Pe Tatau ona Faatau Ese Lo Tatou Fale Na Tatou Moemiti I Ai?

O le 1998 na uunaia ai a’u e le Agaga e faatau ese lo matou fale na matou moemiti i ai, lea na matou faamaeaina ma masii atu i ai i le na o le fa tausaga ua tuanai atu! Ao amata ona faauu le ma fanau matutua mai le aoga maualuga ma tuua le aiga, na foliga mai ua telē tele lo matou fale ma sili atu foi ona taugata nai lo le tulaga sa ma manaomia. Faatoa uma lava ona sui la’u galuega lea na ou iloa ai le faaletonu lea e ono oo i ai lo’u totogi.

Ina ua ou auai i le sauniga perisitua o le konafesi aoao ia Oketopa o le tausaga lena, sa faagaeetia a’u i le saunoaga a Peresitene Gordon B. Hinckley (1910–2008). O lana talanoa mai e uiga i a tatou mea tautupe, na ia ta’u mai ai i le au perisitua, “Ua oo mai le taimi e faatulaga ai o tatou aiga.” Ona ia lapatai mai lea, “O loo i ai se faailoga o tau le lelei o i luma atu lea e tatau ona tatou usitaia.”

Na ia saunoa mulimuli ane i lana lauga: “Ou te iloaina, atonu e tatau ai pe afai e faaune mai e fai se fale. Peitai, ia tatou faatauina se fale e mafai ona tatou gafatia ma o le a faaitiitia ai tupe totogi, lea o le a faamalumalu mai pea lava pea i o tatou ulu e aunoa ma se alofa po o se malologa mo le 30 tausaga.”¹

Sa ou ta’u atu i lo’u toalua le fautuaga a Peresitene Hinckley, ma faaopoopo atu lo’u lagona e tatau ona faatau ese lo matou fale. Sa faate’ia a’u, aua sa malie i ai o ia.

I masina na mulimuli mai, sa ma saunia loa e faatau atu lo matou fale ae faatau se isi fale. Sa avea ma se faagasologa umi, ma faavaivai tagata na aofia ai le tele o tatalo ma se anapogi faaleaiga. I se tausaga mulimuli ane, na iu ai lava, ina matou siitia atu i lo matou fale fou, lea e sili atu ona maualalo le totogi faalemasina.

Na faamaonia lava le moni o le saunoaga faaperofeta a Peresitene Hinckley. O le tausaga na sosoo ai na faafuasei ai lava ina oso maualuga le tulaga o le maketi o oloa a le I.S. Na sosoo ai ma le tele o tausaga o maualalo ia tului o pasene, lea na ma faaaogaina e totogi faaitiitia ai la matou mokesi.

O le taimi nei ua i ai se tulaga faaletonu fou i le tamaoaiga o le tele o atunuu o le lalolagi atoa. Ua moni lava le saunoaga a Peresitene Hinckley e faatatau i le taimi nei e pei foi ona moni i le 1998.

Oka so ma fiafia ina ua ma mulimuli i le fautuaga a le perofeta ma musumusuga a le Agaga. E le o toe i ai se ma aitalafu o le mokesi, ma ua ma fiafia e vaai atu i le ma fanau o loo ola i mea ua latou maua.

Ma te tulimatai atu i konafesi aoao taitasi mo fautuaga mai o tatou taitai o le Ekalesia. Ma te iloa o le a faamanuiaina i tatou pe a tatou faalogo ma usitai i a latou taitaiga.