Pese i Sigapoa

“O lo matou faamoemoega autu o le tuufaatasia lea o le autalavou,” o le tala lea a Kate Loreto, o le peresitene o Tamaitai Talavou a le siteki. “E i ai a matou autalavou i uarota eseese e valu ma e eseese uma lava le tele o a latou aganuu. E faigata ona fegalegalea’i le tasi ma le isi. O lea na matou manatu ai, aisea matou te le faia ai se faafiafiaga faamusika e aumai faatasi ai i latou?”

Na filifili e taitai ni musika na musuia mai i le lisi o Ia [B’s] a Peresitene Gordon B. Hinckley (1910–2008).¹ Na filifilia lenei musika “ina ia lagonaina patino e le autalavou ia upu o le pese, lagona le Agaga, ma ola ai i tulaga faatonuina,” na fai mai ai Connie Woo, o le taitai o le faafiafiaga. “Sa matou mananao ia faaaofia ai le toatele o le autalavou e mafai ona i ai,” o le tala lea a Sister Woo. I le tuufaatasiga, e 78 le autalavou na faafiafia.

Atonu e le’i tutusa uma mafuaaga na o mai ma le autalavou i le amataga, ae na toeitiiti lava o i latou uma na o mai pea i faataitaiga ona sa latou fiafia i le faauoga, pesepesega, ma le mea pito sili lava, o le Agaga.

Ina ua uma ona filifili le autu ma ua faatulaga ia faataitaiga, sa tofi le autalavou i vaega eseese o le faafiafiaga ma i komiti eseese e fetaui ma a latou taleni.

O Ally Chan, e 18 tausaga, mai le Uarota a Sigapoa Lua na ofo mai e fesoasoani i le komiti o toniga. “Sa manaomia matou te filifilia se ofu e talafeagai, lea na sili ona taua, ma e tatau ona taugofie, foliga talavou, ma i le taimi lava e tasi ia manaia,” o lana tala lea. E le gata ina aoao o ia e faia ni faaiuga e faatatau i tulaga faatonuina o le talalelei ma galulue faatasi ma i latou, ae sa fiafia foi o ia i foliga o le autalavou.

O Canden Petersen, e 15 tausaga, mai le Uarota a Sigapoa Muamua na tofi e avea ma peresitene o le aufaipese ina ia fesoasoani i le faamautinoaina o loo sologa lelei ia faataitaiga uma. O ona tiutetauave na aofia ai le tofi o tagata e tatalo, faapotopoto ma uunaia mai le autalavou mo faataitaiga ma taaloga, ma le tofitofiga o nofoaga i luga o le tulaga. “Sa ou talosaga foi ina ia maua ni nai tama e fesoasoani i le faatulagaga ma le toe ave i lalo o mea e faaaoga i le faafiafiaga ma le vaaiga o le autalavou i le faataunuuina o o latou tiute,” o lana tala lea. “Sa ou lagona e lelei lenei tiutetauave mo le autalavou. Talosia na fesoasoani lea ia i latou ia malamalama e valaauina e le Alii ia taitai i le taimi nei, ma e le na o tagata matutua e valaau mai ai. E mafai ma e tatau ona latou lagolagoina o latou taitai e tusa lava po o le a le matua po o le tulaga o le atamai.”

O Kandace Lim, e 18 tausaga, mai le Uarota a Woodlands na fesoasoani i le tauaveina o le tele o tofiga, e aofia ai le avea ma se tasi o le komiti o toniga, le komiti o a’oina ia siva, le komiti pu’eata, ma e faapea foi i le usuina o se pese toatasi. Na fai mai o ia e uiga i le tele o ona tiutetauave, “O lo’u tina na uunaia a’u ou te alu e fai nei mau tofiga. Na ia aoaoina a’u, afai e i ai se avanoa e galue ai, fai loa. Afai e te taliaina le galuega ma tuu i ai lau taumafaiga sili, o le a mautinoa lava le fesoasoani o le Alii ia te oe e faataunuu soo se faigata e ono feagai ma oe.”

E ese mai nei tiutetauave, na manaomia foi ni tagata faafiafia, O John Lee, e 17 tausaga, mai le Uarota a Clementi o se tasi lea o agaga lototoa na volenitia i se vaega o le pese toatasi. Na faigofie lava lana mafuaaga: “Ou te fiafia lava e pese! Ma ou te lagona ai le tulaga ese.”

O Ezra Tadina, e 17 tausaga, o le Uarota a Woodlands, na te le’i manatu e mafai ona pese, ma o lea na ia maua ai se isi auala e saofaga atu ai. “Sa ou filifili ia ou aofia ai,” o lana tala lea, ma o a’u o le tagata lea o loo faamatalaina le vaega e uiga i le faaaofiaina. Ou te lagonaina le savali aua ou te iloa e moni.”

Na faaauau ia faataitaiga mai ia Novema 2009 seia oo ia Mati 2010. I lena taimi, na potopoto ai le autalavou i le nofoaga autu mo faataitaiga i po o Aso Faraile uma, sei vagana ai ia aso malolo. O le aofaiga o le taimi ma tautinoga na manaomia mai le autalavou sa le o ni osigataulaga laiti, pe a mafaufau i se faatulagaga faigata o se talavou Sigapoa e masani ai.

O le alii o Olivia Hoe mai le Uarota a Bedok e tausaga muamua i le kolisi maualalo na filifili e auai aua “po o le a lava le auala e tau’ai mai ai e le lalolagi ia faafitauli ia te au, i le faaiuga lava o le aso, o le talalelei e na te faamalosia ma tosoina a’u i luga mai luitau. O le iloaina o loo i ai se Tasi o loo vaaia a’u ma e alofa atoatoa ia te a’u e aumai ai ia te a’u le tele o le mafanafana, ma e ou te mafaufau ua sili atu lena mo a’u e faamalosia a’u i aso uma.”

O le toatele o le autalavou na i ai nisi o a latou fuafuaga, ae na latou iloa na faataatia e le Alii se ala mo i latou. E pei o le tulaga o Amanda Ho e 16 tausaga mai le Uarota a Sigapoa Lua. “Sa i ai sa’u faataitaiga siva, lea na pauu faatasi ma nisi o faataitaiga mo le faafiafiaga lenei, ae na suia faavavega e le aoga ia le faatulagaga o le taimi, lea na mafai ai ona ou auai i faataitaiga o le faafiafiaga,” o lana faamalamalama mai lea.

Ina ua mavae le tele o masina o faataitaiga, na iu lava ina oo i le taimi o le faafiafiaga. Faafetai ai i le naunautaiga lagolagosua a le autalavou, e silia ma le 700 tagata na auai e matamata ia i latou i faafiafiaga e tolu. Ao faasoa mai e le autalavou a latou savali e ala i pese, siva, musika faifaili, ma a latou lava molimau, na ootia le toatele o tagata maimoa.

Na luiina foi le vaega ina ia valaaulia ni uo le lolotu e matamata i a latou faafiafiaga ma avea ai ma se avanoa faafaifeautalai. O Michael Lee, e 18 tausaga, na mamafa lava ia te ia lenei lu’i. “Sa ou valaauliaina ni uo se toaono e o mai, ma e toatolu a’u uo a’oga ma se faiaoga na o mai,” o lana tala lea. Na matuai faagaeetia lava lona faiaoga ia latou faafiafiaga. “Fai mai o ia o se aafiaga maoae. Sa oo lava ina ia talosagaina se kopi o le tamaitusi Mo Le Malosi o le Autalavou. Fai mai o ia sa na lagonaina le malosi e ala i le tele o loto tautino o le autalavou.”

Na faataunuuina lava ia le faamoemoega autu a taitai i le tuu faatasia o le autalavou. “Ao ou nofo ai iina ma tilotilo atu ia i latou taitoatasi i le taimi o le faafiafiaga, sa faatumulia lo’u loto i le olioli,” o le tala lea a Sister Woo. E le faapea ona o le manaia o o latou foliga, pe o le lelei na latou usuina ma taina ai pese, po o le lelei na latou tuuina mai ai ia faamatalaga. E le’i faatatau foi i le a’oga po o le atunuu na latou o mai ai. Sa tasi i latou.”

Na fesoasoani le faafiafiaga faamusika e maua ai e le toatele se molimau malosi. Fai mai nisi na latou hamuina ia fati ma usu ia upu o pese i soo se nofoaga latou te i ai, ma o le savali i pese na fesoasoani ia i latou e foia ai luitau o aso uma. O le toatele o i latou e foia na o le avea ma ni uo mamae ae na mafai ona tuu atu ni lagolagosua faaleagaga e siitia ai le tasi ma le isi i taimi faigata. E mafai ona latou fesoasoaniai o le tasi i le isi ina ia tumau i le ala vaapiapi ma tuputupu ae faaleagaga.