Ni kaekan te Wewete ibukia Riki Mitinare: Nabeakinan Aroaroia Mitinare n te Mwenga ao n te Ekaretia
Bitiobi Victor Nogales man te Parque Chacabuco Uoote, Buenos Aires Argentina Congreso Titeiki, e tekateka i moan te raubaba ni katanoata ae onrake n tamneia 37 kairake n ataeinimwaane ao ataeinaine n ana uoote. Ngkana temanna mai buakoia e nako ibukin ana mwakuri ni mitinare, e katuka ana rongorongo irarikin te tamnei.
“A rang onrake n te kukurei au kairake ngke a roko inanon au aobiti ao noori tamnei ma rongorongoia,” e taku. “E kaungaia bwa a na katauraoia ibukin aia mwakuri ni mitinare.”
Te uoote aei i Buenos Aires e kaota tamnein te mwakuri ni mitinare. Inanon moan onoua namwakaina n 2012, 19 te roronrikirake—14 mai buakoia a rairaki—a kitan mwengaia ni karaoa aia mwakuri ni mitinae n aaba aika waniua. E raka iaon 80 te baetienti mai buakoia te roronrikirake ae konabwai a anga nanoia bwa a na karaoa aia mwakuri ni mitinare.
Inanon ririki aika a tibwa nako taan kairiiri n te Ekaretia a tia ni karaoi tabeua bubuti bwa e raka riki kairake ni karaoi aia mwakuri ni mitinare.
Inanon te maungatabu ni kabuta n Eberi 2005, ni waekoa imwin te Ekaretia e kanakoi Preach My Gospel: A Guide to Missionary Service, Unimwaane M. Russell Ballard man te Kooram n Abotoro n te Tengaun ma Uoman e reireinia utu ao taan kairiiri n nabeakina tamnein te mitinare ao ni katauraoia riki kairake n ataeinimwaane ao kairake n ataeinaine ni beku ma te karineaki man buokakia n ota bwa antai ngaiia ao n reireinia te tua (taraa “One More,” Liahona, Meei 2005, 69).
Ana katanoata Beretitenti Thomas S. Monson n te maungatabu ni kabuta n 2012 bwa tianakin aia ririki mitinare e na kakerikakaki bwa teuana te kauring bwa te Uea e kawaekoa Ana mwakuri.
N te bong aei angia utu ao taan kariiri n te Ekaretia a anai reirei aikai ni karini raoi i nanoia ao ni katea te katei ae korakora ibukin te mwakuri ni mitinare inanon aia aono.
Buokia te Roronrikirake n Ota bwa Antai Ngaiia
Ni kaekan te titirtaki, “Ko na kanga ni katauraoia angiia mai buakoia am roronrikirake bwa a na anga nanoia ni beku?” E kaeka Bitiobi Nogales, “Ngke I weteaki bwa te bitiobi, au moan tabeaianga bon kairake n aomata inanon au uoote, ao I kamatata raoi nakoia taan kairiiri ni uoote ake tabeua bwa ti kainnanoaki n riki bwa mwakoron maiuia.”
N aron te katoto, mitinare ni kabane mai Chacabuco iai nakoaia inanon aia uoote imwain nakoia. Angin te tai taan rairaki aika a boou ao membwa aika a aki bati ni kakakonimaki a kaoaki bwa a na beku n riki bwa taan reirei, are e na buokia ni katauraoiia n reireia te euangkerio.
Bitiobi Nogales e bairea naba aroia te roronrikirake bwa a na katauraoiia raoi n te maiu n tamnei ni wakuri ma mitinare aika a bwanin aia tai n te aba.
Ngkai taan kairiiri n te Ekaretia ao membwa a tia ni motika nanoia nakoia te roronrikirake ibukin te uoote, a tia ni kaniwanganaki n noorakin tamnein te mwakuri ni mitinare bwa e rikirake ni korakora.
Te Utu ae Bane Nanona irouia Mitinare
Garth ao Eloise Andrus mai Draper, Utah, USA, a ataia bwa tera nanon te utu ae bane nanona irouia mitinare. Iai tibuia 17 mwaane are a tia ni karaoa aia mwakuri ni mitianre, ao ngaia a tia ni beku onoua aia mition i bon irouia.
Nabeakinan te mwakuri n ibuobuoki ni mitinare inanon am utu bon te bwai ae moanaki man te tai are a uarereke iai ataei, e taku te Tari Andrus.
E kariaia Titita Andrus. “Kantaningan karaoan te mwakuri ni mitinare bon te bwai ae ko riai ni maroroakinna, ma ko taetae nakoia am ataei ao tibum n aron ae ko kantaningaia bwa a na nako ni mitinare—ngke ko nako ni mitinare, tiaki ngkana,” e taku neienne.
Reireinaia te roronrikirake bwa antai ngaiia man katean te katoto n te mwakuri n ibuobuoki ni mitianare e kakawaki naba. Te Tari ao Titita Andrus a butimwaea moan weteaia n 1980, n te tai are e nako iai ni mitinare aia bina te mwaane.
Temanna tibuia te mwaane e koroboki nakoia imwin reken te bwaintangira are a kanakoa nakoina ibukin katauraoana n ana mwkauri ni mtinare. “E karabwaira [ibukin te bwaintangira], man taku, ‘Ae raka riki kakawakina bon karabwakimi ibukin te katoto are kam a tia ni kateia,’” e taku Titita Andrus.
Anga reirei n te Reirei
“Ara roronrikirake iai inaomataia ni kantaningaia bwa aia karo ao taan kairiiri n te Ekaretia ao taan reirei a na kakoaua raoi bwa te roronrikirake a ataa ao n ota n ana euangkerio Iesu Kristo,” e taku Unimwaane Ballard. “Te Tamnei ae Raoiroi e na kamatoa te koaua nako nanoia ao ni kaura Otan Kristo nakon tamneia. Ao imwina ko na karekea temanna riki te mitianare ae tauraoi raoi” (M. Russell Ballard, “One More,” 71).
Ni kania 6,000 te maire (9,600 kiromita) raroana mai Buenos Aires, te Horseshoe Bend Mwaanga irarikin Boise, Idaho, USA, e a tia naba n noora te rikirake ae korakora n te mwakuri n ibuobuoki ni mitinare ngkai utu ao taan kairiiri a tia ni kakorakora riki aia kekeiaki n reireia te euangkerio nakoia aia roronrikirake.
Man te mwaanga ae uarereke mai buakoia 75 aia mwembwa, ruaman kairake n aomata ni karaoa aia mwakuri ni mitianre.
Unimwaane Russell M. Nelson man te Kooram n Abotoro n te Tengaun ma Uoman e katuruturua bukin ao kakabwaia ni karaoan te beku. “Ni kabane mitinare … a beku ma nanoia ni koaua ni kanakoraoan maiuia aomata,” e taku. “Te babaire ni karaon te mwakuri ni mitinare e na iai mwina n tokin kawain te mitinare n te maiu n tamnei, teuanne ke buun neienne ao kanoaia ibukia roro nako ake a na roko. Te nano ni karaon te beku bon iai mwina ae e na riki iroun temanna are e rairaki, tauna, ao katauraoi” (“Ask the Missionaries! They Can Help You!” Riaona, Nobembwa, 2012, 18).
Martin Walker, te beretitenti n te Emmett Idaho Titeiki, e kariaia. “Karaoan te mwakuri ni mitinare e katuka te kairake n aomata iaon te kawai ae e na rootaki iai roro nako,” e taku. “Ngkai te titeiki, ti karaoi bwaai ni kabane ake ti kona ni katauraoia kairake ibukin te mwakuri n ibuobuoki ni mitinare.”
Mwakoron te katauraoi anne e raonaki ma reireinaia te roronrikirake te reirei. Te roronrikirake n te Horseshoe Bend Mwaanga a ira te kiraati ni katauraoi ni mitinare ae katoa wiiki ae reiakinaki iroun te mition beretitenti mai mwaina—te kataneiai n rakan mwakoron kataneiai ni mitinare are e katauraoaki man te Titeiki ni bowi ni katauraoi n te mwakuri ni mitinare ibukin te roronrikirake ni katoa namwakaina ao ana Kaembwa te nakoanibonga ae te Aaron ni katoa ririki.
LaRene Adam—temanna mai buakoia natin te Tari ao Titita Andrus ake onoman—e beku irarikin buuna te mwaane, Jim, n te Copenhagen Denmark Mition man 2007 nakon 2009. E kaota koauan reireiakia ataei te euangkerio inanon te mwenga.
“Teuana mai buakon bwaai aika a korakora aika ko kona ni karaoia ni buokia am ataei ni katea aia kakoaua ibukin te mwakuri ni mitinare bon karaoan am bootaki n utu n te tairiki ao kamatebwaian booki aika a tabu n te utu,” e taku. “Ngkana ko angania kamatebwaian aan te euangkerio ao te rabakau ibukin te euangkerio, a na bon rangin tauraoi raoi ao n rawata riki aia atatai ibukin te euangkerio.”
Bitiobi Victor Nogales e tei irakrikin te raubaba ni katanoata are e kaotia ni kabane te roronrikirake n ana uoote, n ikotaki ma naake a karaoa aia mwakuri ni mitinare ngkai.
Tamnei n anganano mairoun Paul. L. Garvin