O Tu ma Agai fanua o se Olaga Paleni ma le Amiotonu

O le fagususu e faatusa i lo tatou soifua maloloina faaletino. O tusitusiga paia o loo molimau atu i le taua o o tatou tino faaletino i lo tatou alualu i luma e faavavau.

“Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou?

“Afai e faaleaga e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia” (1 Korinito 3:16–17).

Ua faatuina e le Alii se tulaga faatonuina maualuga mo i latou i le tauina mai ia i tatou ia mafaufau i o tatou tino o se malumalu. Sa ou maua se avanoa e faatasi atu ai ma le Peresitene o le Ekalesia i le tele o faapaiaga o malumalu. Ao le’i faia se sauniga o le faapaiaga e masani lava ona manao le Peresitene e siaki le tulaga o le fausiaina o se malumalu fou, lea e i le tulaga sili ona lelei ma matagofie lona mamanuina. O lotoa o loo siomia ai o tatou malumalu e masani lava o ni nofoaga sili ona mata’ina i nuu ua fausia ai.

Alu e tu i luma o se malumalu. Suesue ma le faaeteete le maota o le Alii ma vaai pe le musuia ai oe ina ia faia ni faaleleiga i le malumalu faaletino lea na tuuina atu e le Alii e nofo ai lou agaga e faavavau. Ua faatulaga e le Alii ni tulaga faatonuina autu mo le puleaina o o tatou tino faaletino. O le usiusitai i nei tulaga faatonuina e tumau lava ona avea ma se tulaga e manaomia mo le faaeeina atu o le perisitua, mo se pepa faataga o le malumalu, ma mo le mauaina o se valaauga i le Ekalesia.

O nisi taimi tatou te lagona ai faapea, atonu o le a le taliaina i tatou e tagata ona o le maualuga o tulaga faatonuina ua tatou faatutuina mo i tatou lava. Ae peitai, e i ai lava mea tatou te le faia. Ua tatou maua le Upu o le Poto, lea e fesoasoani ia i tatou ina ia ola ai i se olaga maloloina, o se ituaiga olaga e saofaga atu i lo tatou tuputupu ae ma le soifua laulelei. E i ai o tatou tulaga faatonuina, manatu, ma se auala e ola ai lea e itagia e le toatele o le lalolagi. Ua ou iloa, afai e te ola i le auala e tatau ona e ola ai, o le a matau e tagata ma o le a faagaeetia i latou i ou talitonuga ma o le a e faia se aafiaga i olaga o isi.

Sa ou faaaogaina la’u matata i le itu tau pisinisi o faleoloa tetele. Ona sa avea a’u ma se tasi o le pulega, o lea sa tatau ai ona matou galulue soosoo tauau ma faalapotopotoga o mea tau pisinisi i le lotoifale. O le tele lava o fonotaga ma nei faalapotopotoga e masani lava ona amata i se itula o inuga pia. O se taimi e feoeoea’i ai ma faamasani ai ma alii e i ai i nei faalapotopotoga. E masani lava ona ou le nofonofo lelei i taimi na. I le taimi muamua lava sa ou fesili ai mo se vaitipolo. Sa le’i umi ae ou iloaina o le vaitipolo e foliga tutusa lava ma le tele o isi meainu. Sa le mafai ona ou fausia se manatu ou te le inupia pe a uu i lo’u lima se vaiinu manino. Sa ou faataitaia le root beer. Na tutusa lava le faafitauli.

Na iu lava ina ou filifili e tatau ona i ai sa’u meainu e iloa manino ai lava o a’u o se tagata e le inupia. Na ou alu atu ma talosaga i le tagata e aumai ai meainu mo se ipu susu. E le’i i ai lava se talosaga muamua faapea i le tagata e aumai ai meainu. Na alu o ia i le umukuka ma aumai ai se ipu susu mo a’u. O lea la ua i ai sa’u meainu na foliga ese ai lava mai meainu malolosi na inu e isi. Na faafuasei lava ona avea a’u ma mata’iga. Na tele ni ulaga na faia i la’u meainu. O la’u ipu susu na avea ma se vaega o talanoaga. Na sili atu le toatele o taitai faipisinisi na ou feiloa’i i ai i lena afiafi nai lo isi taimi muamua i se itula o faamasaniga.

Na avea le susu ma a’u meainu filifilia i itula o faamasaniga. Na vave ona avea ma se malamalama masani o a’u o se Mamona. O le faaaloalo na ou maua na ou matuai ofo ai lava, e pei foi o se mea mataina lea ua amata ona tupu. E le’i leva ae matou auai faatasi foi ma nisi i se faamasaniga i ni ipu susu mama!

Ia lototoa ia ese mai ai. Ia ola i tulaga faatonuina lea ua aoaoina ai i tatou i le talalelei.

“O le lelei o le soifua maloloina faaletino ma le faaleagaga e mafai ona fesoasoani tatou te tumau ai i le ala sao ma le vaapiapi,” o le saunoaga lea a Elder Joseph B. Wirthlin (1917–2008) o le Korama a Aposetolo e Toasefululua. “Na tuuina mai e le Alii lana tulafono o le soifua maloloina i le Upu o le Poto, ‘o se mataupu faavae ma le folafolaga’ lea o loo faamaonia pea e tulaga faasaenisi faafomai i nei ona po. (MFF 89:3.) O tulafono uma a le Atua, e aofia ai le Upu o le Poto, e faaleagaga. (Tagai i le MFF 29:34–35.) E manaomia lo tatou fafagaina o i tatou lava faaleagaga, e tusa lava pe sili atu nai lo le faaletino.”²

E ao ona tatou faafetai mo aoaoga o le talalelei e faatatau i le taua o le tausia o o tatou tino faaletino ina ia mama ma agavaa e nonofo ai o tatou agaga faavavau.

O loo tatou nonofo i se lalolagi mataina. O le naunau mo meataalo faalelalolagi ua foliga lofituina. O atunuu tau atiae ua amata ona faalelalolagi i o latou talitonuga ma faatinoga ma ua latou mafaufau ai o se tagata soifua e i ai atoa le saolotoga. Latou te talitonu tatou te le manaomia le tuuina atu o se faamatalaga i soo se tasi po o soo se mea sei vagana ai mo i tatou lava ma, i se tulaga tuuitiitia, i se nuu o loo tatou ola ai.

O loo lapataia i tatou e tusitusiga paia, “Latou te le saili i le Alii ia faatuina lana amiotonu, a ua taitoatasi le tagata ma savali i lona lava ala, ma e tusa ma le faatusa o lona lava Atua, o lona faatusa lea e i foliga o le lalolagi, ma o lona gaosiga e pei o se tupua, o lea ua tauau ina leva ma o le a faaumatia i Papelonia, o Papelonia lava lea le sili, o lea lava o le a pau” (MFF 1:16).

O atunuu o loo mauaa ai nei ituaiga olaga faalelalolagi o loo i ai se tulaga faaleagaga loloto ma se tau lelei e totogi. O le sailiga o nei ituaiga saolotoga faaletagata e aunoa ma se mafaufau i tulafono na faatulaga e le Alii e pulea ai Lana fanau i luga o le fogaeleele, o le a taunuu atu ai i le malaia faalelalolagi ma le manatu faapito, o le a faaitiitia le ola mama i tulaga lautele ma le faalilolilo, ma o le a le usitaia le mea sa’o. I le ogatotonu o le olaga faalelalolagi, ma ona faaletonu faapitoa, e ao lava ona i ai ni nofoaga e ofo mai ai se tulaga saogalemu faaleagaga, toe faafouina, faamoemoe, ma le filemu.

E ese mai lea ituaiga olaga, na aoao i tatou e Peresitene Spencer W. Kimball (1895–1985) i le taua o le sailia o le malamalama mai le Atua:

“I se faasologa sao, e muamua le malamalama o le Atua ma ana polokalama, o le ala lea i le ola e faavavau, ae lona lua le malamalama i mea faalelalolagi, o ia mea foi e sili ona taua. …

“O Peteru ma Ioane e faalei tele so la atamai faalelalolagi, e ta’ua i laua e valea. Ae peitai o Peteru ma Ioane sa la silafia mea aoga o le olaga, o le iloa lea o loo soifua le Atua ma o le Alii toetu o le Alo o le Atua. Sa la iloa le ala i le ola e faavavau. O mea ia na la aoaoina i sina vaitaimi o o la olaga faaletino. O o laua olaga amiotonu na tatala ai faitotoa i le faaleatua mo i laua ma le foafoaina o lalolagi ma le alualu i luma e faavavau. Mulimuli ane, atonu latou te manaomia i lenei mea se malamalama atoa i le mafuaaga o mea. O Peteru ma Ioane na o ni nai tausaga sa laua aoaoina ai ma faia ai mea faaleagaga, ae ua sefuluiva seneturi o laua aoao i le faalelalolagi po o le mafuaaga o le lalolagi, aoaoga i meaola, fausaga o meaola ma mafaufau o meaola o le lalolagi. O le olaga i le tino o le taimi lea e aoao muamua ai i le Atua ma le talalelei ma faia ai sauniga. A mausali loa o tatou olaga i le ala e tau atu i le ola e faavavau, ona tatou faaputuina loa lea o se poto atili i mea o le lalolagi. …

“O le poto faalelalolagi, e ui lava ina taua, e le mafai lava ona faaolaina ai se agaga pe tatalaina ai le malo selesitila, pe fausia ai se lalolagi pe avea ai se tagata ma se atua, peitai e mafai ona avea ma fesoasoani sili mo lena tagata, o lē, na te faamuamua le mea e tatau ona faamuamua, ua na ia maua le ala i le ola e faavavau ma o ia lea na te mafai ona faaaoga le poto uma e avea ai ma ona tufugaaao ma auauna.”³

Saili i mea a le Atua, lea e faatalitali mai ai mo oe taui e faavavau.

Na aoaoina i tatou e le Faaola i le lesona lenei, e pei ona tusia i le Luka 14:

“O ai foi so outou ua fia fai se olo, e le muai nofo i lalo e faitau tupe e totogi a’i, po ua lava ana mea e faauma ai?

“Ina ne’i tauemu mai ia te ia o tagata uma e maimoa ina ua tuu le faavae, a e le mafai ona faauma ai,

“E faapea mai, O le tagata lenei, na amata ona fai, a e lei mafai ona faauma” (Luka 14:28–30).

Ao e tapena mo le lumanai, e ao ona e mautinoa o mea e te tuuina i lenei aafiaga faaletino o le a mafai ai ona e taunuu ma le malosi ma maua sou taui e faavavau.

O loo matua faatupulaia pea le televave ma le faigata o lo tatou lalolagi i lenei vaitaimi. O loo i ai pea lava avanoa mo tagata taitoatasi e le faamaoni ai. O le toatele o tagata e fiafia e auai i gaoioiga lea e maua ai ni mea mauafua ma e tele lava ina faaaoga ai isi o e o taumafai e taaalo e tusa ai ma tulafono na faatulagaina i faiga lelei. Ua faateleina e lenei lalolagi televave ia faaosoosoga mo tagata e taaalo ai i le taaloga e faaaoga ai a latou lava tulafono.

Ae peitai, e ao lava pea ona tatou tali atu i le tulafono o le seleselega. “O le mea lua te lulu, o le mea lava lea lua te seleseleina; o le mea lea, afai lua te lulu le lelei o le a oulua selesele foi le lelei mo lo oulua taui” (MFF 6:33). O le a le faaleaogaina lava lenei tulafono.

“O uiga o se tagata o lona tagata moni lea.—O lona tulaga o manatu ia o isi e faatatau ia te ia.—O ona uiga o loo i totonu ia te ia;—o le tulaga e mai isi tagata—o le [uiga] o se mea patino lea, o le [tulaga] o le ataata lea.”⁴

O uiga lelei o se mea lea e tatau ona e faia mo oe lava ia. E le tuufaasolo mai matua. E le mafai ona foafoaina e ala i le mauaina o ni faamanuiaga maoae. E le o se meaalofa o lou fanau mai, oa, taleni, po o tulaga. O se taunuuga o au lava taumafaiga. O se taui lea e oo mai i le ola ai i mataupu faavae lelei ma le faaalia o se olaga mama ma le faamamaluina.

E oo faatasi mai ai foi lena talitonuga lelei faamamaluina ma le tulaga o se tasi e faamaoni ma o loo i ai le amiosao. O uiga ia o le a mautinoa ai se galuega umi ma le faamanuiaina. O le aseta sili lava e mafai ona e teuina i lau teugaoa, o le tulaga tauleleia o le avea ma se tagata e talitonuina.

Na fai mai Nifae, i ana tusitusiga ma ona lagona e uiga i tusitusiga paia: “A o papatusi nei ou te tusitusi ai mea a lo’u agaga, atoa ma upu paia e tele ua togitogia i papatusi apamemea. Aua e fiafia lo’u agaga i tusi paia, ua mafaufau foi i ai lo’u loto ma ua ou tusi ai mo le aoaoina ma le aoga i a’u fanau.” (2 Nifae 4:15).

Tatou te maua se oa o le ta’utino ma le malamalama mai a tatou tusitusiga paia: o le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele. E mafai ona tatou maua ni filo musuia o loo felavesa’i solo i nei tusi taitasi. O le a faigofie ona tatou matauina i a tatou suesuega.

O loo aoao mai tusitusiga paia o Iesu Keriso o le Alo o le Atua. O loo soifua o Ia ma o lo tatou Togiola ma le Faaola. E ao ona tatou mulimuli ia te Ia ma faailoa atu lo tatou alolofa ia te Ia e ala i le manatuaina o Ia ma tausia ma le lotomaualalo Ana poloaiga.

O Lana Togiola ua mafai ai ona tatou salamo ma faamamaina. O i tatou o Lona nuu o le feagaiga ma e tatau lava pea ona tausia ia feagaiga ua tatou osia.

E tatau ona i ai lo tatou faatuatua, salamo, ia papatisoina, maua le Agaga Paia, ma tumau sei oo i le iuga.

O le aofia ma le faamaoni o le tagata lava ia i tusitusiga paia e maua mai ai le faatuatua, faamoemoe, ma tali i o tatou luitau i aso taitasi. O le faitau soo, mafaufau loloto i ai, ma le faaaogaina o lesona o tusitusiga paia, a tuufaatasi ma le tatalo, o le a avea ma se vaega e le mafai ona toe suia i le mauaina ma le faatumauina o se molimau malosi ma le ola.

Sa faamanatu mai e Peresitene Kimball le taua o le faitau soo i tusitusiga paia ina ua ia saunoa: “Ua ou iloaina a ou faaleano i a’u fegalegaleaiga ma le faaleagaga, ma a foliga mai … ua leai se leo faalelagi e tautala mai, ua ou mamao, mamao ese lava. A ou faatofuina a’u lava i tusitusiga paia, o le a faaitiitia le mamao ma faapea ona toe foi mai le faaleagaga.”⁵

Fai se faatinoga o le suesueina o tusitusiga paia i aso uma.

Ua saoasaoa tele le maliliu o la’u tupulaga. Ua matou naunau e pasi atu o matou tiutetauave o le ekalesia i se augatupulaga fou ma ua sili atu ona saunia lelei o le Au Paia o Aso e Gata Ai. Matou te faamoemoe o le a latou:

1. Tausia ia mama ma paia o latou tino faaletino matagofie o ni malumalu o le Atua.

2. Tuu le faasili ma le faamuamua i aoaoga faaleagaga ma le malamalama mai le Atua.

3. Ia avea ma se tupulaga faamoemoeina ma faaaoga le faavae o upumoni faavavau o le talalelei e faatulaga ai ia tulaga faatonuina ma tulaga faatauaina.

4. Saili ia aoao mai i upumoni e faavavau o loo maua i tusitusiga paia.

Ia faamanuia le Atua ina ia outou maua le naunautaiga ma le manao e avea ma faataitaiga i le lalolagi ma ola ai i olaga paleni, ma le amiotonu lea o loo Ia faamoemoe mai ai i Lana fanau ina ia latou ola ai i le taimi o lo latou olaga faataitai i le tino.