Alu i le Lotu!

O lo’u tausaga tolu i le aoga maualuga, sa ou fetaui ai i se tamaitai o le Au Paia o Aso e Gata Ai i la’u vasega tusiata. Sa maoae sana uunaiga i lo’u olaga, ma na ou papatiso ma avea ai ma se tagata o le Ekalesia.

Ina ua uma ona ou faauu mai le aoga maualuga, sa fuafua Tina ma Tama e tuua lo matou fale i Kalefonia ae masii atu i Idaho, ISA. Sa faapipii le taavale toso i la matou loli ma agai atu loa i matu. Faatoa matou pasia lava ia Lovelock, Nevada, ae amata loa ona saoasaoa la’u ave i lalo o se tamai aega. Ona sa leai ni uamea e taofiofia le taavale toso, na amata ai ona alu i le isi itu i le isi itu. Sa ou tu faafuasei i taofi, ma sa mamulu ese atu ai le taavale toso, ma matou lelea atu ai i se autu i autafa o le auala, mafuli le loli i le tasi itu ae tito i le isi itu le taavale toso.

O le mea na laki ai sa leai ma se tasi na lavea. Ae o fafo ma totonu o le taavale toso na matuai leaga faia lava. Na pi’o e pei o se peleso [pretzel] le tulaga e faamau ai le taavale toso, na taei uma tioata, ma na salalau solo a matou meatotino.

Na taunuu mai le leoleo o le auala ma valaau le loli toso taavale. Sa le iloa e Tina ma Tama se mea a fai. O si tupe itiiti sa i ai sa alu i le kamupani toso taavale. Sa ou lagona le uunaiga lofituina i lena taimi e tatau ona ou alu i le lotu i le aso na sosoo ai, o le Aso Sa. O Tama, o lē sa le auai i le lotu na manatu o ia o a’u ua valea. Na tatau ona faaputu a matou meatotino ma lipea le taavale toso, ma o a’u le tagata faigaluega autu, aua e pipili ma e le malosi lo’u tamā. Ae na faaauau pea le uunaiga ia ou alu i le lotu. Sa ou talosaga atu ia Tina e talanoa ia Tama mo a’u. Na ia faia, ma sa ou te’i ina ua malie i ai.

Sa ou maua le falelotu i le lotoifale i le taeao o le Aso Sa ma sa ou saofai i le laina pito i tua o le falesa ae faatoa amata lava le sauniga faamanatuga. Sa ou tatalo ina ia faatasi le Agaga ma lo’u aiga i lenei taimi faigata.

Ina ua maea le sauniga, e toatasi pe toalua tagata na latou faailoa mai i la’ua lava ia te a’u, ma sa ou faamatalaina puupuu i ai le mea na tupu. Ona ou toe foi lea i le mea sa matou tolauapi ai ma faaaoga le aso atoa e fesoasoani ai i le tapenaina o mea.

I le taeao o le Aso Gafua ao amata foi ona matou toe tapena, na faafuasei lava ona taunuu mai tagata o le uarota lea sa ou auai, ma ofo mai ni fesoasoani. Fai mai le tagata e ona le faleoloa lea e faatau ai faamalama i le lotoifale e na te suia uma faamalama o le taavale toso e aunoa ma se totogi, ma sa ofo mai foi se tagata e poto e uelo o le a na faia fuaina le faasa’oina o le mea e lave ai le taavaletoso.

E le’i tele se tala a lo’u tamā na fai mai ae na mautinoa lava lona faagaeetia, na maligi loimata o le faafetai o Tina, ae na ma faafetai ma lo’u tuafafine mo le fesoasoani. E oo atu i le faaiuga o le aso, ua matou sauni e faaauau la matou malaga i Idaho.

O se taunuuga o lenei aafiaga, ua ou iloa ai le moni o musumusuga a le Agaga. Ma na ou iloa foi o a tatou tatalo e tele lava ina tali mai e ala i isi tagata ma o le faalagolago i le Alii o le a aumai ai le filemu ma le olioli i o tatou loto.