Suega: Faletua o Perofeta

Mai ia Ema Samita e oo ia Frances Monson, o loo tutu faletua o Peresitene o le Ekalesia i autafa o a latou tane e avea ma fesoasoani faamaoni. O i latou nei ma isi tamaitai faatuatua na saunoa mai ai, Elder Bruce R. McConkie (1915–85) o le Korama a Aposetolo e Toasefulua, “E le auina atu e le Alii ni aposetolo ma ni perofeta ma ni alii amiotonu e talai i ona tagata e aunoa ma le tuuina o tamaitai e tutusa o latou tulaga faaleagaga i o latou autafa.”¹ O le a fesoasoani lenei suega e te aoao ai i nisi o faamatalaga auiliili e uiga i nei faletua lototetele o perofeta e toavalu o aso e gata ai.

1. O lenei tamaitai na papatiso i le 1834 ma mulimuli ane malaga mo le 1,000 maila (1,600 km) na o ia lava e faatasi atu i le Au Paia o Aso e Gata Ai i Katelani, Ohaio, ISA. Sa ia folafola atu i lona tina o le a ia toe foi mai pe ia iloa e sese le Ekalesia, peitai na nofo ai pea o ia ma le Au Paia o Aso e Gata Ai mo lona soifuaga atoa.

2. Na taumafai le tane i le lumanai a lenei tamaitai talavou e faaofo o ia ao la talavou e ala i le tapenaina o le fanua o ona matua e fai ai se pati e talitutusa le tulaga ma isi alii talavou mau mea a lo latou pitonuu.

3. E fiafia lenei tamaitai e faitautusi, mai lava i lona teineitiiti, e tele ina faitau ao manatu o moe o ia, teu ia moega, pe aoao foi e ta le okeni.

4. Ao valu ona tausaga, sa alu lenei teineitiiti i le togavao ma tatalo ai. Sa ia tatalo mo lona tamā, o lē sa le’i i ai sona faatuatua mausali ia Keriso. Ina ua alu atu lona tamā i le togavao e tulimanu, sa ia lagona atu lana tatalo. Na faamaluluina lona loto, ma avea o ia ma se tagata sili ona faatuatua.

5. O le tafaoga faamasani muamua lava a lenei tamaitai ma lona toalua i le lumanai, na feasogi uma ai lona tamā ma lona tina i le alafau o lana paga. Ao vaavaai solo le alii talavou e sue lana paga eva, sa na o le faapea mai o ia, “Se’i ou alu e aumai lo’u ofu mafanafana.”²

6. Sa aoga lenei tamaitai i le Iunivesite o Iuta ma le Kolisi o Musika a Cincinnati, lea sa ia aoaoina ai tomai faatausiaiga. Sa ia aoao e fiafia i tusiga, tala faatino, ma tusiata ma avea ma se tagata musika lelei.

7. Ao avea ma se teine aoga i le kolisi, sa faatinoina e lenei tamaitai le vaega autu o Viola i le tala a Siekisipia Twelfth Night ma na taitai i le komiti o le siva faapitoa mo le vasega sefulutasi, peresitene o le Kalapu Afeleti a Tamaitai, ma na avea ma sui peresitene o le aoga atoa.

8. Na tuuina atu e lenei tamaitai ni faitauga musuia i le Peraimeri, ae faaiu i se lafoga malie ma taga. Fai mai lona toalua mulimuli ane e uiga i se tasi o ana faitauga, “Ou te le iloa po o le a le mea na oo ia te au, ae ou te le’i faagaloina lava. Ona tuputupu a’e ai lea o ia ma avea ma se tamaitai talavou lalelei, ma sa i ai lo’u lagona lelei ou te faaipoipo ia te ia.”³

O tali o loo i le itulau e sosoo ai.