Fesili & Tali
“Pe faapefea ona ou tali atu pe a fai mai au uo e le mafai ona vaai se tagata i le Atua?”
Masalo ua faitau au uo i nai fuaiupu o le Tusi Paia o loo faapea mai e le mafai e tagata ona vaai i le Atua (tagai i le Esoto 33:20; Ioane 1:18; 1 Timoteo 6:14–16; 1 Ioane 4:12). E ono feteenai nei fuaiupu ma isi fuaiupu o le Tusi Paia lea e faapea mai na vaai tagata—e pei o Iakopo, Aperaamo, Mose, ma Isaia—i le Atua (tagai i le Kenese 18:1; 32:30; Esoto 33:11; Isaia 6:1).
O le mea e lelei ai, ua tatou maua le Faaliliuga a Iosefa Samita o le Tusi Paia, lea ua faamalamalama mai ai ia mau e fa lea e fai mai e le mafai e se tagata ona vaai i le Atua. O le faaliliuga musuia a le Perofeta o na fuaiupu ua faamalamalama mai ai o tagata agasalae le mafai ona vaai i le Atua—ae na o i latou o e talitonu. Ma e oo lava foi, i se tagata amiotonu, e tatau ona suia—liuaina—e vaai ai i le Atua (tagai i le MFF 67:11). O le tala i le Penina Tau Tele i le vaai o Mose i le Atua, o loo faamatala ai e Mose o ona mata faaleagaga, ae le o le faaletino, na ia vaai ai i le Atua (tagai i le Mose 1:11).
E mafai ona e ta’u atu i au uo “[tatou] te talitonu o le Tusi Paia o le afioga a le Atua i mea uma ua tonu ona faaliliuina” (Mataupu Faavae o le Faatuatua 1:8). E mafai foi ona e molimau atu e uiga ia Iosefa Samita ma tusitusiga paia o aso e gata ai, lea e fesoasoani tatou te malamalama ai o “e loto mama … e iloa atu le Atua” (Mataio 5:8).
Vaai Atu Faaleagaga ia te Ia
Na aoao mai Alema e faapea o loo molimau mai soo se tulaga faalenatura e uiga i se Foafoa silisiliese e faatatau i ona tulaga lavelave e tele ma mea e faatatau i ai (tagai i le Alema 30:44). O se avanoa sili lenei mo oe e molimau atu ai i au uo o loo mafai ona e lagona Lona faatasi mai i lou olaga i aso uma e ala i le Agaga Paia. E mafai foi ona e faamatala atu tatou te le tau manaomia ona vaai i le Atua ina ia talitonu ai aua o loo i ai o Ia iina. O le mea lena ua tatou maua ai le faatuatua. Afai tatou te vaai ia te Ia, o le a le tele se taumafaiga e manaomia e talitonu ma mulimuli ai ia te Ia i o tatou olaga atoa. O le a i ai se taimi tatou te vaai ai ia te Ia i le isi itu o le veli. Sei oo la i lena taimi, ae o lou talitonuga ua lava lea e vaai ai faaleagaga i Lona aao i lou olaga.
Janel E., 18 tausaga, Uosigitone, ISA
E Alofa le Atua ia te A’u
Sa fesili mai i se tasi taimi le tagata lea ma te potu faatasi pe faapefea ona ou talitonu i se mea ou te le o vaai i ai. Sa ou tali atu ona e mafai ona ou lagonaina le Agaga Paia, lea o loo molimau mai e silafia a’u e le Atua, ma o le mea lea ua faateleina ai lo’u faatuatua ma aumai ai le filemu i lo’u loto. E le mafai ona ou vaai ia te Ia, ae ou te iloa e alofa o Ia ia te au ona ou te faatuatua ma e ou te lagonaina Lona Agaga.
Samuelu P., 18 tausaga, Lara, Venesuela
Tatala o Tatou Loto
E toalaiti lava nai tagata na vaai i le Atua ao latou i ai i le lalolagi, ae ua aafia uma ai lava i tatou. Ua tatou vaai i mea uma ua Ia foafoaina, o faamanuiaga uma ua Ia tuuina mai, ma e mafai ona tatou lagonaina uma Lona alofa. E sili atu ona ou lagonaina pe a tuuina atu la’u molimau. Afai lava e tatalaina o tatou mata ma loto, o le a tatou vaai i le Atua i mea uma e siomia ai i tatou, e faapea foi i le tasi ma le isi, o Ana fanau.
Katelyn E., 16 tausaga, Kalefonia, ISA
O Le a Tatou Tutu i Ona Luma
Ina ua fesili mai a’u uo aoga pe aisea ou te talitonu ai i le Atua pe afai ou te le’i vaai lava ia te Ia, ou te faamalamalama i ai tatou te le’i vaai i le Atua aua e le’i oo i le taimi tatou te vaai ai ia te Ia. A mavae lo tatou toetutu, o le a tatou o mai i Ona luma ina ia faamasinoina (tagai i le MFF 137:9). Ona ou faasoa atu lea o la’u molimau ma faamatala atu o le i ai o le faatuatua o lona uiga o le talitonu lea ma i ai le faamoemoe. Afai latou te faatuatua, o le a latou vaai i le Atua e pei ona ou vaai ia te Ia—i mata o lo’u loto.
Daiana V., 18 tausaga, Santa Cruz, Atenitina
Na Ia Iloaina Ua Moni
I se tasi aso sa ma aoaoina ai ma la’u soa se ulugalii, ma sa ma ta’u atu ia i laua na faailoa atu le Tama ma le Alo ia Iosefa Samita i le tali o lana tatalo. Sa fai mai le tamaloa e leai ma se tasi e mafai ona vaai i le Atua. Na faafuasei lava ona i i mai le faailo o la’u uati, e ta’u mai ai ua tatau ona ma o i le fale. Sa ma tuua lo laua fale i lena aso e aunoa ma le taliina o lena faamatalaga.
O le aso na sosoo ai sa ou faitau ai i se mau i le Tusi Paia ua faapea mai, “Afai e i ai se perofeta a Ieova o ia te outou, ou te faailoa a’u e a’u ia te ia i le faaaliga” (Numera 12:6). Na ou iloa o le a fesoasoani lenei mau ina ia talitonu lenei uso.
Na oo mai le taimi o le isi a maua asiasiga, ma na ma talanoa e uiga i perofeta. Sa ou faaali atu ia te ia lenei mau, ma na suia ona foliga. Na faatumulia ona mata i loimata, ma faapea mai, “E moni lenei mea. E i ai tagata ua saunia e vaai i le Atua.” Na ma aoao atu ia te ia i se taimi mulimuli ane ia perofeta o le Tusi a Mamona, o e na vaai i le Atua, ma sa ia iloaina e moni.
Elder Diaz, 25 tausaga, Misiona a Mérida Mekisiko
Faatuatua o Loo i Ai le Atua
O le tulaga masani lava tatou te le vaai i le Atua, ae e mafai ona e lagonaina Lona Agaga. E finagalo o Ia ina ia e iloaina o Ia e ala i le faitauina o tusitusiga paia ma faatuatua ia te Ia. Afai e te faatuatua ia te Ia, e le manaomia lou vaai ia te Ia e te iloa ai po o ai o Ia ma o loo i ai o Ia. O Perofeta e pei o Mose ma Iosefa Samita, o e na vaai moni lava i le Atua, na manaomia le liuaina e vaai ai ia te Ia.
Aaron F., 12 tausaga, Oregon, ISA
Tuu Atu le Molimau
Sa fesili mai ia te au i se tasi taimi sa’u uo i le fesili lenei, ma sa ou fesili i ai po o fea na ia maua mai ai lenei manatu. Fai mai o ia na faaali atu e se tagata ia te ia i le Tusi Paia. Ona ou manatuaina lea o le Ioane 1:18, lea na ia fai mai e le mafai e se tagata ona vaai i le Alii. O le fesoasoani a le seminare, na ou manatua ai nisi o mau i le Tusi Paia lea o loo fai mai o tagata e pei o Mose ma Iakopo, ua faatumulia i le Agaga Paia, na vaai i le Atua. Ma o lea na mafai ai ona ou tali atu ma le lototele i la’u uo ma tuu atu i ai la’u molimau.
Luis M., 17 tausaga, Mato Grosso, Pasila