Sa Ou Misia le Lagonaina o le Agaga

Ina ua 16 o’u tausaga, sa ou auai i se polokalama mo se tausaga e faafesuiai tamaiti aoga mai isi atunuu. Sa ou alu ese mai lo’u aiga i Iukureini e agai atu i se tamai nuu i Arisona, ISA, lea sa ou nofo ai i se aiga o le Au Paia o Aso e Gata Ai. Ou te le’i faalogo muamua lava i ni Au Paia o Aso e Gata Ai.

Sa le faatagaina e le polokalama faafesuiai ona tala’i mai le aiga ia te a’u, ma sa le faatagaina a’u ona feiloai atu i faifeautalai. Peitai na ou filifili e auai i le lotu ma lo’u aiga o loo taliina a’u ma auai i gaoioiga uma a le Ekalesia.

Sa ou lagona le Agaga i lena aiga, ma sa ou lagona le alofagia tele o a’u i le lotu. I lena taimi ou te le’i iloaina o le mea na ou lagonaina o le Agaga, ae na ootia lo’u loto.

Ina ua ou toe foi i Iukureini, sa ou matua misia lava lena lagona. Na ou manatuaina le mea na i ai lo’u olaga i le taimi na ou alu ai i le lotu ma ola i aoaoga o le talalelei. Na ou iloaina le mea sa ou misia, peitai sa leai se lotu ma sa leai foi ni faifeautalai i le mea sa ou nofo ai, o lea sa ou mafaufau ai o le a ou le toe mauaina lava lena lagona.

Peitai, pe a ma le fa tausaga mulimuli ane, na tuitui mai ai ni faifeautalai i lo’u faitotoa. Sa ou matua fiafia lava e vaai ia i laua. Ao i ai i laua i le talaiga, sa la faalogo i le Agaga, lea na taitaiina mai ai i laua i lo’u fale. Ou te matua faafetai ona sa la usiusitai. Sa papatisoina a’u ma faamauina ai loa lava.

Talu mai lena taimi ua faamauina a’u i le Malumalu o Stockholm Suetena i lo’u toalua, o se alii ua maea lana misiona e sau mai Rusia. Ma o lea ua i ai nei se malumalu i Kyiv. Ua ma fuafua e auai soo atu i ai.

O le malumalu o le nofoaga aupito sili ona matagofie i le lalolagi. O se nofoaga e mafai ona e latalata atu ai i le Tama Faalelagi. Ou te lagona le matuai faafetai ua mafai ona tatou mauaina se tasi o meaalofa silisili ua tuuina mai ia i tatou i totonu o le malumalu e ala mai i le Tama Faalelagi: o le faamauina o ni aiga mo le faavavau.

Ou te faafetai i tagata o lena aiga o le Au Paia o Aso e Gata Ai o e na fesoasoani ia te a’u ia ou lagona le Agaga, ma amatalia ai la’u malaga o le a taitaiina atu ai i so’u lava aiga e faamauina faatasi e faavavau.Victoria Mikulina, Rusia