ʻOku Totonu ke Ke Kau he Seminelí

Naʻe lea fāinoa mai pē ʻa ʻEsilī, “ʻE Lisa, ʻoku totonu ke ke kau he seminelí.” Naʻe ʻi muʻa ʻiate kimautolu ha ngaahi foulutā (folders) naʻe hā ai e lisi ʻo e ngaahi kalasi ke mau fili mei ai ki he taʻu fakaako hokó ʻi heʻemau kamata ʻi he akoʻanga māʻolungá.

Ne u siosio atu pē ki hoku kaungāmeʻá, pea faifai ne u malimali ange. Naʻe ʻikai ke u fie talaange naʻe mamaʻo ʻaupito e seminelí ia mei heʻeku fakakaukaú. Ne u māmālohi pē he Siasí he taimi ko iá, ʻo hangē ko ia ko e konga lahi ʻo ʻeku moʻuí. Naʻe taʻu lahi ʻeku ʻiloʻi pē ʻa e ongoongoleleí ka naʻe ʻikai ke u maʻu ha fakamoʻoni mālohi ki hono moʻoní.

ʻI heʻeku foki ki ʻapi mei he akó ʻi he ʻaho ko iá, naʻe kamata ke u fakakaukau ki he seminelí. Naʻe fiefia ʻaupito ʻa ʻEsilī mo hoku ngaahi kaungāmeʻa kehé ke kau ki ai. Ne u fie maʻu ke fai e meʻa naʻe fai ʻe hoku ngaahi kaungāmeʻá, neongo naʻe ʻikai mahino kiate au e meʻa naʻa nau faí mo e ʻuhinga naʻa nau fai ai iá. Hili ʻeku talanoa mo ʻeku ongomātuʻá ki heʻeku palaní mo maʻu ʻena fakangofuá, ne u fakapapauʻi leva ke u kau ki he seminelí ʻi hoku fuofua taʻu ʻi he akoʻanga māʻolungá.

Naʻe ʻikai ke u ʻiloʻi ʻa e fuʻu ʻaonga lahi ʻo e kiʻi ngāue faingofua ko iá ʻe fai ki heʻeku moʻuí. Naʻe liliu ʻeku moʻuí ʻe he seminelí ʻi he kamata ke u ʻiloʻi ko e fānau au mo e niʻihi kehé ʻa e ʻOtuá, naʻá Ne ʻofeina kimautolu. Naʻe kamata ke u maʻulotu ʻi he ngaahi ʻaho Sāpaté neongo ʻa e māmālohi pē hoku fāmilí.

Kuó u ʻosi ʻeni mei he akoʻanga māʻolungá, ka te u fakamālō maʻu pē ki he seminelí. Naʻe tali mai ʻeku ngaahi lotú pea fakamālohia mo ʻeku fakamoʻoní ʻi he houa ko iá ʻi he ʻaho takitaha. Naʻe tokoniʻi au ʻe he seminelí ke u teuteu ke mali ʻi he temipalé pea fakalotolahiʻi au ke u feinga ke hoko ko ha tokotaha lelei ange.

ʻOku ou ʻilo ʻoku tokanga mai ʻa e ʻOtuá kiate kitautolu takitaha. ʻOku ou ʻilo ko e seminelí ko ha tāpuaki ia naʻá ne tokoniʻi au ke u langa ʻi he fakavaʻe mālohi ʻia Sīsū Kalaisi. ʻOku ou poupouʻi kimoutolu ke mou lesisita ʻi he seminelí. Te ne liliu foki mo hoʻo moʻuí.