ʻOku sio hoku fāmilí ʻi he ngaahi heleʻuhila ko ia ʻoku lau ko e heleʻuhila ʻa e kakai lalahí. ʻOku mahuʻinga ke ʻi ai haku taimi mo kinautolu, ko ia, te u fakamatalaʻi fēfē ange hono ʻuhinga ʻoku ʻikai te u sio ai ʻi he ngaahi heleʻuhila peheé?

ʻE faingataʻa tatau pē hoʻo fili ʻa e meʻa ʻoku totonu ke ke fai mo ho fāmilí mo ia ke fai mo ho ngaahi kaungāmeʻá—pea ʻoku toe faingataʻa ange ia he taimi ʻe niʻihi. Ko e meʻa lelei ʻa e ʻikai te ke fie fai ha meʻa ʻoku hala ke fetongi ʻaki ho ngaahi tuʻunga ʻulungāanga mahuʻingá. Neongo he ʻikai ongo pehē ia he taimí ni, ka ʻe hanga ʻe hoʻo fakamuʻomuʻa ʻa e ʻOtuá ʻi hoʻo moʻuí ʻo faitāpuekina ho fāmilí pea ʻai ke ke hoko ko ha faʻifaʻitakiʻanga kiate kinautolu. Ka ʻoku nau kei hoko pē ko ho fāmili, pea ʻoku mahuʻinga ke ʻi ai hao taimi mo kinautolu. ʻE lava ke ke fokotuʻu ange ha ngaahi heleʻuhila kehe ʻokú ke ʻiloʻi ʻoku fakatupulaki pe ngaahi ʻekitivitī hangē ko ha ngaahi vaʻinga pe ʻeva lue lalo.

ʻOku mahuʻinga ke ke ʻai ke ʻiloʻi ʻe ho fāmilí hoʻo ngaahi tuʻunga moʻuí ʻi ha founga fakamaatoato mo fakatōkilalo. Lea totonu kiate kinautolu kau ki he ʻuhinga ʻokú ke fili ai ke ʻoua naʻá ke sio ʻi ha faʻahinga heleʻuhila ʻe niʻihi. Lotu ke ke maʻu ʻa e mālohi ke fakahoko ʻeni kiate kinautolu pea ke ʻi ai ʻa e laumālie ʻo e mahinó. ʻAmanaki pē ʻe lava ke fakaʻapaʻapaʻi koe ʻe ho fāmilí ʻi hoʻo fai ʻení, pea ke ke tokoni ʻi hono tauhi ʻo e Laumālié ʻi ho lotó lolotonga iá ʻokú ke teke ki tuʻa ʻa e mītia ʻoku koví.