Kātoangaʻi ʻe he Semineli Pongipongí Hono Taʻu 60
ʻE lava pē ke faingataʻa ʻa e semineli pongipongí, ka ʻi he taʻu ʻe 60 tupu kuohilí kuo ako ha toʻu tupu ʻe laui miliona tupu ʻo e Siasí ke nau ʻā hake kimuʻa ʻi he hopo ʻa e laʻaá pea feinga ke ʻoua naʻa ngata pē ʻenau tokangá ki honau fofongá kae kau atu mo honau ʻatamaí ʻi he nofotaha ʻi he folofolá ʻa ia ʻoku ʻaongá.
Naʻe pehē ʻe Keli Hoasi, ko e tokoni pule ki he semineli mo e ʻinisititiuti ʻo e ako fakalotú, “ ʻI heʻenau fakamoleki ha kiʻi miniti siʻi ʻi he folofolá ʻi he ʻaho takitaha, fai ʻenau fakamoʻoní, mo ongoʻi ʻa e Laumālié ʻoku ʻikai ngata pē ʻi heʻene hoko ko ha fakamālohia ki he fānau akó ʻi heʻenau ʻalu ki he akó, ka ʻoku hoko ia ko ha fakamoʻui ʻi he ngāue ʻa e Fakalelei ʻa Sīsū Kalaisí ki heʻenau moʻuí. Ko ha faingamālie lelei ia ki he toʻu tupú.”
Ko e Tupuʻanga ʻo e Semineli Pongipongí
Naʻe fakahoko ʻa e fuofua kalasi seminelí lolotonga ʻa e taimi ako angamahení ʻi he 1912 ʻi ha akoʻanga naʻe hoko atu pē ki he ʻApiako Māʻolunga Kalānité ʻi Sōleki Siti, ʻIutā, ʻAmelika. Kae kehe, ʻi ha ngaahi taʻu lahi mei ai, kuo toe tokolahi ange ʻa e toʻu tupu ʻo e Siasi naʻe lēsisita ʻi he akoʻanga puleʻangá ka naʻe ʻikai ke ʻi ai ha ngaahi kalasi semineli ʻo hangē ko e fānau ako ʻi he Ako Māʻolunga Kalānité.
ʻI he tupu vave ʻa e mēmipasipi ʻo e Siasí ʻi he Faka-Tonga ʻo Kalefōniá ʻi he 1940 tupú, naʻe ueʻi ʻe he fie maʻu ke akoʻi ʻa e toʻu tupú ʻi he ongoongoleleí ha kulupu ʻo ha kau palesiteni fakasiteiki ke nau kole ke fokotuʻu ʻa e polokalama semineli ʻa e Siasí ʻi he feituʻu Faka-Tonga ʻo Kalefōniá.
Lolotonga ʻa e taʻu fakaako 1948–49, naʻe lavaʻi lelei ʻe Melioni D. Hengisī, ʻa ia ne ngāue kimui ange ʻi he Kau Palesitenisī ʻo e Kau Fitungofulú, hono akoʻi ʻo e kalasi semineli pongipongí ʻi he ʻApiako Māʻolunga Uēsite ʻi Sōleiki Sití. Naʻe pehē ko ha fakakaukau lelei ʻeni maʻá e Kāingalotu ʻi Kalefōniá, pea naʻe fakangofua ʻa e ngaahi siteiki ʻe 11 ke fokotuʻu ha ngaahi kalasi pongipongi ʻe 13.
Feau ʻo e Ngaahi Fie Maʻu Kehekehé
Mei hono fokotuʻu ʻo e polokalamá lolotonga ʻa e taʻu fakaako ʻo e 1950–51, naʻe mafola ʻa e semineli pongipongí ʻi ʻAmelika mo e tapa kehekehe ʻo māmaní, ʻo tokoniʻi ʻa e toʻu tupu he feituʻu kotoa ke ako ʻa e folofolá mo moʻui ʻaki ʻa e ngaahi tefitoʻi moʻoni ʻo e ongoongoleleí. Naʻe toki liliu hono hingoá ki he “semineli fakaʻahó,” koeʻuhí naʻe ʻikai fakahoko ʻa e ngaahi kalasi kotoa pē ʻi he pongipongí.
Ko e konga ʻo e meʻa ʻoku ola lelei ai ʻa e semineli fakaʻahó ko ʻene malava ke feliliuakí. ʻOku fokotuʻutuʻu ʻa e ngaahi polokalamá ʻi he tuʻunga fakasiteikí mo fakavahefonuá, pea ʻe lava ke fokotuʻutuʻu ʻa e ngaahi kalasí ʻi ha uooti pe kolo ʻe taha pe ko hono fakatahaʻi ʻo ha ngaahi uooti pe ngaahi kolo ʻo fakatatau ki he ngaahi fie maʻu mo e tuʻunga ʻoku ʻi ai ʻa e toʻu tupú, mātuʻá, mo e kau taki lakanga fakataulaʻeikí.
Lolotonga ʻoku kei maʻu faingamālie ha fānau ako ʻe 115,000 ʻi he taʻu takitaha mei he semineli ʻoku fakahoko lolotonga ʻa e taimi akó ʻi he ngaahi feituʻu ʻoku tokolahi ai ʻa e kāingalotu ʻo e Siasí, ʻoku kau atu ha fānau ako ʻe meimei 217,000 ʻi he māmaní ki he semineli fakaʻahó.
Koeʻuhí ʻoku ʻi ai ha niʻihi ʻo e toʻu tupu ʻi he Siasí ʻoku nau nofo mamaʻo mei he kāingalotu kehe ʻo e Siasí ke kau atu ki he ngaahi kalasi semineli lolotonga ʻa e taimi akó pe fakaʻahó, naʻe fokotuʻu ai ʻa e polokalama semineli ako pē ʻi ʻapí. ʻOku fakamoleki ʻe he fānau ako pē ʻi ʻapí ha ʻaho ʻe fā ʻi he uike takitaha ke nau ako fakafoʻituitui ʻa e ngaahi lēsoní, pea nau toki fakataha mo e fānau ako kehe ʻoku nau ako pē ʻi ʻapí tuʻo taha ʻi he uike ke aleaʻi ʻa e meʻa naʻa nau akó.
Ko ha Maka Naʻe Tā taʻe tau ai Ha Nimá
ʻI he ʻaho ní, ʻoku fakahoko ʻa e ngaahi kalasi seminelí ʻi he vahefonua kotoa pē ʻi ʻAmelika pea ʻi he fonua ʻe 140 ʻi he feituʻu kotoa pē ʻi māmani. ʻI he 1948 naʻe hoko ʻa Kānata ko e fuofua fonua mavahe mei ʻAmelika ke fakahoko ai ʻa e seminelí. ʻI he mafola atu ʻa e semineli pongipongí, naʻe hoko atu ai ʻa Mekisikou ʻi he 1958, Finilani mo Siamane ʻi he 1962, Siapani ʻi he 1963, Panamā ʻi he 1964, pea mo ha toe ngaahi fonua kehe ʻi he ngaahi taʻu kimui aí. Kimuí ni mai, naʻe fokotuʻu ʻa e ngaahi kalasi seminelí ʻi he 2008 ʻi Pēnini, Siosiā, pea mo Moloko.
ʻI he mafola atu ʻa e seminelí ki he funga ʻo māmaní, ʻoku tupulaki ha komiunitī fakaemāmani lahi ʻo e fānau ako seminelí. Neongo pē ko e fē ʻa e feituʻu ʻoku nofo ai ʻa e fānau ako seminelí, ʻoku nau ako maʻuloto ʻa e ngaahi veesi folofola tatau, ako ʻa e ngaahi kupuʻi folofola tatau pē, ongoʻi ʻa e Laumālie tatau pē ʻi he tupulaki ʻenau fakamoʻoní, pea ngāue ke langa hake ʻa e puleʻanga tatau pē.
Ngaahi Tāpuaki mei he Feilaulaú
ʻOku fai ʻe he fānau ako seminelí ʻa e ngaahi feilaulau ke ʻomi kinautolu ke toe vāofi ange mo e Tamai Hēvaní, ʻo tatau ai pē pe ʻoku nau kau atu lolotonga ʻa e taimi akó, fakaʻahó, pe ako pē ʻi ʻapí.
Naʻe pehē ʻe Misa Hoasi, “ ʻI he taimi ʻoku fili ai ha tokotaha taʻu 15, ‘Te u tuʻu hake ʻi he 5:00 pongipongí ki he seminelí,’ ʻoku ʻikai ngata ʻi heʻene hoko ko ha feilaulaú, ka ʻoku hoko hono ngāue ʻaki e tauʻatāina ke fili ko iá ko ha fakahā ki he Tamai Hēvaní ʻoku fakafoki ʻaki ha tāpuaki.”
ʻOku hoko ʻo moʻoni ʻaupito ʻa e ngaahi tāpuaki ko iá ʻi he ʻahó ni ʻo hangē ko ia ʻi he taʻu ʻe 60 kuo hilí, pea ʻoku hokohoko atu hono tāpuakiʻi ʻe he seminelí ʻa e moʻui ʻa e toʻu tupú ʻi he tapa kotoa pē ʻi māmaní.
Kuo lahi hake ʻi he toʻu tupu ʻe toko miliona ʻo e Kau Māʻoniʻoni ʻi he Ngaahi ʻAho Kimui Ní kuo ʻaonga kiate kinautolu ʻa e semineli pongipongí talu mei hono kamataʻangá ʻi he taʻu ʻe 60 kimuʻá.
© IRI