Rikiraken te Ekaretia n te aba ae aomatana a tauraoi ni butimwaea te euangkerio: Te Roronrikirake ae Kakaonimaki i Uganda

Kairake n ataeinaine n teuana te uoote a kaungaaki man ana anga reirei Titita Elaine S. Dalton, beretitenti ni kabuta te Kairake n Ataeinaine, i aon tamaroaia: “Ngkai bon te tai ibukira n tatabemaniira nako n teirake ao n taua bwa e na nooraki te baena nakon te aonaaba ni wewete ibukin te oki nakon te tamaroa.”¹ Kairake n ataeinaine a tamwarake nakon taubukin te tabuki are a kona n noora aia taun ao n tabeka aia baana aika koora are e kaota aia berita bwa ngaia katotoon te tamaroa. Ni kabane ngaiia a anenea “Nora te Manuia” (Anene n taromauri, nambwa 5).

Kairake n ataeinaine aikai a tia n tabekarake oin aia kainibaire n te etieti. Ongotaekaia e a tia ni kakorakora aia kakoaua ao n rootia tabeman. Titita Dalton e a tia n taku, “Tai baireia ni kauarerekea mwaakan am mwakuri ae etieti.”² Ao n aron te baana, te katoto irouia kairake n ataeinaine aikai e kona n nooraki irouia aomata ni kabane.

Tamnei

N aroia kairake n ataeinaine aika bati i Uganda, Sandra e rianna n raka i aon teuana ma te iterana te kiromiita nakon te taromauri, e buoka ni kaitiaka te auti ni bootaki n te Kanimabong koraki, ao ni kaea te tieminari ni katoa Kaonobong. I nanon te wiiki, e uti i mwain 5:00 a.m.ni wareki ana boki n reirei, ao i mwiina e nakonako nakon ana reirei, n okira mweengana i mwiin 6:00 p.m. E aki reirei i nanon teuana te ririki ibukin te kangaanga n te mwane ma e kaaitaraa ana kakaewenako ma te anua ae tamaroa: “Te euangkerio e a tia ni buokia raoi n tiku n teimatoa n nene ao n aki kakai kamwaeaki.”

Sandra bon tii ngaia kaain te Ekaretia i nanon mweengana, ma ana karo a boutoka ana mwakuri n ibuobuoki are e anga nakon te Ekaretia, n aron ae te ibuobuoki ngkana te uoote e kaitiaka aia tabo ataei ake akea tamaia n aia tabo. Ana utu a nooria bwa e kanga te euangkerio n tia ni buokiia n riki ni korakora, e ngae ngkana e kaitaraaki ma kangaanga ake a tuai ni kaekaki. N iango i aon te tabo are e roko iai te korakora anne, Sandra e taku, “Ngkana I nako n taromauri, I namakina ae ai aron ae I katokai bwaai ni buaka nako ake mairoun te Atua” (taraa I-Ebeto 6:11–17).

Te tia rairaki naba ngkai, Susan, e tangira te Ekaretia. Rikina mai Sudan Maiaki, ana utu a birinako man taian kangaanga ao e bon kakabwaiaki ni karekeia mitinare i Uganda. Ngke bon te aomata ae birinako mai abana, e kunea te rau ao te kamanoaki i nanon te euangkerio. N Taabati nako e kairiia tarina ma mwaanena aika uarereke nakon te taromauri, ai aron naba ae nakon 10 ataei tabeman aika tiaki kaain te Ekaretia. I mwiin maten kaain aia utu temanna ae e aki kantaningaaki, e oki rikaaki nako Sudan Maiaki, ike e a tataninga te Ekaretia bwa e na kateaki n ana aono. Ngaia ni kauoman Susan ao Sandra a kaitaraai kakaewenako, ma a onimakina te Atua ao ni kimareirei n te kakabwaia ni maiuakinan ana euangkerio Iesu Kristo (taraa Aramwa 32:6–8, 43).

Kairake n ataeinimwaane i Uganda a moanna n takakarona te butiboro ngke a uarereke, ni kamanenai mwaanga aika kabaeaki ibukin te boro. Man te tai are e rang ni uarereke, Dennis iai ana tarena n te takakaro anne, ao ana reirei ae rietata e anganna te buoka n te mwane n takakaro ibukin aia tiim. I mwiin banen ana reirei ae rietata, te tiim ae burobetinoro e kabooa n te mwane ao ana auti. Bon te mii ae a koro bukina, ma Dennis e ataia bwa aio e na kamangaoa ana baire n nako ni karaoa ana mwakuri ni mitinare rimwii riki n te ririki.

Tamnei

Nanon Dennis ni karaoa terana are e tangiria te Tama are i Karawa bwa e na karaoia e bon rangi ni korakora n te aro are e aki tangiria bwa e na kaririaki n tiku n ana tiim ngkana e roko te tai ibukina bwa e na karaoa ana mwakuri ni mitinare. A rawata aomata ake a kaeka ana rinerine, ma Dennis e a bon koaua bwa e a tia ni karaoa te babaire ae eti—ibukina ao tabeman. “Tariu uoman aika uarereke ao mwaneu uoman aika uarereke a bon tibwa bwabetitoaki,” e taku. “Akea au iango bwa mwaaneu a na ongo te euangkerio. Ngke I nora te Atua ni karaoi kakai ibukin au utu, e anganai te kantaninga ae kakukurei ibukiu n taai aika a na roko.”

I nanon ana uoote Dennis kairake n ataeinimwaane a kamatebwaia Preach My Gospel ni katoa wiiki. A riki n ai aron te tiim, ni mwakuri raoi ma mitinare aika bwanin aia tai ao ni kairiia raraoia nakon bootaki n Taabati ao mwakuri ni kakukurei tabeua, n ikotaki ma takakaron te basketball ao te butiboro i nanon te wiiki. Ibonga a tia ni bwabetitoia raoraora ao tabeman a buokiia n anga reirei ma mitinare. I aon ririki aika bati, te tiim aio ni kairake n ataeinimwaane e a tia ni kakorakora te uoota ni kabane, ao aua mai buakoia, n ikotaki ma ana uoote Dennis, e karekea te wewete nakon te Kenya Nairobi Mition.

A tia n ira ana reirei Unimwaane David A. Bednar man te Kooram n Abotoro n te Tengaun ma Uoman n“riki bwa mitinare ni maan imwaain ae ko anga am mition beeba.”³ A karaoia ni bootaki ni mwakuri n ai aron te kooram, te tiim ae tamaroa riki nakoia ake tabeua.

Nikabane mitinare ake aman a konai kakawenako bwa a aonga ni mwakuri. Wilberforce e kabwarabwara, “I bon kuri ni kabua te kantaninga nakon au mwakuri ni mitinare [ibukin te kabane mwane], ma ngkanne I wareka Mataio 6:19–20: ‘Tai kaiko ami bwai i aon te aba … ma kam na kaiko ami bwai nako karawa.’ Ai ngaia are ma te nanokorakora ao te anganano, I a bon kona ni karaoa au kouru ni mwakuri bwa te mitinare ae bwanin au tai. I tangira te mwakuri ni mitinare. Akea riki te bwai ae tamaroa nakon ukoukoran moa uean te Atua.”

Te roronrikirake mai Uganda a buoka katean abanuean te Atua ikai, ma te kantaninga ae korakora ibukin taai aika a na roko. E ngae ngke akea te tembora i Africa Mainiku, te roronrikirake e kantaninga nakon te tai are a na kona ni mareaki i nanon te tembora ae raroa nako. Teuana ana mwakuri te titeiki e kabotoa i aon te katauraoi nakon te tembora, ao n tokina, temanna kaain te beretitentii n te titeiki e kaota ana kakoaua: “Te Atua e tangiri ngkami. Ngkami kaain te Ekaretia n taai aika a na roko i Uganda.” Roronrikirake aika tamaroa aikai a tia n rootia aika bati.

Kairake ni ataeinimwaane ao ataeinaine i Uganda a anga karea ni bwain te aonaaba ibukin kakabwaia aika a akea tokiia. A tia n unika koraan te onimaki ao a na kamarakea man taraaruaki raoi (taraa Aramwa 32:33–37). N ai aron te aroka ae e onrake ma te uaa (taraa Aramwa 32:42), te roronrikirake e tibwaua kimwareirein te euangkerio n te aba ae mari aio.