Kuo tuku atu ʻe he Siasí ha ngaahi polokalama fakakomipiuta ki he telefoni toʻotoʻó ke tokoniʻi ʻa e kāingalotú ʻi hono ako ʻo e ongoongoleleí ʻo aʻu pē ki he taimi ʻoku nau fefonongaʻaki aí. ʻOku fakafaingamālieʻi ʻe he polokalama fakakomipiuta ko e Gospel Library ʻa e niʻihi ʻoku nau fakaʻaongaʻi iá ke fakaʻilonga tohi, fakaʻilongaʻi, mo hiki ha fanga kiʻi fakamatala ʻi heʻenau lau folofolá, ngaahi lea mei he konifelenisi lahí, mo e ngaahi tohi lēsoni ki he ʻaho Sāpaté. ʻOku hanga ʻe he polokalama fakakomipiuta ko e Mormon Channel ʻo fakamafola ʻa e polokalama letiō ʻa e Siasí ʻo kau ai mo e folofolá, ngaahi lea mei he konifelenisi lahí, mo e ngaahi makasini ʻa e Siasí. ʻAlu ki he mobile.lds.org ki ha ngaahi fakamatala fekauʻaki mo hono ngāue ʻakí.

Naʻe toe fakaava ʻa e Senitā Maʻá e Kau ʻAʻahi ki he Temipale Losi ʻEniselesí ʻi he ʻaho 7 ʻo ʻAokosi, 2010, ko e hili ia hono fakaleleiʻi ʻi ha taʻu ʻe ua. ʻOku fakamamafaʻi ʻe he senitaá ʻa e hisitōlia ʻo e Siasí ʻi he Faka-Tonga ʻo Kalefōniá ka ʻokú ne toe tokanga foki ki he ngaahi tefitoʻi moʻoni ʻo e ongoongoleleí. ʻOku ʻi loto ʻi he fale sikuea-fute-ʻe-12,000 (sikuea mita ʻe 1,100) ʻa e ngaahi feituʻu fakaʻaliʻali lahi mo e ongo fale faiva. ʻI lotomālié ʻoku ʻi ai ha maka tā tongitongi fute-ʻe-11 (mita ʻe 3.4) ko ha tatau ʻo e ʻīmisi ʻo Kalaisí, ʻa ia ʻoku lava ke te sio ki ai mei tuʻa ʻi he senitā maʻá e kau ʻaʻahí.

Kuo tuku atu ʻe he FamilySearch.org ha ngaahi lekooti foʻou ʻe 200 miliona tupu ʻoku lava ke fai ki ai ʻa e fekumí ʻi ʻAokosi 2010, ʻokú ne ʻohake ʻa e fakakātoa ʻo e ngaahi lēkooti ʻoku ala maʻu ʻi he Records Search ʻo e ʻinitanetí ki he 700 milioná. Ke lava ʻo hū ki he ngaahi lekōtí, ʻalu ki he Pilot.FamilySearch.org pe ko e beta.familysearch.org. ʻOku malava ʻa hono fakalahi ʻo e konga lahi ʻo e ngaahi lekōtí tuʻunga he kau ngāueʻofa ʻe 350,000 ʻi he Family Search Indexing fakamāmanilahi ʻa ia ʻoku nau hiki ʻa e ngaahi ʻīmisi ʻo e ngaahi lekooti fakahisitōliá ke lava ʻo ngāue ʻaki ʻi he komipiutá.