Ua Faamanuia e Iesu ia Tamaiti

Na saofafai ma le popole ia Iairo ma lona toalua i autafa o le moega o le la tama teine. Na faateleina le ma’i o le la tama teine ao te’a atu itula taitasi, ma sa la popole o le a oti o ia. Sa la iloa e na o le tasi lava le mea e mafai ona la faia e fesoasoani ai ia te ia.

Sa tamoe faavave atu Iairo i magaala o Kapanaumi e taumafai e saili ia Iesu o Nasareta. Na iloa e Iairo o Iesu na faamaloloina ia tagata. Atonu o le a sau Iesu e faamalolo i lona afafine.

Sa potopoto le motu o tagata i le mea na alu ese atu ai Iesu mai le vaa, e latalata i le vai. Na faaofiofi atu Iairo i le tumutumu o tagata seia oo ina latalata atu i le Alii. Na faapau Iairo i ona tulivae ma ta’u atu ia Iesu ua ma’i lona afafine ma ua lata ina oti.

“Ou te aioi atu, maliu mai ma faaee ou aao i luga ia te ia e malolo ai; ona ola ai lea o ia,” na aioi atu ai Iairo.

Na ioe Iesu, ma na mulimuli atu ia i laua le motu o tagata e toatele.

Sa tamoe faavave mai se avefeau e faafeiloai i latou ma ta’u atu ia Iairo ua oti lona afafine. Ua tuai ona oo mai Iesu e fesoasoani atu. Na fetalai atu Iesu ia Iairo, “Aua e te fefe, ae ia talitonu.”

Ina ua latou taunuu i le fale o Iairo, sa faalogoina le tagiaue ma le vāvāo. Sa toatele tagata na i ai i le fale, o fetagisi ma le faanoanoa.

Na savali atu Iesu i totonu o le fale ma fai atu ia i latou e aua le fetagisi, aua e le o oti le teine ae o loo moe. Sa talie nisi o tagata ia Iesu. Sa latou iloa ua oti le teine.

Ona auina ese atu lea e Iesu o tagata pisapisao. Na ia aveina ia Iairo ma le toalua o Iairo, faatasi ai ma Ana Aposetolo o Peteru, Iakopo, ma Ioane, i totonu o le potu o loo taoto ai le teineitiiti i le moega.

Na tago atu Iesu i le lima o le teine ma fetalai atu, “Funa e, ou te fai atu ia te oe, ia e tulai.”

Na tulai le teine. Na ofo ma fiafia ona matua. Ua ola le la tama.

E i ai nisi taimi na faamalolo ai ma faamanuia ai e Iesu ia tamaiti. O se tasi aso i Perea, na potopoto ai le motu o tagata i autafa o le Faaola, ma faalogologo ao Ia aoao atu. Na aumai e nisi tagata a latou fanau e vaai ia Iesu ma ia faamaloloina e Ia.

Na vaai ia soo o Iesu i tamaiti ma taumafai e tutuli i latou. Na pisi Iesu i le motu o tagata, ma e na foliga mai e le’i taua ia tamaiti. Ae na fetalai atu Iesu i le au soo, “Ina tuu mai ia o tama iti e o mai ia te au; aua le vavao ia te i latou; aua e faapei o i latou nei o e o i le malo o le Atua.”

Ona siitia lea e Iesu o tamaiti taitasi i Ona aao. Na ia faaee Ona aao i luga ia te i latou ma faamanuia ia te i latou. Ona fetalai atu lea o Iesu i tagata matutua e manaomia ona latou lotomaualalo faapei o tamaiti laiti.