Buokiia Ataei ni Katauraoia ibukin te Bwabetito

“Te ririki are e koro iai itiua aia ririki ataei bon te tai ni bukamaru,” e taku Lori, tinaia aman. Ngaia ma buuna a reireiniia aia ataei taekan te bwabetito man te tai are a bungiaki iai. E ngae n anne, ngkana a bane ataei ni koro itiua, aia utu a moana aia katauraoi ae onoti. A karaoa aia reirei ni katoa namwakaina n aia bootaki n utu n te tairiki iaon reirei aika kakaokoro ni kaineti ma te bwabetito, n aron berita aika tabu ao ana katooto Iesu.

E taekinna Lori reirei n te namakaina ae e nang koro iai ana kawanua n ririki ana irianaki ma te tangira. A kaotia nakoia ataei kunnikai ake ana bwai ngkana a karekea te ara ao te kakabwaia, ao e taekina taekan te bong are e karaoaki iai te otenanti.

“Bon te tai ae kororaoi ni iango iaon kakabwaia man berita aika tabu n te tembora,” Lori e kabwarabwara raoi. “Ti aki toki ni karaoa te kamatata raoi bwa te rinerine ni bwabetitoaki bon te moan ni mwaneka ni katauraoi nakon kakabwaia n te tembora.”

Monica, ae aman natina, e iangoia ni katabeia ataei ake a ikawai riki bwa a na ibuobuoki nakoia taria ao mwaneia aika a uarereke riki ni katauraoia n aron ae a kona. “N ongora irouia tariia ke mwaneia ni kaota aia kakoaua ao n tibwaua ana atatai teuanne ke neienne e bon karika te korakora,” e taku. E reitia Lori bwa n tabetai a tuangiia ataei ake a katauraoi ibukin te bwabetito bwa ana reirei te bwai ae a tia n reiakinna nakoia tariia ao mwaneia ake a urarereke riki.

Ngke e a koro waniua ana ririki natin Taniera te aine, e ataia ae tangiria n tibwaua ana bong ni bwabetito ma raoraona ake tiaki kaain te Ekaretia. Ngaia are a iangoia aia utu bwa ana kanakoa te kakao n ana bwabetito Allison nakoia raoraona n ana reirei ao kaain rarikiia. Raoraona aika a tuangaki bwa ana uoti ma ngaia aia kibu man te Baibara ae a mamate nanoia iai ni kaineti ma te bwabetitio. Imwiin te bwabetito, e rainii kiibu Allison n ana tiete ni booki aika tabu ae boou ao ni koroi araia raoraona n te mwatin.

“E koaua, bwa ngkai ana utu ngaira, ti rangin n ibuobuoki n te bong anne. Ma ti kariaia naba bwa e na reitaki ma raoraona imwiina ao n taetae nakoia n te bwai ae e namakinna,” e taku Daniel. “Bon te tai ae rangin ni kakukurei n noriia ara ataei ni katea te katooto.”

Kimberly, tinaia ataei ake a kaan roro ni bwabetito, e uringa ngke e nakonako nakon ana aobiti te bitiobi ibukin ana intawiu n ana bwabetito ngke wanua ana ririki. “E rangin n nako nanou!” e taku Kimberly.

Ngkai e na kataia ni kakoaua bwa ana aki reke namakin aikai nakoia natina. Ngaia ma buuna a taetae nakoia natiia taekan ana intawiu te bitiobi ao n titirakiniia titiraki iaon te bwabetito n tain te intawiu -n aron karaoana. Intawiu aikai a karaoa ae bati riki nakon kataneiaia ataei ma aron karaoan te intawiu—a kaungaia naba ataei bwa ana kakorakora iangoan nanon te berita ae tabu n te bwabetito nakoia.

A waekoa kaaro aikai ni kamatata bwa akea te bwai ae a tia ni karaoia ni katauraoia aia ataei ibukin te bwabetito ao te kamatoa, ma angiia a kabonganai taeka n aron “nakoraoi” ao “boraoi” ni kabwararai reirei ake a tia n reiakin n ririki aika nako. “Ti kakoaua bwa a matata raoi ara ataei bwa aio te mwaneka ae kakawaki inanon maiuia, ao bon te boraraoi ae kakawaki,” e taku Kimberly. “Ti kakoaua n tainako bwa bon ngaira aika ti katauraoia, ao n aki ti kantaingaia bwa ti aia taan reirei n te Moanrinan ae a reireiniia.”

Ai tamaroaara te tai ae ti a tia n anganaki ni buokiia ataei aika ti tangiriia ibukin te bwabetito ao te kamatoaaki! Ngkana ti tataro mwaaka, ao te Uea e na mena iroura ni kanakoraoa te moan ni berita ae tabu aei -ni karaoa te atatai nakon te mwaaka ibukin te rikirake n tamnei nakon taai aika ana roko.