Te Tabo raa ae N na Kona ni Karekea Aekan te Maekatiin Aio?

I nanon mwanangara ma au utu mai Nevada, USA, nako Alaska, USA, I moana au maroroo ma te aine ae abwabwaki, ni bobotonaine, ma ni momoaomata are e kaaitaraai.

E titirakinai bwa N na nakea, ao I tuangnga ae ti na nako Juneau, Alaska, ni kawara natira te mwaane ao ana utu. E tuangai bwa Ngaia bon kaain Las Vegas. I mwiina, n rootakin ana namakin, e taku bwa e na nako Juneau ni kawariia ana koraki buuna ni karaoa te kauring ibukin buuna, are e a tia ni mare ma ngaia i nanon 20 te ririki. E a tibwa mate man te kaentia.

I taraia riaon te kawai n nakonako ao n iango i bon irou ai tekeraoira Ngai n ataa te babaire ni kamaiu ao n riki bwa te tia mwakuri i Las Vegas Nevada Tembora. I iangoia bwa tera ae I kona ni karaoia ibukin te aine aio n tabekarake tamneina.

N te tai ae karina, n aron ae rang ni mataata, I uringa te taeka are e taekinaki iroun te Burabeti Iotebwa Timiti are I a tia n tibwaia n aia Bootaki Aine. Ngke e katea te Bootaki n Aine, e taraia bwa aine “a na waekoa n anga te buoaka nakon te ianena; a na urakina te bwa ma te wain nako nanoia aika kananoanga; a na kamwau rannimataia ataei aika akea aia karo ao ni kakukurei nanoia aine aika akea buuia” (Aia Reirei Beretitenti n te Ekaretia: Iotebwa Timiti [2007], 452).

I a manga taraa riaon te kawai n nakonako teuana riki te tai. I noora te ianena ni kananoanga, te aine ae akea buuna ma nanona ae uruaki. I uringa are I a tia ni wareka te Turai 2011 Ensign ni moan riki te bong anne. E kanoaaki n tabeua rongorongo aika kakukurei are I iangoia bwa a na kona n anganna tabeua kaunganano ao karaunano.

I a kaninikoriaai, kauka te maekatiin nakon te rongorongo, ao n tuangnga bwa e na warekia. I taraaia raoi ao ni bon miimi bwa e wareki rain ni kabane—ma nanona. Ngke e bane, e wareka riki te rongorongo teuana.

Kakouaana iai te bwai teuana ae e a tia ni warekia ae riinga nanona. E rabwata te maekatiin ni kamatoa nakon bwabwaana ao i mwiina e kaoa rannimatana mai matana.

“Te Tabo raa ae N na Kona ni Karekea Aekan te Maekatiin Aio?” e titirakinai. I tuangnga bwa e kona ni kawakinna. I mwiina e wareki riki tabeua.

Ngke ti a roko i Juneau, e waekoa n taua baiu, e taraai ni kaineta matau, ao e taku, “Ko rabwa.”

I reiakina te reirei ae korakora man te bwai ane e riki anne. Ti katobibiaki irouia ianena ma nanoia aika uruaki are a kainnanoa te taeka n akoi ni kaunganano ao ake a kainnanoia n ataia bwa tera ngaira Aomata aika Itiaki ni Boong aika Kaitira ae ti ataia.