Tauave i O’u luga Lona Suafa

I ni nai vaiaso talu ona ou i ai i la’u misiona, sa amata ona ou lagona le tuuatoatasi ma le misia laitiiti o le aiga. Sa ou fiafia e avea o se faifeautalai, ae sa sili atu le faigata o le galuega nai lo le mea na ou mafaufauina. Sa ou misia a’u uo, lo’u aiga, ma mea uma lava ou te masani ai ua ou tuua. I se tasi o a’u suesuega faaletagata lava ia i se tasi taeao, sa ou saofai filemu ai, ma feliuliuai i lo’u lima le pine o lo’u igoa, ma mafaufau i lo’u faamemelo mo se mea sa ou masani ai. Sa ou moomoo maimau pe ana sei mafai lava ona ou faalogo o valaau mai e se tasi lo’u igoa muamua.

Ao ou tilotilo i le pine o lo’u igoa, sa ou iloa ai e ui e le o i ai lo’u igoa muamua, ae sa ou vaaia ai lo’u faaiu, le igoa o le Ekalesia, ma le suafa o le Faaola na lolomi ai i luga. Na faafuasei lava ona ou iloa se tasi o mea lea na suia atoa ai la’u vaaiga ma o’u uiga. Sa ou iloa ai, i le avea ai ma se faifeautalai ou te le o i ai iina mo a’u lava. Ae sa ou galue e sui i lo’u aiga ma le, mea e sili ona taua, sa ou sui i lo’u Faaola ma Lana Ekalesia. Sa ou faapipiiina le pine o lo’u igoa i luma o le taga o lo’u ofutino, i luga ae tonu lava o lo’u fatu. Ao faia lenei mea, sa ou folafola atu i lo’u Faaola o le a ou tuuina atu atoa se nofoaga tele mo Ia i totonu o lo’u loto ma lo’u mafaufau.

Ou te le’i toe misia le faalogo i lo’u igoa muamua talu mai lena taeao. Mai lena lava taimi na ou galue ai ma auauna atu i le mea sili sa ou mafaia, ma faaaogaina ma le mitamita le pine o lo’u igoa i aso uma. I taimi e amata ai ona ou lagona le faavaivai, ou te tilotilo i le pine o lo’u igoa, ma e faamanatu mai ai ia te au o’u tiutetauave ina ia mulimuli i le faataitaiga a Iesu Keriso.

Sa ou taumafai e tauave ma le atoatoa i o’u lava luga ia Lona suafa ma avea atili e faapei o Ia. Ao ou faia lenei mea, sa sili atu ona ou lagonaina le alofa mo a’u soa ma i latou sa ou auauna atu i ai, na faamalosia la’u molimau, ma sa ou maua le olioli i le galuega faafaifeautalai. Sa amata ona ou faagaloina au lava ae taulai atu e auauna i le Alii.

Ua tele tausaga talu ona ou toe fo’i mai i le fale mai la’u misiona, ae o loo ou mauaina lava le avanoa e ave ai i ou luga le suafa o le Faaola. E moni, i le avea ai ma se tagata o le Ekalesia, tatou te tautino uma atu e ave i o tatou luga le suafa o Keriso i aso Sapati taitasi pe a tatou aai ma feinu i le faamanatuga. Ao tatou faia lena mea, ua tatou folafola atu tatou te avea ma sui o lo tatou Faaola i le mea sili tatou te mafaia ma taumafai e avea atili faapei o Ia. E pei ona aoao mai le Tupu o Peniamina: “O le mea lea ua ou manao ai ina ia outou ave i luga ia te outou le suafa o Keriso. … O le na te faia nei mea, e maua o ia i le itu taumatau o le Atua, aua e iloa e ia le igoa e valaauina ai o ia; aua e valaauina o ia i le suafa o Keriso” (Mosaea 5:8–9). O le tauaveina o Lona suafa i o tatou luga, ua maua ai e i tatou taitoatasi faamoemoega ma le olioli sili i a tatou misiona faalelalolagi.