E Mate te Tareboon

I nanon Maati 1997, ni maekara i nanon kaawan Russia ae bubura ae Rostov-on-Don, buu te mwaane ao Ngai ti bwabetitoaki nakon Ana Ekaretia Iesu Kristo Ibukiia aika Itiaki ni Boong aika Kaitira.

Ngkai I kamatebwaia reirein te Ekaretia, a bati au titiraki aika a kaekaaki. E bon kakaongora aron reiakinan taekan te babaire ni kamaiu, n ikotaki ma karaoan te bwabetito ibukiia maate. I bon kubanako n reiakinna bwa ti kona ni bwabetitoaki ibukiia ara bakatibu ake a tia ni mate.

Teuana te ririki i mwiin ara bwabetito, te beretitenti n te mition e kaoira ni katauraoira nakon te tembora. Bwa mwakoron ara katauraoi, ti moana karaoakin ara kakae i aon rongorongoia ara utu. Teuana te bong ngke I bon iangoa karaoakin te mwakuri aio, e tang te tareboon. Bon tinan kaainabau. I tuangnga ngkana e kona ni kanakomaia rinanin araia ana bakatibu buu te mwaane ake a tia ni mate. E bon mimii ao n tuangai bwa te bwabetitio ibukiia maate bon tiaki ana reirei Iesu ma bon te bwai teuana are a bon karioi kaain te Moomon. I bon aki koaua bwa N na kangaa ni kaeka ibukina bwa I aki taneiai ma te kaeka bwa e na reke ia n te boki ae tabu are e na boutoka te reirei.

Ngke I tabe n iangoia bwa N na kangaa ni kaeka, e a mate te tareboon. I aki koaua n te maan ae teuana te miniti bwa terana ae e a tia n riki, ma I katuka te tareboon ao n nako nakon au ruu ni matu. I uota te Nu Tetemanti i nanon baiu, katorobubua n tataro, ao ni butiia te Tama are i Karawa ni kaotia nakoiu bwa N na kunea iaara te kaeka.

N tokin au tataro, I kauka te Baibara. I namakinna n ai aron ae iai temanna ae e a tia n tuangai bwa N na wareka te kibu 29 i bon i aon te iteraniba are I a tia ni kaukia. I a mena i aon te ka 15 ni mwakoro n te 1 I-Korinto, are e taekina te reirei ni bwabetito ibukiia maate.

I bon riingaki ao ni kubanako bwa te Tama are i Karawa e a tia ni kaeka au tataro ni bon te tai naba anne. Bon te namakin ae kamimii.

I bon rangi ni iangoa te bwai ae riki aio ngke e a tii tang naba te tareboon. Bon tinan buu, e titirakinai bwa bukin tera e mate te tareboon. I tuangnga I aki ataia ma n tuangnga bwa e na kauka ana Baibara ao ni wareka 1 I-Korinto 15:29.

Tabeua te bong i mwiina araia utu ake a tia ni mate a toka i aon au taibora. Tinan kainabau e a tia ni wareka te boki ae tabu ao ngkai e a kakoaua bwa te Tia Kamaiu, rinanon te Abotoro Bwauro, e a tia n anga te reirei ni bwabetito ibukiia maate.

Te Atua e a tia ni beritanii kakabwaia aika korakora nakoia aika a karaoi mwakuri n aki kabooaki aio. I ataia bwa aio e bon koaua.