Fakafeʻiloaki ʻo e Ongo Tohi Tuʻutuʻuni Foʻoú Lolotonga e Ako Fakaemāmani Lahí

Naʻe pehē ʻe Palesiteni Monisoni, ʻi heʻene fakatokanga fekauʻaki mo e mavahe mei he ngaahi polokalama ʻa e Siasí ʻi he taimi ʻoku ʻikai feangainga ai e kau takí mo e ngaahi tuʻutuʻuni mo e founga ngāue ʻa e Siasí, “ ʻOku ʻi ai e malu ʻi he ongo tohi tuʻutuʻuní. Te na hoko ko ha tāpuaki kiate kimoutolu pea kiate kinautolu ʻoku mou tauhí ʻi hoʻomou lau, maʻu e mahino mo muimui kiate kinauá.”

ʻOku ʻomi ʻe he ongo tohi tuʻutuʻuní ha toe fakaikiiki lahi ange mo ha malava ke fai ha feliliuaki ke fakaʻehiʻehi mei ha ongo meʻa fakatuʻutāmaki, ʻo hangē ko ia ne lea ki ai ʻa Palesiteni Poiti K. Peeka, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá.

Ko e ʻuluakí, ko hono fakatuʻutāmaki ko ia ʻo hono puleʻi ʻo e ivi tākiekina ʻo e Laumālie Māʻoniʻoní mei he ngaahi polokalama ʻo e Siasí. Naʻá ne pehē, “Ko ha ngāue fakalaumālie ʻoku tau hanganaki atu ki aí, pea ko e ngāue fakalaumālié kuo pau ke tataki ʻe he Laumālié.”

Naʻá ne pehē ko e fakatuʻutāmaki hono uá ko hono “fokotuʻu ʻo e Siasí taʻe kau ai ʻa e ongoongoleleí. ʻOku tau fie maʻu ʻa e Siasí ke ʻi he moʻui ʻa e kāingalotú pea fokotuʻu ʻa e ongoongoleleí ʻi honau lotó.”

Ko e lahi taha ʻo e fakamatala ʻi he Tohi Tuʻutuʻuni Fika 1: Kau Palesiteni Fakasiteikí mo e Kau Pīsopé ʻoku tatau mo e fakamatala fakamuimuitaha ʻi he Tohi Tuʻutuʻuni ʻo e Siasí, Fika 1 ʻo e 2006. ʻOku fakakau ki ai ʻa e ngaahi tohi fakamuimuitaha ʻa e Kau Palesitenisī ʻUluakí, kuo fakanounouʻi pea fakamahinoʻi e ngaahi vahe fekauʻaki mo e ngaahi fatongia ʻo e kau palesiteni fakasiteikí mo e kau pīsopé, pea kuo ʻi ai ha ngaahi nāunau kuo toe fokotuʻutuʻu ke faingofua ange hono kumí.

ʻOku toe lahi ange e ngaahi liliu ki he Tohi Tuʻutuʻuni Fika 2: Ko Hono Puleʻi ʻo e Siasí . ʻOku ʻuhinga e fokotuʻutuʻu fakatefitoʻi moʻoní ke fakasiʻisiʻi ange ai e fihituʻu e ngaahi polokalama ʻa e Siasí pea fakaʻatā ha fakafeʻungaʻi e ngaahi polokalamá ʻi he taimi ʻoku fie maʻu aí kae ʻoua ʻe taʻetokangaʻi ai e ngaahi tuʻutuʻuní, founga ngāué mo e ngaahi polokalamá.

ʻOku kau ʻi he ngaahi liliu ke fai ki ai ha tokangá ʻa hono fakasiʻisiʻi ko ia e ngāue ʻa e pīsopé ʻaki hono fakalahi atu e fatongia ʻo e fakataha alēlea fakauōtí mo hono kau mēmipá, ʻa e malava ko ia ke fakalahi atu e tuʻolahi ʻa e ngaahi fakataha ʻa e alēlea fakauōtí, fakamahino fekauʻaki mo e misiona ʻo e Siasí, ʻo hoko ai e ngāue ʻa e kōmiti uelofea ʻa e uōtí ki hano aleaʻi ʻo e kōmiti pule ʻo e lakanga fakataulaʻeikí (ʻa ia ʻe lava ke fakaafeʻi ki ai e palesiteni ʻo e Fineʻofá ʻi he taimi ʻe fie maʻu aí) mo e alēlea fakaūotí, ʻo ʻikai ke toe ʻi ai ha kōmiti ʻekitivitī pea nau tokangaʻi ʻa e ngaahi ʻekitivitií ʻo fakafou ʻi he alēlea fakauōtí mo ha ngaahi liliu kehe pē.

ʻOku fakamahinoʻi ʻe he ongo tohi tuʻutuʻuni foʻoú ha taʻefemahinoʻaki fekauʻaki mo e misiona konga ʻe tolu ʻo e Siasí—malanga ʻaki, fakahaohaoaʻi mo e huhuʻí.

ʻOku fakapapauʻi mai ʻe he Tohi Tuʻutuʻuni Fika 2, konga 2.2, ʻa e ʻuhinga ʻa e Kau Palesitenisī ʻUluakí ʻi he 1981, ʻoku hoko ʻa e ngaahi meʻá ni ʻe tolu ko ha konga ʻo ha ngāue maʻongoʻonga pē ʻe taha ʻo nau pehē: “Naʻe fokotuʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻe he ʻOtuá ke tokoni ki Heʻene ngāué ke fakahoko e fakamoʻui mo e hakeakiʻi ʻo ʻEne fānaú” (vakai, Mōsese 1:39).

Naʻe fakatokanga ʻa ʻEletā ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e “tōtuʻa ʻenau tokanga ki he ngaahi fakaʻuhinga mo e ngaahi fakangatangata ki he ngaahi faʻunga ko ʻeni ʻe tolu ʻo e ngāue ʻa e ʻEikí” pe “ ʻikai fakakau ai ha ngaahi ʻelemēniti mahuʻinga kehe hangē ko hono tokangaekina ʻo e masivá.”

Naʻá ne pehē, “Ko e tefitoʻi moʻoni fakalūkufua ʻoku hā he konga 2.2, ʻoku pehē ‘ʻoku [fakataumuʻa ke] poupouʻi mo fakamālohia ʻe he ngaahi polokalama mo e ngaahi ʻekitivitī ʻo e Siasí ʻa e niʻihi fakafoʻituituí pea mo e ngaahi fāmilí.’”

Naʻe pehē ʻe ʻEletā Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ko e ngaahi tefitoʻi moʻoni mo e ngaahi tokāteline ʻoku ʻi he ʻuluaki vahe ʻe tolu ʻo e Tohi Tuʻutuʻuni Fika 2 “ko e fakavaʻe kinautolu ki he puleʻi ʻo e Siasí pea kuo pau ko e fakavaʻe ia ʻo e meʻa kotoa pē ʻoku [fai ʻe he kau takí].” Ka neongo ia, ko e ngaahi vahe hoko atu ʻo e tohí, tautautefito ki he vahe foʻou ʻoku ui ko e “Fāitahá mo Hono Fulihí,” ʻa ia ʻoku tokoni ke fakamatalaʻi e taimi ʻe lava ke fulihi ai ha ngaahi tuʻutuʻuni pe polokalama ʻa e Siasí.

ʻOku pehē ʻe ʻEletā Kuki ʻoku tokoni e vahé ni he “ ʻokú ne fokotuʻutuʻu mahino mai ʻa e ngaahi meʻa kuo pau ke faitatau ʻi he feituʻu kotoa pē ʻi he siasí” pea pehē foki “ ʻoku ʻi ai ʻa e ngaahi tefitoʻi moʻoni mahuʻinga ʻaupito ʻoku nau fakahā mai ʻa e ngaahi tūkunga ʻe ala fakangofua … ʻa e fulihi fakalotofonuá.”

ʻOku kau ʻi he ngaahi sīpinga ʻo e taimi ʻe lava ke fai ai ha fulihí ʻa hono kumi ʻo e kau ngāue ki he ngaahi houalotú mo hono ngaahi polokalamá pea ʻi he founga pea mo e tuʻo lahi ʻo e ngaahi fakataha fakatakimuʻá mo e ngaahi ʻekitivitií. ʻOku kau ʻi he ngaahi tūkunga ʻoku totonu ke fakakaukauʻí ʻa e tūkunga ʻo e fāmilí, fefonongaʻakí mo e fetuʻutakí, tokosiʻi pe tokolahi ʻo e kāingalotú mo e tuʻunga malú.

Naʻe pehē ʻe ʻEletā Kuki, “ ʻOku totonu ke lotua maʻu pē ʻe he kau takí e fakahinohino ʻa e Laumālié ʻi hono fakakaukauʻi e ngaahi fulihi ʻe tāú pea fealēleaʻaki mo honau maʻu mafai pule ofi tahá.”

ʻI hono tataki ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá ne fokotuʻu mai ʻe lava ke ʻuhingamālie ange e akó ʻi hono ako taha taha ʻe ngaahi fakahinohino ʻo e ngaahi vahé pea aleaʻi e ngaahi tefitoʻi moʻoní ʻi he ngaahi fakataha alēleá.

Naʻe faleʻi ʻa ʻEletā ʻOakesi ʻo pehē kapau ʻe ʻi ai ha fehuʻi ʻa e kau takí fekauʻaki mo ha ngaahi tuʻutuʻuni pe polokalama he ʻikai lava ʻo tali ʻe he ongo tohi tuʻutuʻuní, ʻoku totonu ke nau aleaʻi kinautolu mo honau kau taki lakanga fakataulaʻeiki pulé. Naʻá ne pehē kapau he ʻikai ke ʻi ai ha tali fakafiemālie ki he ngaahi fehuʻí, “ko e taki lakanga fakataulaʻeiki māʻolunga tahá pē ʻoku totonu ke fetuʻutaki ki he ʻŌfisi ʻo e Kau Palesitenisī ʻUluakí.”