Pe Mafai ona E Faia So’u Faamanuiaga?

Sa toulu malosi le kiona ao alu lemu la’u taavale i luga o le mauga. A mafai lava ona ou oo i le tumutumu, o lo’u mafaufau lea, o le a mafai foi ona ou taunuu saogalemu i le fale. Peitai ao o’u taamilo atu i se pioga, sa ou vaaia se taavale ua le mafai ona taofiofi ma o loo agai mai i lalo mai le mauga ma faasasa’o mai lava ia te a’u. Sa na ona sina taimi na ou ee ai ao le’i tupu le faalavelave, ona ou le iloa ai lea o se mea.

Sa ou le iloa le umi o le taimi ua alu ao ou taumafai e pulapula ae ou mata. Sa maatiati mai le kiona i o’u foliga ao lelea mai i totonu o se faamalama o le itu na ta’e. Sa ou tauivi e manatua ni faamatalaga faigofie, e pei o fea sa ou alu i ai ao le’i tupu le faalavelave. I le tuuatoatasi ma le fefe, sa ou tagi i le tiga tutui o lo’u tauau ma lo’u fatafata. Sa ou aioi atu i le Tama Faalelagi ina ia aua ne’i loloto tele o’u manua ma ia ou le afaina.

I ni nai minute mulimuli ane sa ou lagonaina ai le uu e se tagata o lo’u lima. Na faafuasei lava, ona ou uumauina. Sa pupula ou mata ma iloa ai se tamaloa i se suti lanu uliuli ma se pulou o loo tu i fafo o la’u taavale ua papaioa. Fai mai o ia na iloa mai i lo latou fale e lona toalua le laveaga, ma na sau o ia e vaai pe mafai ona ia fesoasoani mai. Na ia uu lo’u lima ma fai mai o le a le afaina a’u.

Sa ou taumafai e fesili atu i le tamaloa pe o ia o se tagata o le Au Paia o Aso e Gata Ai, ae na pau lava le mea na mafai ona ou musumusu atu, “Pe mafai ona e faia so’u faamanuiaga?”

Na ia fai ioe ma aapa mai i totonu o le faamalama na ta’e ma tuu ona lima i luga o lo’u ulu.

Ou te le manatua ana upu. Ae na ou manatua lo’u mafaufau o le a ou malosi aua ua fai lo’u faamanuiaga. Sa ou lagona le filemu ma le mafanafana.

Ina ua taunuu mai le taavale a le falema’i, sa ou le toe iloa atu le tamaloa. Sa ou tuua le falemai i ni nai itula mulimuli ane ma se ivi asoaso gau ma le tele o manu’a ma uno’oa ae leai ni manu’a tuga.

Sa ou tatalo i lena taeao ina ia ou saogalemu i a’u fealuaiga, ma i le taimi muamua sa ou manatu ai e le’i tali mai le Tama Faalelagi i la’u tatalo. Peitai sa vave ona ou iloaina, na Ia taliina ma e Na te le’i tuulafoaia a’u. Sa tali mai la’u tatalo e ala i se tasi o umia ma le faamaoni le perisitua sa nofo e le mamao mai le nofoaga na ou lavea ai, o se faalavelave na semanu e sili atu le tulaga mafatia ou te oo i ai.

Ou te le matauina foliga o le tamaloa pe afai ou te pasia o ia i luga o le auala. Ou te le manatua lona leo pe afai ou te faalogo o faatalofa mai. Peitai ou te faafetai mo lenei tagata ese o lē sa agavaa ma naunautai e tuuina mai se faamanuiaga faaleperisitua ina ua ou manaomiaina.