Ia Punitia lo Matou Fale

O le faaiuga o le Taua Lona II a le Lalolagi, ao 19 ou tausaga, na o mai ai autau a le fili e ave faamalosi lo’u nuu i Europa. Sa matou saofafai i le matou laulau i se tasi afiafi ae matou faalogoina se pao leotele. Sa matou autilo atu i fafo i le va o o matou ie faamalama pogisa, lea na tautau ina ia le mafai ona iloa e tagata faapa pomu lo matou fale i le po, ma vaaia ai autau a le fili—faatasi ai ma a latou pasika, loli, ma tane tau—o agai mai i lo matou nuu mai itu eseese e lua. Sa ou matuai fefe lava.

O lo’u tamā, o se tagata e faatuatua tele, ma na fai mai o ia, “Aua le fefefe.” O le tulaga o le mea na tupu i fafo o lo matou fale, o se faamatalaga maoae lena mea. Sa matou iloa uma lava e ono osofaia lo matou nuu e fitafita ma faaleagaina fale o tagata. Na fautua mai Tama matou te tootutuli i talaane o le nofoa ma tatalo mo le puipuiga a le Tama Faalelagi. Sa ia tatalo, “Le Tama o i le Lagi, faamolemole ia faatauaso na fitafita. Ia punitia lo matou fale ina ia le mafai ona latou iloa mai.”

Ina ua maea lana tatalo, sa tatalo lo’u tina. Ona ou tatalo lea. Ona matou toe foi lea i le laulau ma tilotilo atu ma le faaeteete i fafo o le faamalama. Sa matou matamata o osofaia e fitafita fale uma i lo matou auala. O lo matou fale e mulimuli lava i le auala. Sa latou agai mai i lo matou fale ona pasia lea o le matou pa i luma ma agai atu i le auala na sosoo ai. Sa matou tilotilo atu a o latou ulu atu i fale uma na mafai ona matou iloa atu mai lo matou faamalama.

Ina ua maea le osofaiga lea pe a ma le lua itula, na ili leotele e se tasi se faaili, ma na toe foi atu fitafita i a latou taavale. Ao latou o ese lemu atu, na matou matuai lagonaina le agaga faafetai ma toe tootutuli, ma faafetai atu i le Tama Faalelagi mo Lona agalelei ma le puipuiga.

O le aso na sosoo ai na ou iloa ai mai se uo atuatuvale, na faatino e fitafita ni tulaga matautia i fale uma na ia iloaina. Ina ua ou ta’u atu ia te ia e le’i o mai fitafita i lo matou fale, sa ofo o ia. Fai mai o ia sa ia tilotilo atu ia i latou o o mai i lo matou itu ma e leai ma se fale na te iloa i lo matou auala latou te le’i ulu i ai. Na o lo matou fale lava e le’i ulu i ai fitafita.

Ou te iloa e faafofoga le Tama Faalelagi ia tatou aioiga ma tali mai. O nisi taimi e foliga mai atonu o le a le maua lava se tali, ma tatou moomoo ai ina ia tali vave mai o Ia. Ae ou te iloa i le 65 tausaga ua mavae i lo matou fale. Na vave ona tali mai o Ia.