Ataata

Sa ou tautauina la’u ato aoga i le kapoti ma iloa atu lo’u ata i le faaata tele e i le faitotoa. Sa ou tu ma vaai atu i le ve’uve’ua o la’u poni, lo’u ofutino maanuminumi, ma o’u totini tetele. Na toe oo mai ia te a’u upu a lo’u faiaoga o le Peraimeri: “O oe o se afafine faapitoa o lo tatou Tama Faalelagi. E tele ni Ana faamanuiaga o loo teuina mo oe i lou lumanai.”

Sa ou faalagolago atu i luma ma matuai tilotilo i le faaata, ma moomoo maimau pe ana ou vaai atu i le lumanai. O le a se mea ou te oo i ai pe a ou 12 pe 22? Pe ou te aulelei? Pe ou te poto? Pe ou te faaipoipo i le malumalu? Pe maua sa’u fanau aulelei? O a’u miti ia, ae peitai pe o ni faamanuiaga ea ia na teuina e le Atua mo a’u?

“O le a se mea o e tilotilo i ai?” O le leo malu lea a Tina.

Sa ou iloa atu Tina i le ataata o le faata o tu i le faitotoa i o’u tua.

“O a’u,” o la’u tala lea. “Na o a’u lava i le faaata.”

Na sau Tina ma tilotilo mai i luga ae o lo’u tauau. “‘Na o oe’ o se tagata e matuai taua lava,” o lana tala lea.

“O le mea lena na fai mai ai lo’u faiaoga Peraimeri. Fai mai o ia e tele faamanuiaga o loo teuina e le Tama Faalelagi mo a’u. O le a se mea o loo teuina mo lo’u olaga?”

“Sau i lo’u potu. Ou te fia faaali atu se mea ia te oe,” o le tala lea a Tina.

I totonu o lona potu na tatala ai e Tina se tamai atigipusa ma sii mai ai i fafo se faaata siliva e uu i le lima.

“E ese le manaia,” na ou fai atu ai, ma lotelote le mataitusi B na lolomiina i tua.

“O le faaata lea a lo’u tinamatua,” o le tala lea a Tina. “Pe a ou faaiilaina lenei faata, ou te taumafai lava e mafaufau po o le a se mea na vaai i ai Tinamatua Beatrice ao tilotilo atu i ai. Atonu i le taimi muamua sa ia vaai i se tamaitai talavou, e pei o oe, o moemiti i lona lumanai.

“E mafai ona ou mafaufau i le malamalama o le fiafia na ia vaai i ai i ona mata ao ia tilotilo atu i ana fili uumi i le faata ao le’i papatiso o ia. E te iloa sa le’i mafai ona papatiso o ia pe ana le atoa le 18 o ona tausaga?”

Na lulu atu lou ulu. “Leai.”

“Ina ua mavae le la faaipoipoga ma Tamamatua, sa i ai sana pepe teine sa na o le lua aso na ola ai. Ou te mafaufau i mata na ia vaai i ai i lenei faaata i lena taimi na fulafula i le tagi.

“O le tele o tausaga mulimuli ane, atonu na ia vaai ai i sona ata fiafia ao ia sauni e o i le malumalu e faamau i lona toalua ma lana fanau e toatolu.

“I le avea ai ma se tamaitai matua, atonu na ia faaaogaina lenei faaata e tuu ai se pulou i lona ulu ao le’i alu i ni ana fonotaga a le Aualofa.

“Ma le mea mulimuli, i le avea ai ma se tina lauulu sina ua maliu lana tane, atonu na ia vaai ai i se naunautaiga lototoa i ona mata ao nofo ai na o ia mo le tele o tausaga ae na faatuatua lava seia oo i le iuga.”

“Pe na faamanuia e le Tama Faalelagi ia le Tina o Tinamatua?” o lau fesili lea.

“Ioe, na Ia faamanuiaina,” o le tala lea a Tina.

“Pe na fiafia le Tina o Tinamatua i lona olaga?”

“Ioe. E le o le tulaga tonu lea na ia fuafuaina. O nisi o mea sa matuai faigata lava, ae na ia tuuina atu lona faatuatua i le Atua, ma na fesoasoani na aafiaga ia te ia ina ia avea atili ai e faapei o Ia.”

“Atonu e le moomia tele ona ou vaai i le lumanai,” o lau tala lea, ma tuu ma le faaeteete le faaata siliva i totonu o le pusa. “O le a na o lo’u faatuatua i le Tama Faalelagi ma mulimuli ia te Ia.”

“Ou te mautinoa o loo i ai se olaga matagofie o loo teuina e le Atua mo oe,” o le tala lea a Tina. “Ma afai e te mulimuli ia te Ia, seia oo i le iuga, o foliga e te vaai ai i le faaata o le a atagia ai Ona foliga. Ma o se miti e taunuu lava lena mea.”