Pe Na Fesili Moni Mai o Ia ia te A’u i Lena Mea?

Sa ou nofo ma faataupupula atu ma le le talitonu ao faatali ia Brother Jarman, o se tasi o le au peresitene o le paranesi, i la’u tali.

Masalo na ia manao e fai mai faiaoga po o le fesoasoani. Ae e leai. O le mea sa ou faalogo i ai na sa’o; na ia valaauina a’u e fai ma peresitene o le Aualofa i lo matou tamai paranesi.

Sa ou nofo e aunoa ma se minoi mo sina taimi ma tomanatu i lo’u tulaga. Faatoa 27 ou tausaga ma e ou te le’i faaipoipo lava. E le’i leva ona ou siitia atu i le eria ma faatoa ou amata foi i se galuega fou o se tusitala. Sa itiiti lo’u malamalama faaletaitai. Sa ou galue i nisi o tofiga i le aluga o tausaga ae sa le o ni tofiga faapea.

Sa ou fesili ma le le leoa ia te au lava ia pe ua lava lo’u matua, pe ua lava foi lo’u malamalama, pe o ia te a’u foi le gafatia e auauna atu ai. O le a se mea e mafai ona ou ofoina atu i tamaitai o le paranesi?

Sa ou alu i le fale i lena po, tootuli ma tatalo, ma fesili atu i le Tama Faalelagi mo se taitaiga. Ina ua uma la’u tatalo, na vave lava ona uunaia a’u e tilotilo i lo’u faamanuiaga faapeteriaka. Sa ou faitau i le fuaiupu lenei: “E ao ona e i ai i lena galuega ua tofia ai oe i le taimi lenei, e tusa lava pe o e talavou.”

Ao ou faitauina na upu, sa ou iloa ai e le o faatatau lenei mea e uiga i lo’u tulaga faaleaiga, lo’u matua, po o le a le mea e mafai ona ou faia. Sa faatatau i le mea na finagalo le Alii ou te faia. Sa ou taliaina le valaauga.

Sa mafai ona ou fesoasoani atu i tagata e ala i lo’u valaauga, e ui i le eseese o mea na matou ola ae ai. Na faapitoa lava le taitaiina atu o a’u e le Atua e auauna atu i se tasi o tamaitai faapitoa e 20 ma ona tupu ona tausaga, o se tina nofofua e toalua lana fanau. E le’i umi se taimi na ou iloa ai le eseese o o maua olaga. Sa ou le mautinoa pe o le a faapefea ona avea a’u ma ana uo, ae i le aluga o taimi na ma amatalia ai se faauoga.

I se tasi o tulaga na ou feiloai ai i se tamaitai e le malosi i le lotu. Ou te toe manatua le taimi muamua na matou ulu atu ai ma faifeautalai i lona fale, ma le iloa o loo i ai sana molimau; ae sa na o sina tamai “uunaiga” lava e fesoasoani e faamumu malosi ai. Ao matou saofafai i lona potu malolo ma faalogo atu ia te ia, sa malosi le Agaga ma na uunaia i matou e tuuina atu le molimau i le Togiola a Iesu Keriso.

Na ta’i tasitasi ona sau o ia i le lotu i masina na mulimuli mai. Ae na faaauau pea ona taitaiina a’u e le Agaga ma tuuina atu la’u molimau ia te ia. O le taimi nei, ua malosi ma auauna atu o ia i le paranesi.

O nisi na o faatumutumuga o le valaauga, ae na tele ni luitau. Sa o se tauiviga le taumafai ia ou lagonaina na lava ma totoe mea sa ou faia, ia maua le paleni i le va o le lotu ma le galuega, ma ia lafoai lagona o le le atoatoa.

I le faaiuga sa ou iloa ai o le tele o mea na mafai ona ou faia na ala mai i le Agaga. Ua faamaloloina a’u mai le valaauga ma ou siitia ese mai lena nuu. Ae e tele lava ina ou toe manatunatu i le auala na uunaia ai e lena valaauga le usoga—faapea foi ma a’u. Na ou iloa e ala mai i lena tofiga, sa i ai se mea sa ia te a’u o se uso talavou ma nofofua, e ofoina atu i isi ao matou tutupu ae faatasi i le talalelei. E ui ina sa ou lagonaina lo’u le agavaa mo le valaauga, ae sa ou galue malosi e faataunuu lo’u valaauga. Ma ao ou faia lena mea, sa ou lagonaina le aao o le Atua o taitaiina ma faaagavaaina a’u mo Lana galuega.