngaahi foʻi lea mahuʻingá. ʻE lava pē ke maʻu atu ia ʻi he scriptures.lds.org/ind.

ʻOku ʻi he toko 6,000 tupu ʻa e kāingalotu ʻi he Siasí fakaemāmani lahi ʻoku nau lea faka-ʻInitonēsia, pea ko e tokolahi ʻo kinautolu ʻoku nau ʻi ʻInitonēsia, Maleisia mo ʻAmelika. Ko ʻInitonēsiá ko e puleʻanga tokolahi taha ia hono fā ʻi māmaní.

Kuo poupouʻi ʻe he Kau Palesitenisī ʻUluakí ʻa e kāingalotú ke nau kumi haʻanau folofola pē ʻanautolu pea ke fakaʻaongaʻi ia ʻi he ako angamahení, ʻi he ngaahi fakatahaʻanga ʻa e Siasí, mo e ngaahi uiuiʻi ʻi he Siasí.

Naʻe fakakau atu ʻa e Hivá mo e Folofolá, ʻa e polokalama letiō fakauike ʻa e Kuaea ʻa e Tāpanekale Māmongá, ki he Hall of Fame ʻa e Letiō ʻi ʻAmeliká. Naʻe fili ʻa e polokalama lētioó hili hono fokotuʻu atu ʻe ha poate ha ngaahi polokalama ke fakakaú pea fili ai ʻa e kakaí ki he ngaahi polokalama letioó mo e kakai ʻoku nau saiʻia aí.

Naʻe ikunaʻi ʻe he Hivá mo e Folofolá ʻa e pale ʻi he faʻahinga ko e Paionia Fakafonuá [National Pioneer], ʻa ia ʻokú ne fakalāngilangiʻi ʻa e kau fakamafola lea kuo nau ngāue ʻo ʻikai siʻi hifo ʻi he taʻu ʻe 10 ʻi he ngāue fakalētioó pea hoko ko e kau taki ʻi hono fakatupulaki mo fakalakalaka ʻa e polokalama lētioó ʻi he tuʻunga fakafonuá.

Ko e Hivá mo e Folofolá ko e polokalama fakamafola letiō fuoloa taha ia ʻi ʻAmeliká. Naʻe fakahoko ʻa e fuofua fakamafolá ʻi he ʻaho 15 ʻo Siulaí 1929.

ʻOku fakamafola ʻa e polokalamá ʻi he letioó, televīsioné, mo ha polokalama keipolo ʻe 2,000 tupu. ʻOku toe ala maʻu atu foki ʻi he ʻinitanetí ʻi he musicandthespokenword.org. ʻI he peesi ʻuluakí, lomiʻi ʻi he Listen Live pea muimui ʻi he link ki he online streaming.