Liahona ma le Ensign Taulai atu i le Tusi a Mamona i le Lomiga o Oketopa

E faasalalau e mekasini a le Ekalesia mai lea taimi i lea taimi se lomiga e taulai atu i se mataupu taua se tasi. O le lomiga o Oketopa o le Liahona ma le Ensign o lenei tausaga o le a tuuto atu lea i le Tusi a Mamona.

O le lomiga o le a taulai atu i fesili taua e tolu: O le a le Tusi a Mamona? Aisea ua tatou maua ai le Tusi a Mamona? O le a le uiga o le Tusi a Mamona ia te a’u?

O le a aofia i le lomiga le talafaasolopito o le Tusi a Mamona, o aafiaga patino o tagata o le ekalesia i le tusi, fautuaga mo le suesueina o mau, ma faamatalaga i le auala e faatatau ai i aso nei. O molimau ma malamalamaaga i le Tusi a Mamona mai perofeta ma aposetolo soifua e 15, faapea ai ma Peresitene uma o le Ekalesia ua mavae atu, o le a faaaofia ai i le lomiga atoa.

“O loo i ai se malosiaga i molimau o i latou o loo taitaia le Ekalesia,” sa fai mai ai Jennifer Greenwood, le pule faatonutonu lagolago o le Liahona. “O a latou molimau e faavae i le Tusi a Mamona, le maaauau o la tatou tapuaiga. Ua ia te i matou se manao tele i tagata o le ekalesia ina ia lagonaina na molimau.”

Ua uunaia tagata o le ekalesia ina ia faaaogaina le lomiga i ni auala se lua, fai mai ai Elder Paul B. Pieper o le Fitugafulu, le Faatonu Sili o le Matagaluega o Mataupu Aoaoina.

“Muamua, e tatau i tagata o le ekalesia ma faifeautalai ona iloiloina le lomiga mo a latou aoaoga patino ma ia faamalolosia ai a latou molimau i le Tusi a Mamona,” na ia fai mai ai. “Lua, e tatau ona latou faasoa atu le mekasini i isi, e aofia ai tagata o le Ekalesia ua le toaaga mai, ma tagata e le auai i le Ekalesia.”

“O lo matou manao ia avea lenei lomiga ma ala e musuia ai tagata ia tatala moni le Tusi a Mamona lava ia ma toe tuuto atu i latou lava i ai,” sa fai mai ai Sister Greenwood. “E matagofie le talanoa e uiga i le Tusi a Mamona, le faitau e uiga i le Tusi a Mamona, ma aoao ai mea e uiga i le Tusi a Mamona, ae o le Tusi a Mamona lava ia e liuaina le tagata, ma na te avatu faalatalata ai le tagata i le Atua.”

Ua lavātia e le Tusi a Mamona ia faaosoosoga o aso, tofotofoga, ma molimau ma ua taoto ai i le fatu o le talalelei a Iesu Keriso.

“O lenei lomiga ua saunia ma le faamoemoe o le a aumaia musumusuga i aiga ma tagata taitoatasi a o latou saili atu ia malamalama, faatino, ma faasoa atu i isi ia aoaoga o le Tusi a Mamona,” sa saunoa ai Elder Pieper.

O le a maua le lomiga o Oketopa i gagana e 42. Ua uunaia tagata uma o le ekalesia ina ia faamasani i ona anotusi. O isi gagana faaopoopo e 39 o le a mauaina le Savali a le Au Peresitene Sili ma Savali a Faiaoga Asiasi mai le lomiga. O le lomiga atoa o le a maua foi i le initoneti i le tele o gagana i itulau o uepi o le Liahona ma le Ensign.

O tagata o le ekalesia e mananao e lesitala, lesitala e fai meaalofa atu ai, po o le maua o ni kopi faaopoopo o le lomiga o le Tusi a Mamona e mafai ona asiasi i o latou Faletusi pe asiasi i le store.lds.org.